برصغیر ہندوستان اٹ کتاب نا دیہاڑ
نوشت: ڈاکٹر مبارک علی
مٹ: برناز بلوچ
دی بلوچستان پوسٹ
ہراتم بندغی تہذیب ئٹ نوشتہ کننگ نا عمل مونا بس، گڑا اوڑتون اوار کتاب آک ہم وجود ئٹ بننگ بنا مسر۔ میسوپوٹامیہ نا تہذیب ئٹ کتاب آتے مِش ئنا تختی تیا ہم نوشتہ کننگا و ہندا وڑ مصر ٹی پائرس نا زی آ کتاب آک نوشتہ مننگ بنا مسر۔
ایلو تہذیب آتے ئٹ پارچمنٹ یا میڷ تا سل آ ہم کتاب آتا لڑ بنا مس ہندا وڑ ہندوستان ٹی palm نا پن آتیا کتاب آک نوشتہ مرسا وجود ئٹ بننگ بنا مسر۔ لبنان نا شار ببلو آن بائبل نا لوز مونا بس ، ہرانا معنی ءِ کتاب ۔ ہنداڑان bibliography یعنی کتابیات و bibliothec یعنی لائبریرین نا وڑ انگا لوز آک ودی مسر۔ کتاب ہم ہندا لڑ ئنا بشخ ئسے۔
بنا ئٹ ہرا کتاب آک نوشتہ مسر، اوفتا تعلق گیشتر مذہبی عقائد آتیان ئس۔ اوفتے زیبا جوڑ کننگ کن نشخ و نگار جوڑ کننگاکہ و اوفتے دیوی و دیوتا تا عکس آتیٹ شون تننگاکہ۔ مستنا ہندوستان ئٹ ہندو، جین و بدھ مذہب آتیا کتاب نوشتہ مس۔ کتاب ءِ پاک سرپند مننگاکہ و خیال تخننگاکہ کہ اوفتا بےشرفی مف۔
سینزدہ میکو کرن ئٹ ترک آک (ترکستان نا باتیک) ہندوستان ٹی کاغد نا صنعت ءِ مونا ہیسر۔ دا عمل کتاب نا صنعت ٹی انقلاب اس ودی کرے۔ کتاب آتتون اوار کتاب نوشتہ کننگ نا فن ئٹی ہم بھلو دیمروی اس مس۔ بیرہ اسہ نوشت ءِ کیہی وڑ تیٹ بھاز زیبائی ئٹ نوشتہ کننگ بنا مس۔ رائٹر آتا تپہ وجود ئٹ بس، ہرافک مخطوط آتے نقل کرسا عالم آتے اسکان سر کریرہ۔ بادشاہ و امیر تا دربار آتیٹی لائبریری تا قیام ٹہیفنگ ٹی بس۔ مغل دربار ٹی لائبریری نا عملہ بھاز زیات مسکہ، ہرافتے ٹی رائٹر، آرٹسٹ و جلد ساز غٹ مسرہ۔ اکبر بادشاہ ءِ عکسی آ کتاب آک دوست ئسر۔ خاص وڑئٹ اود امیر حمزہ نا کسہ ءِ پنی آ آرٹسٹ آتیان اکس آتا کمک ئٹ زیبا جوڑ کرفیسس۔
برصغیر ئٹ کتاب آتا تالانی ٹی ہمو وخت ودکی مس، ہراتم یورپ نا مسیحی تبلیغیک ہندوستان ئٹ پریس ءِ ہیسر۔ غٹ آن اولیکو پریس تامل ناڈو ٹی جوڑ کننگا، ہراڑے کرسچن مشینریک تامل بولی ٹی بائبل ءِ مٹ و شینک کریسر۔ دافک مسیحی کیتھولک مشنری ئسر۔ ایلو پارہ غان پروٹسٹنٹ مشنریک سیرام پور بنگال ٹی بائبل ءِ شینک کریسر۔
ہندوستان ئٹ پریس آتا تالانی ہمو وخت مس، ہراتم اوڑے انگریز تا حکومت برجا ئس۔ حکومتی پریس قانود، پڑو، پرمان و تینا پالیسی تا باروٹ کتاب، پمفلٹ و اشتہار چھاپ کریکہ۔ ہنداڑتون اوار جتا جتا غا شار تیٹی ذاتی پریس آک ہم جوڑ مننگ بنا مسر، ہراڑے مذہبی کتاب، کسہ و شاعر آتا دیوان آک چھاپ مسرہ۔ ہندافتیان اسہ شینکار منشی نول کشور 1858ء لکھنؤ ٹی پبلشنگ ہاؤس اس جوڑ کرے، ہراڑے فارسی، عربی، اردو، سنسکرت و ہندی بولی تیٹ کتاب آک شینک مسرہ۔
منشی نول کشور بھاز اصول و تنظیمی ماملہ آتے ٹی راہبند و قانود نا پابند ئس۔ نوشت آتے کن اود بھاز گچینو خطاط آتا خذمت ہلک۔ کتاب آتا پروف ریڈنگ بھاز خیال ئٹ کننگاکہ، ہرانا سوب آن اونا شینک مروکا کتاب آتے ٹی ساڑی نوشت آتے ٹی ردی متوکہ۔ دا مسخت کن اود ہندوستانی بولی تا چاہندار آتے ملازم تخاسس۔ قرآن نا نوشت ٹی اود بھاز خیال تخاکہ۔ تخت نا زی آ پیہن ءُ چادر اس تالان کننگاکہ و نوشتوک آک وضو نا حالیت ئٹی نوشتہ کریرہ۔ چھاپ کننگ نا وخت اگہ پنّو آتے ٹی خرابی اس بسکہ، گڑا پنّو آتے ہشنگ نا جاگہ غا کھڈ کننگاکہ۔ ایلو مذہب آتا پاک کتاب آتے کن ہم اونا رویہ ہندا ئس، ہرافتے ٹی وید و گرنتھ صاحب ہم اوار ئسر۔
