بلوچ لانگ مارچ نا راہشون ڈاکٹر ماہ رنگ بلوچ کوئٹہ نا بخیر کروک بندغ تا مُچی ءِ پامدار کریسہ پارے کہ تینا جنز ئنا پنچمیکو لڑ ئٹ نن اسلام آباد ئٹ مون تروک سختی، ظلم، لٹ و کٹ و مصیبت آتا غٹ کسہ تے ایسونن بننگ اُن۔ یات تخبو، ننا لمہ تا بے شرفی کننگا، ننے آ دہشت گرد نا لیبل خلنگا۔
او پارے کہ نن ہچبر اُست آن دپرون کہ اسلام آباد ئٹ ریاست ننتون امر ءُ سلوک کرے۔
ڈاکٹر ماہ رنگ بلوچ تران کریسہ پارے کہ ہرا وڑ نم داڑے ساڑی اُرے اندا وڑ 27 جنوری آ ہم تینا بننگ ءِ الّمی کیرے۔ ہراتم نن تربت آن پیشتمان تو ننتون زالبول و چناک ئسر، نن اُرا اُرا اسکان ہنان و بندغ آتے پارین کہ سیوت ئٹ اسہ جاہ مبو، بلوچ زنک ایسری نا برخلاف ہمکوپہ مبو۔ ہرا سردار، میر و ٹکر آک نمے ونڈ کرینو ای پاوہ کہ اوفتا برخلاف اسہ جاہ مبو۔ دا ہمو ریاست ءِ ہرا بنگلا دیش ئٹ زالبول تیتون بد کاری کرے، دافتے گیرام کپبو۔ اوفک نما ایڑ تا گُد آتے چکار، ننے کِرینگ تسر۔
او پارے کہ اسلام آباد ننے پارے کہ بلوچیک نم ہنبو تینا ڈغار آ، بلوچ آک داسہ نم اوفتے تینا ڈغار آن کشبو، غٹ بندغ تیان اندا خواست ءِ کہ او ننا جنز ئتون اوار مریر۔ دا بھلو ظالم ءُ، ہراتم نن اسلام آباد ئٹ ئسون تو ننتون ہچ اس الو، نن یخ و سخت حالیت آتیٹ تولوک برانز آ ئسون و دافک ننے دہشتگرد پاریسہ پامدار کریرہ۔
ماہ رنگ بلوچ پارے کہ اوفک بیرہ ننے دہشتگرد پاریسہ توار کتور، بلکن غٹ بلوچ آتے دہشتگرد گوندار۔ ببو داسہ نن پانہ کہ ریاست ریاست ءِ کہ دہشتگرد دیر ءِ، دہشت گرد نا کارندہ غاک ءُ، ای نما ایڑ اُٹ و نمے پاننگ خواوہ کہ تینا اُرا تیان پیشتمبو، نم ہرا وخت اسکان جون ارفورے، و ہرا وخت اسکان نن ودار کرون کہ دافک ننا بیگواہ بندغ تا جون تے ننے ایتر۔
ڈاکٹر ماہ رنگ بلوچ پارے کہ پامداری ئٹ اُربو نما نیام ئٹ نما لُمہ غاک، ایڑک تولوک ءُ ہرافتا دو تیٹ عکس آک ءُ ہرا اوفتا چناک افس، بلکن بلوچ آتا ءُ، بلوچ آتا چنا تا عکس آک ءُ، ہرا بیداد جاہ تیٹ بند ءُ و ریاست اوفتے بند کرینے۔ ببو نن اوفتا و شہید آتا وارثی ءِ کین۔ نن اسہ میڑھ ئسے نا دروشم ئٹ تربت آن اسلام آباد آ ہنان۔ ننے اولیکو دے آن سماء ئس کہ اسلام آباد ننتون انصاف کپرو۔ اسلام آباد ننا کماش نواب نوروز خان تون ہم انصاف کننگ کتو۔ اسلام آباد ننا 80 سالی کماش نواب اکبر خان بگٹی ءِ شہید کرے۔ دا ہمو اسلام آباد ءِ ہرا نما زالبول تا کاٹم تیان گُد آتے چکا، دافتے تینا اُست آتیان اسُل کشپیرے۔ بلوچ آک اگہ دا ہیت آتے نم اُست آن دریرے گڑا لُمہ و ایڑک نمے ہچبر بشخپرور۔ ننا انصاف داسہ نما دوٹی ءِ۔ داسہ انصاف کرورے یا آخہ۔ اگہ نمے انصاف کروئی ءِ گڑا بلوچ جہد ئتون اوار مبو۔ ننا جہد بقا نا جنگ ءِ، سرکاری سردار آک پارہ کہ نن ماہ رنگ تون ہیت کریسہ دا تولوک برانز ءِ ایسر کرینن، نم بائیدے لج کبو کہ نم گپ و تران نا ہیت کیرے، ہچو گپ و تران اس متو، ہرا بندغ آک بلوچ نا دتر نا زی آ سیاست کیرہ، نن اوفتے رد کینہ۔ داکان بیدس ہرا ننا جنز ئنا وسیلہ ئٹ لُمہ ایڑ تا پِن آ سیاست کننگ ءُ او تینا سیاست ءِ تینتون تخر، داسہ بلوچ راج بش مسنے ہرا تینا لُمہ، ایڑ، شہید و تینا ڈغار نا خواجہ ءِ۔