ایران نا نوبل داد دوئی کروک نرگس محمدی نا قیذ ئٹ، ہرا جیل ئٹ سزا ٹی ءِ، اسہ عدالت اس 15 توہ ئنا پین ودکی کرینے۔
نرگس محمدی نا خاہوت درو انسٹاگرام آ تینا اسہ پوسٹ اسیٹ پارینے کہ پوسکنا سزا 19 نومبر آ بِنفنگا و نرگس محمدی آ دا دوبہ خلنگانے کہ او ایران نا اسلامی جمہوریہ نا برخلاف پروپیگنڈہ تالان کننگ ءِ۔
پوسٹ نا ردئٹ نرگس محمدی عدالت ئٹ ہِننگ آن نمن کریسس۔
فیصلہ ئٹ گیشتر پاننگانے کہ سزا پوروْ مننگ آن پد محمدی آ اِرا سال اسکان پیشن ڈیہہ آ سفر کننگ و دا وخت ئٹ سیاسی و چاگڑدی ٹولی تا باسک مننگ و موبائل فون تخنگ آ رکھ مرو۔
پرمان ئٹ دا ہم پاننگانے کہ نرگس محمدی ءِ تینا پوسکنا سزا بنجاہی شار تہران آن پیشن اسہ پین صوبہ ئسے نا جیل ئٹ گدارفوئی تمو۔ دا وخت او ایران نا ملامت آ اوین جیل ئٹ تینا 30 توہ ئنا سزا ءِ گدارفنگ ءِ۔
اودے دا سزا گمانی ردئٹ ایران نا حکمرانی نا نظام نا برخلاف پراپیگنڈہ کننگ، جیل ئنا پرمان تے منپننگ و کوالخواہ تے ملامت کننگ نا سوب تننگانے۔
نرگس محمدی امن نا نوبل داد ءِ کھٹوک نوزدہمیکو زالبول ءِ و 2003 ئٹ بندغی حق آتا باسک شیریں عبادی آن پد او دا جہانی داد ئنا حق دار پن کروک ارٹمیکو ایرانی زالبول ءِ۔
نرگس محمدی زالبول تا حق اکن توار ارفنگ نا سوب 12 سال ئنا قیذ گدارفنگ ءِ۔
51 سالی محمدی دا سختی و آزموندہ تا پد ہم حق آتیکن تینا مہم ءِ برجاء تخا، ایرانی کوالخواک اودے کیہی وار دزگیر کرینو و او تینا زند ئنا کیہی سال جیل تیٹ گدارفینے۔
نومبر نا بناء ئٹ، نرگس محمدی ایلو بندی تیتون اوار مریسہ جانجوڑی کمک نا ہلنگ آن نمن و ڈیہہ ئٹ زالبول تیکن الّمی حجاب نا برخلاف برانز ئٹ بین برانز کریسس۔
خدو اسہ 22 سالی زالبول مہسا امینی نا پولیس نا دزگیر ئٹ کہنگ نا برخلاف تیوہ ڈیہہ ئٹ بھلو کچ اسیٹ زالبول تا سروکی ٹی برانز آتیکن نرگس محمدی نا فکر آک اسہ راہشون ئسے نا کڑد سر تسوسر۔