شاعرِآشوب: مبارک قاضی
ٹی بی پی سرگپ
بلوچی زبان نا پنی آ و جتا ڈول آ شاعر مبارک قاضی بلوچستان نا ضلع تربت ٹی 16 ستمبر آ کذیت کرے۔ قاضی ئے اونا باوہ پیرئی علاقہ ٹی گڈی جاہ تننگا۔
مبارک قاضی قوم پرست شاعر نا حیثیت ئٹ تینا اسہ یکَہ ءُ ہند ئس تخاکہ۔ او 24 دسمبر 1956ء آ مکران نا علاقہ پسنی ٹی کہدہ امان اللہ نا اُراٹی ودی مس۔
مبارک قاضی بلوچی بولی نا اسٹ انگا شاعر ءِ ہرادے اونا زند ئٹی الس نا کنڈ آن بے کچ مہر و شرف تننگا ہراڑے اونا عشقیہ شئیر آتے بھاز دوست کننگا ہموڑے اونا مزاحمتی شئیر آک ہم چار مہ کنڈ آ تالان اسر خاص وڑ ئٹ اونا مزاحمتی شئیر آتا ہر پِڑ آ ستا ئے کننگا۔
مبارک قاضی نا شاعری بلوچستان نا عکس ءِ۔ قاضی نا شئیر آتیٹی بلوچستان نا فطری زیبائی، مہر و مابت، بزرگ آتا اوصاف، راجی دود آک، محکوم آتا دڑد، بلوچ وطن نا آجوئی نا ہیت و مزاحمت نا پنت بھاز خننگک۔
قاضی نا شاعری بلوچ ادب و بلوچ مزاحمتی جہد آ بھلو نشخ اِلا، او تینا شاعرانہ لائخی ئے بلوچ الس نا مزاحمت و اومیت آتا توار تننگ کن کاریم اٹ ایس۔ قاضی نا شئیر آک بیرہ فنی درشانی نا ذریعہ افس بلکہ چاگڑدی بدلی نا طاغت تخوکا وسیلہ ءُ۔ اونا شاعری بلوچ راجی آجوئی کن جنگ کروکا تا اُست ئٹی عزم نا خاخر بش کرے و مزاحمت نا درس تس۔
قاضی دلیری ئٹ جنگ زدہ چاگڑد ئٹی یخ تفی ئے پرغوکو نظم لکھا ہرا نا نیہاد ئے او پابند سلاسل مرسا تس۔
مبارک قاضی تینا زند ئٹی ورنا غا مار کمبر نا شہیدی نا ڈکھ ئے سگا، ہرا اوڑکن قیامت آن کم الو ولے قاضی تینا ارادہ تئٹ لڑزتو و مزاحمت نا مشعل ئے تمنگ کن التو۔
مبارک قاضی نا شاعری بلوچ چاگڑد نا ہر تپہ ئے زیمی کرے و اونا شاعری راجی اومیت آتا ترجمانی کرسا اس۔ اونا شئیر آک بلوچ وطن نا آجوئی کن جہد کروک آتیکن آدرش نا کاریم کریر و بلوچ تحریک آن سوگوْ تعلقداری و تینا شئیر آتا زریعہ ئٹ آجوئی نا پرچار اودے مزاحمت نا علمبردار جوڑ کرے۔
مبارک قاضی نا ادبی لائخی تیان بیدس، اونا شئیر آک اسہ جنگجو ئسے کن مزاحمت نا پنت ءُ، اوفتیٹی جیرت نا روشنائی ڈھکوک ءِ و مظلوم آتیکن طاغت نا ذریعہ ءِ۔ مبارک قاضی نا میرات، آزادی نا جہد ئنا درس ءِ و بلوچ دیہاڑ نا پنّو آتیٹ اونا شاعری کسر نا چراغ ءِ، ہرا بروکا زنک آتے ہم زیمی کرو و اونا شئیر آک آزاتی و مزاحمت نا بیرک ءِ ارفوک ءُ۔