بلوچ لبریشن آرمی نا ترجمان جیئند بلوچ میڈیا غا شینک بیان ئٹ پارینے کہ ننا سرمچار آک تربت و قلات ئٹ قوضہ گیر پاکستانی لشکر و اونا مخبر تیا جلہو تیٹ ٹک کریر ہرافتیٹی پنچ کارندہ مرگ ئنا گواچی و مسٹ ٹپی مسر۔
ترجمان پارے کہ بی ایل اے نا سرمچار آک استو کیچ نا شار تربت ناصر آباد ئٹ اسہ انٹیلی جنس بیسڈ آپریشن اسیٹی پولیس تھانہ غا چھاپہ خلکر، ہراڑے دروشم بدل کروک ہندی قوضہ گیر پاکستانی لشکر نا مخبر تا اسہ نیٹ ورک ئسے نا ساڑی گری نا حوال ئس۔
او پارے کہ سرمچار آک چھاپہ خلیسہ تھانہ نا انچارج تون اوار ایلو پولیس کارندہ آتے دزگیر کریر، اندا وخت آ اسہ پولیس کارندہ اس سرمچار آتیا جلہو نا کوشست ئٹ خلنگا۔
جیئند بلوچ پارے کہ سرمچار آک فوجی مخبر تا پک کننگ آن گڈ اوفتے مرگ ئنا گواچی کریر، ہرافتیٹی محمد عظیم ولد ظفر علی، شہباز ولد غلاف رسول، باقر علی ولد شیر محمد، شہزاد احمد ہند مظفر گڑھ پنجاب و پولیس کارندہ عطا جان ولد محمد اسلم ہند تربت اوار ءُ وختس کہ نرنگ نا کوشست ئٹ مدثر ولد شیر محمد ہند ڈی جی خان ٹپی مس۔
اونا پاننگ ئس کہ پن کروک دژمن نا مخبر آک دروشم بدل کرسہ تربت شار و دامون ایمون ئٹ قوضہ گیر پاکستانی لشکر نا زر تننگ آ کاریم کننگ ئسر وختس کہ شام ئنا وخت آ خڑک ئنا پولیس تھانہ ٹی ہندی ئسر۔
جیئند بلوچ پارے دا چھاپہ ٹی سرمچار آک پولیس کارندہ تا سلہہ تیا ہم کوزہ کریر۔
جیئند مستی پارے کہ بلوچ لبریشن آرمی پولیس و لیویز ءِ پاش پائک کہ قوضہ گیر لشکر و ڈھکوک ادارہ تا پاننگ آ بلوچ راجی آجوئی نا جنز نا مونا اڑاند مننگ آن تینے مر تورر، ہندی بندغ مننگ نا سوب آن دا فورسز تے سرمچار آتا پارہ غان آسراتی تنگانے، انگہ اوفک تینے بلوچ کشی آن مر توتویس گڑا اوفتے ام قوضہ گیر لشکر نا وڑ پاش ٹک کنگو۔
جیئند بلوچ پارے کہ انداڑتون درو شام ئنا وخت آ بلوچ لبریشن آرمی نا سرمچار آک قلات نا علاقہ جوہان ئٹ قوضہ گیر پاکستانی لشکر نا اسہ بنجاہی ءُ کیمپ ئسے آ ہمو تم بھلا سلہہ تیٹ جلہو کریر، ہراتم دژمن لشکر نا گاڈیک بنجاہی گیٹ آ سر مسوسر۔
او پارے کہ سرمچار آتا جلہو ئٹ ود کم ارا کارندہ ٹپی مسر وختس کہ رکھی چوکی تیٹ کارندہ تے ام جانی نسخان ارفوئی تما۔
بیان نا ایسر ئٹ جیئند بلوچ پارے کہ بلوچ لبریشن آرمی دا ہڑتوما جلہو تا ذمہ واری ءِ ارفک و دا گڑا ءِ پک کیک کہ قوضہ گیر لشکر نا بلوچستان آن تیوہ پیشتمنگ اسکان ننا کاروائیک برجاء مرور۔