بلوچستان نا علاقہ نوشکی، دالبندین، چاغی و خاران ئٹ انٹرنیٹ سروس بند کننگا۔
حوال تروکا تا رد ئٹ 25 جنوری ہفتہ نا دے دالبندین ئٹ بلوچ یکجہتی کمیٹی نا پارہ غان اڈ ہلوک بلوچ زنک ایسری نا یاتگاری دے ئنا رد ئٹ مروکا جلسہ نا سوب آن ریاست نا کنڈ آن انٹرنیٹ ءِ بند کننگانے۔
خیال ئٹ مرے کہ دا جلسہ کن چاہنداری تننگ کن دائسکان ہرا علاقہ آتیٹ مہم چلفنگانے اوڑے انٹرنیٹ سروس بند و بی وائی سی نا سروک آتیا ایف آئی آر کننگانے۔
دالبندین تون اوار دا علاقہ آتیٹ انٹرنیٹ بند مننگ آن مخلوق ئٹ خلیس ودی مننگ ءِ کہ حکومت پرامن جلسہ ءِ توننگ کن تاغت کاریم ئٹ ہتنگ خواہک۔