بلوچستان نا ضلع پنجگور و کراچی آن پاکستانی لشکر پین شش بلوچ ءِ دزگیر کریسہ نادرست ہند آ سر کرینے۔
شابیتی حوال آتا رد ئٹ تحصیل پروم، ضلع پنجگور آن پاکستانی لشکر پنچ بندغ، ہرافتیٹی عبدالغفار ولد ملنگ، حامد ولد داد محمد و مجید ولد رشید تون اوار پین اِرا بندغ اوار ءُ، دزگیر کریسہ زوراکی ئٹ بیگواہ کننگار۔ پن کروک بندغ آک پروم ئٹ مزوری کننگ نا سوب ہندی ئسر۔
داڑان بیدس کراچی نا علاقہ لیاری سرگوات آن پاکستانی لشکر رکشہ ڈرائیور شاہ زیب صمد ءِ ہم دزگیر کریسہ نادرست ہند آ سر کننگا۔
بیگواہ بندغ آتا خاہوت آک تینا بندغ تا یلہ کننگ نا خواست ءِ کرینو۔ یاتی مرے کہ برجاء سال بلوچستان ئٹ زوراکی ئٹ بیگواہی تیٹی پاش ءُ ودکی اس خننگ ئٹ بسونے، و ہڑدے نا بنداو آ پاکستانی لشکر نا دو آن زوراکی ئٹ بیگواہی تا پوسکنو کیس رپورٹ مریسہ ءِ۔