کوئٹہ: تینا دوستی نا برام کروکا مسڑ ءِ حکومت بلوچستان خودکش اس نشان تس

بلوچستان حکومت تربت آن تعلقداری تخوک عدیلہ پنی ءُ مسڑ ئسے پریس کانفرنس کرفسہ اودے گمانی خودکش اس پاش کرے۔

بلوچستان حکومت نا ترجمان شاہد رند و بلوچستان اسمبلی نا باسک فرح عظیم شاہ کیچ آن تعلقداری تخوک عدیلہ پنی ءُ مسڑ اسیتون اوار پریس کانفرنس کرسہ اودے خودکش جلہو کار اس پاش کرینو۔

ایلو پارہ غان بلوچ صحافی کیّا بلوچ بلوچ لبریشن آرمی نا آپریشن ھیروف نا پارہ غا اشارہ کرسہ ایکس آ پوسٹ کرسہ پارے کہ گواچن آ جند ندر آک تو اسہ دے ٹی 11 ضلع ٹی جلہو کیرہ، اینو ہرا زالبول ءِ جند ندر جلہو کار ئس پاش کننگا، او گواچن ئٹ رُودبُن کیچ ئٹ تینا لمہ باوہ نا منشا نا برخلاف برام کریسس۔ مسڑ لمہ باوہ ءِ فون کرسہ پارے کہ او اُراغا پدی بفرو، و ولدا انت ئس ہم مس، او نما مون ئٹی ءُ۔

خیال مرے کہ درو پولیس نا پارہ غان تھرٹ الرٹ شینک کننگا ہراڑے دعوی کننگاسس کہ کوئٹہ ٹی اسہ زالبول خودکش جلہو کار ئس پترینگانے ہراٹی اینو پریس کانفرنس کروکا مسڑکو عدیلہ بلوچ نا پن تننگاسس۔

اینو پریس کانفرنس نا باروٹ کوئٹہ ٹی رہینگوک صحافی تا پاننگے کہ دا پریس کانفرنس ئٹ بیرہ منہ صحافی ءِ توار کننگانے۔

یاتی مرے کہ بلوچستان ئٹ داکان مست ہم دا وڑ ئنا زالبول آتے دزگیر کرسہ جند ندر جلہو کار آتا وڑ پیش کننگانے۔

داکان مست ضلع کیچ ئنا علاقہ ہوشاپ آن ہم اسہ زالبول ئسے دزگیر کننگا وختس کہ کوئٹہ غان ماھل پنی ءُ زالبول ئسے دزگیر کننگا ہرادے ترند السی توار توار آن گڈ یلہ کننگا۔