نول کشور پریس آن کسہ، ناول، شاعر تا دیوان و اوفتا کلیات آک شینک مسرہ۔ نوشتکار آتے کن دا ہیت گمر نا لائخ مسکہ کہ اوفتا کتاب ناول کشور پریس آن شینک مرے۔ دافتے ٹی غالب، ڈپٹی نزیر احمد و مرزا رسوا اہم ادبی آ بندغ آک ئسر۔ رتن ناتھ سرشاد نا پنی آ سرحال آک آزاد نا کسہ، ہراکہ کیہی جلد آتے ٹی ءِ ، ہنداکان شینک مسوسس۔
کتاب آتا تالانی کن منشی صاحب پبلسٹی نا کیہی وڑ و ڈول تے کاریم ئٹ ہیس۔ اود ہندوستان نا جتا جتا غا شار تیٹی دکان دار آتتون رابطہ جوڑ کرسا تینا کتاب آتے تننگ بنا کرے۔ ہاکر آتے کارمرز کرے، ہرافک دا کتاب آتے است خواہی تخوک آتے اسکان دریرہ سر کریرہ۔ دانا سوب آن دن مس کہ اونا شینک مروکا کتاب آک ہر جاگہ غان دو بسرہ و کتاب آتا نہاد ہم کچ ئٹ مسکہ۔
منشی صاحب سختی تے مون تروک ءُ بندغ اس ئسک۔ ہراتم اود خنا کہ انگلستان آن پیش تموک آ کاغد کبین مریک، گڑا اود کاغد جوڑ کننگ نا کارخانہ اس جوڑ کرے، ہرانا سوب آن اودے زیات کتاب شینک کننگ نا آسراتی رسینگا۔ پبلشنگ ہاوس نا سوب آن منشی صاحب بھلو سرمایہ دار اس جوڑ مس۔ ہندا سرمایہ غان اود ڈغار ہلک و کتاب آتا تجارت ءِ ودفے۔
کتاب آتا پبلیکیشن ہندوستان نا خوانندہ غا تپہ ٹی بھلو زہنی بدلی اس ودی کرے۔ ہر اسہ شار ئٹ کتاب آتا دکّانک ملنگار، ہراڑے علم تخوک آتا دیوانک بنا مسر۔ لائبریریک ہراکہ بیرہ بادشاہ و امیر تا محل آتے اسکان مسرہ، داسا ریاست نا پارہ غان السی لائبریری جوڑ مننگ بنا مس، ہراڑے کتاب خوانوک آتے اڑزانی ئٹ کتاب آک خواننگ کن دو بسرہ۔ گڑاس علم تخوک آ بندغ آک تینکن ذاتی ءُ لائبریری ہم جوڑ کریر۔
برطانوی حکومت نا پارہ غان شینک مروکا کتاب آتیا ہم نظر تخننگاکہ کہ اوفتے ٹی حکومت نا برخلاف ہچو مواد اس مف۔ خاص وڑئٹ نصابی کتاب آتا پبلیکیشن نا کاریم ریاست نا ذمہ ٹی ئس۔ دا کتاب آتے ٹی او انگلستان حکومت نا جوانی تے نوشتہ کرفیکہ، تاکہ خوانندہ آتے ٹی وفاداری نا جوزہ غاک ودی مریر۔
خاص وڑ ئٹ اخبار و رسالہ آتیا سخت سنسرشپ لگاکہ۔ دا پابندی تا سوب آن نوشتکار آک پاش وڑ ئٹ تینا ہیت آتا درشانی ءِ کننگ کتورہ۔ ولے آجوئی نا جہد ئٹ دا چاہندار آتا بھلو کڑد اس ارے، ہرافک پابندی تا برخلافی ءِ کریر۔ اوفتا کتاب آک پُلنگار، اوفتے ڈنڈ تروئی تما و گیشتر حالیت آتے ٹی تو قیذ ئٹ مننگ نا سزا ہم رسینگا۔
برصغیر ئٹ کتاب آتا پبلیکیشن، ہراڑے اسہ پارہ غان مذہبی کتاب آتا سوب فرقہ واریت و تعصب آتے ودی کرے، تو ایلو پارہ غان ترقی پسند و روشن خیال نوشتکار آک رواداری و بریبری نا کلہو ءِ ہم تسر۔ بشخنگ آن مہالو و پد دا تومکا سوچ آتے ٹی ہرا مونتس ئس، او اینو اسکان ہم برجا ءِ ۔
(شابیتی حوال آتے کن Francesca Orsini نا کتاب “دی ہسٹری آف دی بک اِن ساوتھ ایشیاء” غا چمشانک شاغنگ کیرے ہراکہ 2020ء ئٹی شینک مسوسس)
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