ایمنسٹی انٹرنیشنل اسلام آباد ئٹ بلوچ لانگ مارچ ئٹ اوار مروکا تے چرجوئی ئٹ بیم تننگ آ حکومت آ سخت نغد کاری کرے۔
ایمنسٹی انٹرنیشنل تینا شنگ کروک شابیتی رپورٹ ئٹ پارے کہ بلوچ یکجہتی کمیٹی نا کنڈ آن اڈ ہلوک، تُو ئسے اسکان برجاء سلوک پر امن برانز ئٹ بلوچستان آن کیہی زالبولک اسلام آباد آ بسر ہرا تینا بیگواہ غا بندغ آتیکن و بلوچستان ئٹی بیدس عدالت و قانود زوراکی نا بیگواہی و خون تا برخلاف انصاف نا خواست کننگ اسر۔
22 دسمبر 2023 آن نیشنل پریس کلب ئٹ بلوچ برانزی تا پرامن تولوک برانز نا وختا ریاستی مشنری نا کنڈ آن لانگ مارچ نا بارو ئٹ دروغ ئنا مہم بناء کننگا، اسلام آباد ئٹ سر مننگ آ اوفتے دزگیری تتون مون تروئی تما و داڑ اسکان کہ پاش آسمان نا شیف آ برانز کروکا تے ضرورت نا المی مڈی تیان ہم پولیس نا کنڈ آن پد بٹنگا۔
دا بارو ئٹ ایمنسٹی انٹرنیشنل نا قانود پالیسی نا پروگرام ڈائریکٹر کیرولین ہورن باز فریشانی نا درشانی کرسا پارے کہ بلوچ خاہوت آتے بیم تننگ ایمنی ئٹ برانز کروکا تا خواست آتا بارو ئٹ کوالخواہ تا بے بندغی ءِ پاش کیک۔
او پارے کہ درشان نا آجوئی و ایمنی ئٹ برانز نا حق آن نمن بیگواہ غا بندغ آتا خاہوت آتا کنڈ آن کیہی سال آن سگوک سختی تے پین ودفینے، ہرافتیٹ پیر انگا بندغ آتیان ہلیس چُنا ہم اوار ءِ۔
ہورن دا ہیت آ زور تس کہ دا برانز کروکا تا توار ءِ بے پام کننگ مف، خاص وڑ ئٹ پاکستان ئٹ مروک راجی گچین کاری تا وختا، تیبہ گچین کاری عمل ئٹ بندغی حق آتے برجاء تخنگ نا خواست ءِ۔
ایمسنٹی انٹرنیشل پاکستانی کوالخواہ تیا نغد کاری کرسا پارے کہ برانز کروکا تا آرگنائزر ماہ رنگ بلوچ جتا تپہ غا تا کنڈ آن بلوچ مخالف روشت آ افسوز نا درشانی کرے ہرا نا سوب آن او تینا برانز نا دا بشخ ءِ ایسر کننگ آ بیوس مسر۔ اوفتے پولیس نا کنڈ آن بیم تننگ، پروفائلنگ و ہڑدیئی دڑکو تتون مون تروئی تما، ہرا دا پرامن تحریک ءِ توننگ نا منظم کوشست ئسے نا پیدواری ءِ کیک۔
کوالخواہ تا کنڈ آن طاغت کاریم اٹ ہتنگ ئٹ ‘جہانی مظلوم قوم آتا کانفرنس’ ئٹ بندغ آتا بننگ آ رکھ خلنگ، برانز ئٹ اوار مروکا تا دامون ہیمون پِتی تار خلنگ، و برانز جاہ آ المی مڈی دننگ نا موکل وے تننگ اوار ءِ، داخس یخ ئٹی ہم برانزی تا حوصلہ آک بڑز اسر انتئے کہ یخ ئٹی تولنگ نا دڑد اُرا ٹی تولنگ و تینا بندغ آتا واپس بننگ نا انتظار نا دڑد آن زیات الو۔
رپورٹ ئٹ پشتون تحفظ موومنٹ (پی ٹی ایم) نا راہشون منظور پشتین آ جلہو تون اوار زوراکی ئٹ دزگیری کون آ تدینی آ شابیتی درشانی کننگا، ہرا مُسہ وار ضمانت رسینگ آن پد ہم دزگیری ٹی ءِ۔
بلوچ لانگ مارچ ئٹ اوار مروکا تے 20 دسمبر 2023 آ اسلام آباد ئٹ سر مننگ آ آنسو گیس، واٹر کینن و لٹ کُٹ تون مون تروئی تما۔ پدان دزگیری، ہرافتیٹ زالبول، چُنا، خوانندہ، و پیر ءُ بندغ اوار اسر، دا نیام ئٹ بست و بند بے چکاری نا درشانی کرے۔ G-7 وومنز پولیس سٹیشن، اسلام آباد ئٹ 47 زالبول و پنچ چُنا دزگیری نا وختا کوالخواہ تا بدروشت و تڑی تننگ نا شکائست کریر۔
ایمنسٹی انٹرنیشنل نا کنڈ آن دا رپورٹ ئٹ بلوچستان ئٹ برانز آتے کوَر کروکا صحافی تیا مقدمہ نا ہم مذمت کننگا۔ رپورٹ ئٹ پاننگا کہ حکومت و فورسز آتا کنڈ آن وڈھ، بلوچستان ئٹ ریلی تے کوریج تروکا صحافی و لوک سُجاگ نا فاطمہ رزاق تون اوار ایلو میڈیا کارندہ غا تے بیم تننگ و دزگیری تو مون تروئی تما، ہراڑان صحافی تیٹ خلیس و خود سنسر شپ نا ماحول ودی مس۔ داکان بیدس کوہلو و تربت ئٹ سرکاری ملازم آتے لانگ مارچ ئٹ اوار مننگ آ نوکری تیان کشنگا۔
رپورٹ ئٹ اہم حکومتی شخصیت آتا کنڈ آن اختیار آتے رد کارمرز کننگ آ روشنائی شاغنگا ہرا بیگواہ غا بندغ آتے ‘دہشت گرد’ پاریر، ہراڑان برانز کروکا تا مسخت نا جواز ءِ ودیک نسخان رسینگا۔
ایمنسٹی انٹرنیشنل حکومت پاکستان آن زوراکی نا بیگواہی تے ایسر کننگ، جہانی کنونشنز آتا توثیق و بلوچ برانزی تا بر خلاف کُل قانودی کارروائی تے واپس ہلنگ نا خواست کرے۔
او ودیک پارے کہ بالاچ مولا بخش نا گمانی بیدس عدالت خون آن بناء مروک بلوچ لانگ مارچ، بلوچستان ئٹ احتساب و بیدس عدالت خون و زوراکی نا بیگواہی تا خواسگ کیک انتئے کہ بلوچستان ئٹ بے انصافی تا چرجوئی کیہی دہک آن برجاء ءِ، زوراکی نا بیگواہی تیا پٹ و پول کروک کمیشن 2011 آن دائسکان 10,078 زوراکی نا بیگواہی ریکارڈ کرینے، ہرا پاکستان نا جہانی قول آتیان چپ ءِ۔
ایمسنٹی انٹرنیشل نا کنڈ آن شنگ مروک رپورٹ نا ایسر ئٹ پاکستان نا کوالخواہ تیا زور تننگا کہ بندغی حق آتا چرجوئی ئٹ لتاڑ آ دمدستی پام و کاروائی بکار ءِ۔