پاکستانی لشکر نا دو آن پین مُسہ بلوچ دزگیری آن پد نادرست ہند آ دننگانو۔
حوال تا ردئٹ دریابی شار گوادر آن پاکستانی لشکر چھاپہ خلیسہ گوادر فقیر کالونی آن میران نا مار قاسم ءِ اونا اُرا غان اندن ڈور گوادر آن علی جان نا مار عارف ءِ بیدادی آن پد دزگیر کریسہ نادرست ہند آ درینے۔
حوالکار تا ردئٹ ہڑتوم آک خوانندہ ءُ، فورسز آتا دزگیری آن پد اوفک دائسکان مونا ہتنگتنو۔
ایلو پارہ غان پاکستان نا بنجاہی شار اسلام آباد آن حوال تا ردئٹ بین الاقوامی اسلامی یونیورسٹی اسلام آباد ئٹ قانود نا خوانندہ سجاد اسحاق ءِ درو بیگہ نا پنچ و نیم نا وخت آ 10 مرکز، اسلام آباد آن ریاستی ادارہ غاک زوراکی ئٹ دزگیر کریسہ بیگواہ کرینو۔
پن کروک ورنا ءِ داڑان مالو ہم خضدار آن زوراکی ئٹ بیگواہی نا گواچی کننگاسس واہم او یلہ مننگ آن پد اسہ وار پدا زوراکی ئٹ بیگواہی نا گواچی کننگانے۔