بلوچ نا سم تا مونا بننگ کیک ولے سلنگ کپک – ڈاکٹر ماہ رنگ

بلوچ یکجہتی کمیٹی نا پارہ غان راجی مُچی نا شہید آتا یات ئٹ اینو پنجگور ئٹی اسہ جلسہ اس اڈ تننگا ہراٹی ہزار آ بندغ آک اوار مسر و بلوچ شہید آتے دروت ندر کریر۔

جلسہ ئٹ ڈاکٹر ماہ رنگ، و صبغت اللہ، تون اوار ایلو راہشونک تران کریر اندن جلسہ نا ایسر ئٹ راجی سوغندی دیوان اڈ تننگا۔

ڈاکٹر ماہ رنگ بلوچ جلسہ ئٹ تران کریسہ پارے کہ بلوچ راج نشان تس کہ بلوچ نا سم تا مونا بننگ کیک ولے سلنگ کپک۔ ہرا بندغ آک پاریر کہ پاکستانی ریاست نا برخلاف بلوچ تحریک سرسہب مننگ کپک اوفک پاریر کہ کاٹم و خل ئنا جنگ مننگ کپک ای اوفتے پاننگ خواوہ کہ بلوچ دنو ہزار کاٹم ودی کرو و او کاٹمک دا خل ءِ پرغور، ننا ایمان ءِ دا خل ءِ نن بور بور کرون۔ بلوچ نا جیرت، جوزہ و دلیری ءِ لوز آک بیان کننگ کپسہ۔

او پارے کہ ریاست تدوکا اِرا ہفتہ غان گوادر ءِ پلویڑ و اودے ریڈ زون پِن کننگ کن تینا تیوہ غا طاغت ءِ کاریم ئٹ ایسنے۔ داڑان پد ہم نم نشان تسرے کہ گوادر ریاست کن ریڈ زون مننگ کیک ولے او ننا لمہ وطن ءِ۔ ہر ڈول ئنا ریاستی ظلم و تادی ءِ سگنگ آن پد ہم بلوچ راج دا پاش کرے کہ ننے ہچو طاغت اس گوادر آ و ننا وطن نا اسہ ہم بشخ ئسے آ ہننگ آن توننگ کپک۔ دا لپڑزہ مفروکا حوصلہ جہان آ پاش کرینے کہ بلوچ راج تینا لمہ وطن ئٹ ہر ڈول ئنا تادی و زنک ایسری ءِ چُٹفنگ نا لائخی تخک۔