بلوچستان نا دریابی شار گوادر ئٹی اینو اڈ ہلوک بلوچ راجی مچی نا برخلاف حکومتی کریک ڈاؤن و مستونگ تدینی نا برخلاف برانز برجاء ءِ۔
مستونگ ہراڑے درو پاکستانی لشکر شال و ایلو علاقہ آتیان بروکا کاروان تیا مون پہ مون سم کاری کرسا کیہی برانز کروکا تے ٹپی کرے و پن کروک ہند آ کاروان ئٹ اوار بندغ آک بھلو کچ ئسیٹی مُچ مرسا تولوک برانز کننگ ءُ و شار ئٹی کاروباری بنجاہک بند ءُ۔
اندن نوشکی و دالبندین ئٹئ ہم تاجر برادری راجی مُچی ٹی اوار مروکا تتون اوڑدئی نا درشانی کرسا کاروباری بنجاہ تے بند کرینو۔
ایلو کنڈ آن بنجائی شار شال ئٹی سریاب نا ہند آ ہم مستونگ تدینی نا برخلاف استو آن برانز برجاء ءِ۔
خیال ئٹ مرے کہ پاکستانی لشکر نا مون پہ مون سم کاری آن 14 بندغ ٹپی مسنو ہرافتیٹی چھار ئنا حالیت بھاز خراب ءِ۔
حوال تا رد ئٹ بلوچستان نا گیشتر شار تیان پیشتموکا کاروانک ہڑاند آتے سر کرسا تربت ڈی بلوچ، تلار و بزی ٹاپ اسکان سر مسنو۔
اندن گوادر شار ئنا کنڈ آ ہنوکا کُل کسر تے پاکستانی لشکر بند کرینے۔