کنا ڈائری
نوشت: نوید احمد
دی بلوچستان پوسٹ
گڑاس سوج ءُ ہراتے عقل اُست ئنا لار آن مُر تخیسہ، خفتیٹی کرار ءُ توار اسیٹ پائک ”نی زندہ اُس“ داکان گڈ اسہ دریہو ئس کنا دامون ایمون تموک خیسن آ گلاب آتیان ہمو ذباد ءِ تا گوہک، مگہ دا دریہو چاہنداری ءِ؟ دیچا تا۔ ہمو ای کہ اِستو خاچاسٹ، خن پٹنگ آ، ای ہمو سلتنٹ۔ دا سوب! امرو سوب ئسے۔ ای امود اُٹ یا کنے کنا تغک مَٹ کرینو۔ گواچنی کا بندغ ءِ تدینی، خوائش و تغک مٹ کیرہ۔ ولے دافتیان ہرا اسٹ؟ لاتمائی ٹی زند اخس گچین ءِ، لاتمائی ٹی خوشی ہم اخس چُنک ءِ۔ اندا سوج بھازیکا مغز آتیا لگوک چُنکا چنکا خوائش و خوشی تے سگریٹ نا ہِس آنبار چنڈیک۔ پاننگ کن تو ”چاہنداری“ بھلو نعمت ئسے ولے دا خوڑتی ئٹ ہننگ آ بھلو ازیت ئسے۔ ولے زند ئنا چائنگ و مسخت ءِ گچین کننگ بھلو گڑتی ءُ۔ انداڑان چندی فلسفیک دا گمان کریسر کہ مرگ راست ئسے ولے دا زندہ مننگ آن کس ءِ تورپک۔ زند خوائش، تُغ، و خوشی تا نیام اٹ خن پٹنگ نا اسہ مسلسل سفر ئسے۔ دافتا نیام اٹ مسخت ءِ گچین کننگ کیرہ ولے بھاز آک اسل تپسہ تا۔ نن نیمہ ٹی تینا ڈائری آ دا لکھیسہ خلقی تا توار توار آن او تینا کوٹی آن پیشتما۔
پیشن خلقی تا بھلو مچی ئسے، بھاز انگا توار توار آن دا مُچی نا سوب ءِ پہہ مننگ سخت ئس۔ ولے پدا ہم او خف توننگ ءِ نوا سماء تمے۔ دا ہمو شار نا گلی کوچہ غاک خُفتن نا نماز آن پد ویران مریرہ۔ ولے اینو اوہن اف۔ دا مچی، دا کوک و پاہوڑ نا سوب گڑاس تو ارے۔ انداڑتون ماما سفر پائک: ”ننے دا خلق آن پین خلق ئسے آ انوئی مریک انتئے کہ پیر انگاک پارینو سفر نا تُو اٹ ہرا شار اٹ کس ئس کسک او شار آ بھلو ویل ئس بریک پیر انگا تا ہیت آک خل ئنا چِشخ مریرہ۔“ دا پاریسہ او تینا ہیت ءِ چُٹیفے۔ نَبل ہرادے خلق اونا زمینداری آن چائک، توار کرے کہ: ”شیف بُٹ ئنا ڈغار تیٹی، سنجد نا درخت آ، مُسہ دے ئنا ءِ بُومب ئس خنیوہ تولوک ءِ بس دا شار ئنا کنڈا ہریک۔“ او او پیر انگاک پارینو: ”بُومب ہرا خلق آ نظر تخا اوٹی نیستی بریک۔“ ”دانگان گلزار نا دن کہنگ سفر نا تو اٹ، و سنجد نا درخت آ بومب۔ ای تو پاوہ نن زوت زی ئنا شار اٹ ہندی مرین۔“ ماما سفر تینا پیہن آ ریش تو گوازی کریسہ پارے۔ انداڑتون خلقیک غٹ او کریر۔
اوڑکن دا غٹ عجیب ءُ گپ ئسر، ولے دا ہیت گواچن ءِ کہ زند تدینی، خوائش و تغ تا سفر ءِ۔ اندا سوج کریسہ پارے ”خیر دا اسہ تدینی ئس تو ارے۔“ مننگ کیک دا ہیت آک راست مریر، مننگ کیک دا غٹ دروغ مریر۔ ولے خلقی تیتون خلقی تا وڑ مروئی مریک۔
پنچ شمبے نا نن ءِ، خلق غٹ آ تینا اُرا تے اِلیسہ ءِ۔ زی ئنا شار والا تیتون ماما سفر گپ کرینے کہ ننے منہ وخت ئکن امو شار اٹ باہوٹ النگ کن البو۔ اسٹ اسٹ آ کُل آ شار ہجرت کرے۔ داسہ داڑے چُک ئس ہم چِڑپک۔ اندنو چُپی ئس تالان ءِ کہ پن ریچ آن تموک آ پن ئنا توار ہم بننگ مریک۔
او ہم خلقی تیتون، تینا اسٹ آ میراث؛ ڈائری، دوٹی ہجرت کرے۔
جمعہ نا نن ءِ، وخت و پاس خفتن نا نماز نا ءِ، او تینا ڈائری نا ارٹ میکو پنہ ءِ ملانے قلم دوٹی سوج کننگ ءِ، درو نا ہجرت و ماما سفر و نَبل نا گپ آک اونا چاہند آ اثر کرینو۔
بومب، سفر نا تُو و زوال!!! پین چندی سوج آک ودی مسر، ولے دا غُٹ آ خلق امہ یخین کرینے دا غٹ آ۔ مگہ دیہاڑ اٹ اندنو تدینی ئس مسنے ہراڑان دا خاہوت نا زند مٹ مسونے۔ مننگ کیک اندن مرے، پیر انگاک ہر تدینی ءِ چاہنگ نا سخت تخانو۔ داڑے زندہ مننگ کن زوال ءِ علامت آتیٹی پٹانو و زندہ مننگ نا خوائش اٹ دا علامت آتے خننگ تو گو ئس لگیک زندہ مننگ کن۔ ولے مگہ دافک مرگ ءِ گچین کننگ کپسہ، اگہ واقعی اندنو گپ ئسے بومب و انجیر نا گڑا پدا ہم مرگ آن نرنگ مفک! نا مسونے۔ بندغ نا جہد دنکہ زندہ مننگ نا ءِ، ہراڑان او قدرتی آفت آتے چاہنگ نا خوائش اٹ علامت آتے معنہ تسونے۔ دا غٹ چاہنداری انتئے یخین نا پلو اٹ پلویڑ مننگ ءِ۔
مُسٹمیکو پنہ غا ”زند“ لکھا و خالی الا تے بش مس۔