بلوچستان نا دریابی شار گوادر ئٹ پگہ مروکا بلوچ راجی مچی کن تیوہ بلوچستان آن کاروان تے گوادر نا نیمہ غا ہِننگ آن توننگا نا کوشست مننگ ءِ، تدوکا نن دزگیری تیان پد سہب ئنا سہار تون حکومت بنجائی کسر تیا کنٹینر سلیفِسہ بند کرے۔
بنجائی شار شال آن گوادر آ ہنوکا کاروان ءِ پاکستانی لشکر مستونگ نا ہند آ تورے۔ ہراتم کاروان ئٹ اوار مروکا بندغاک ہڑاند آتے سر کننگ نا کوشست کریر، پاکستانی لشکر مون پہ مون بس آتے آ سم کاری کرے ہرافتیٹ کیہی چُنا نیاڑی سوار اس۔
سم کاری ٹی کیہی بندغاک ٹپی مسر ہرافتیٹ سمیع اللہ، طالبعلم سریاب کوئٹہ، محمد جاوید، مستونگ، شبیر مینگل مغربی بائی پاس کوئٹہ، محمد آصف چاغی،ولی محمد چاغی، میا خان، کانک مستونگ،محمد زمان، کانک مستونگ، سراج شاکر، سریاب کوئٹہ، محمد فرحان کلی دیبا کوئٹہ، محمد عمر کلی دیبا کوئٹہ، مدثر سکنہ مستونگ (حالت نازک)، عبدالمطق، کانک مستونگ، داؤد کھیتران، بارکھان، برکت علی، مستونگ اوار ءُ۔
حوال تا رد ئٹ حکومتی ہڑاند آتا برخلاف کاروان ئٹ اوار بندغ آک مستونگ نا ہند آ تولوک برانز کننگ ءُ۔
مستونگ ئٹی کاروان نا بندغ آتیا سم کاری نا برخلاف کوئٹہ سریاب روڈ ءِ بند کرسا ہندی مخلوق برانز کننگ ءِ۔
اندن بلوچستان نا صنعتی شار حب آن حوال رسینگانے کہ بنجائی کسر سہب آن بند ءِ، راجی مچی ٹی اوار مننگ کن ہنوکا ہزار آ مسافر آک گھٹ مسنو ہرافتیٹ چُنا نیاڑی، پیر و ناجوڑ ءُ بندغ ارے۔
مکران ئٹی انٹرنیٹ سروس بند مننگ نا سوب آن حالیت نا بابت ئٹ حوال مونا بتنے واہم تربت ڈی بلوچ نا ہند آ مخلوق ریاستی ہڑاند آتا برخلاف برانز کننگ ءِ۔
گوادر آن رسینگوکا حوال تا رد ئٹ شار تیوہ فورسز آتا کنٹرول ئٹی ءِ و اُرا تیا چھاپہ برجاء ءِ۔