ہوشاپ ئٹ چھانڑدہ سالہ راہی عصا نا خون چنا تا بنداوی بندغی حق آتا ترند برخلافی ءِ – بی وائی سی

بلوچ یکجہتی کمیٹی میڈیا ءِ شینک کروک بیان ئٹ پارینے کہ محمد عصا نا چھانڑدہ سالہ مار و خوانندہ راہی عصا ءِ ریاستی مخ تفی ئٹ کاریم کروک آ ڈیتھ اسکواڈ نا کارندہ غاک ٹارگٹڈ جلہو ئٹ سم کاری کریسہ کسفینو۔

ہندی احوال کار آتا رد ئٹ راہی عصا ءِ ہوشاپ، کیچ نا بنجائی بازار ئٹ ٹک کننگا۔ خن خنوک شاہد آتا پاننگ ءِ کہ ملٹری انٹیلیجنس تو تفوک اسہ ڈیتھ اسکواڈ ئسے نا سلہہ بند بندغ آک چنک سن چنا آ سم کاری کریر، ہرا نا سوب آن چنا ہمو وخت مرگ ئنا گواچی مس۔ جلہو کروک آک سم کاری آن گڈ جاگہ غان دمدستی نرار۔

بی وائی سی پارے کہ راہی عصا اسہ خوانندہ اس ئس، و جہانی قانود نا رد ئٹ چناتے خاص وڑ ئٹ رکھ دوئی ءِ و اوفتے اسہ ہم دروشم اسیٹ بیدادی نا گواچی کننگ مفک۔ واہم دا ریاست ئٹی کس اس ہم رکھوک اف۔ اسہ چنا ئسے نا عدالت آن چَپ خون بندغی حق و جہانی قانود آتا ترند برخلافی ءِ، ہراٹی ‘کنونشن برائے حقوقِ طفل’ ہم اوار ءِ، ہرا چنا تا زند ئنا حق، رکھ و سلامتی نا ضمانت ءِ تیک۔

پین پارینے کہ دا تدینی آن گڈ علاقہ ئٹ ترند خلیس تالان مسونے۔ ہندی بندغ آتا رد ئٹ دا خون بلوچستان ئٹ برجا ہندا لڑ ئنا درشانی ءِ کیک ہراڑے ریاستی مخ تفی ئٹ سلہہ بند ٹولیک تیوہ موکل تون اوار کاریم کریسہ ءُ۔ جہانی بندغی حق آتا تنظیم آتے گرج ءِ کہ او دا تدینی آ دمدستی، صاف و غیر جانبدار پٹ و پول نا خواست ءِ کے، ذمہ وار آتا نشاندہی و اوفتا برخلاف قانودی کاروائی ءِ یخینی جوڑ کے، و بلوچستان ئٹ ڈیتھ اسکواڈ آتا کاروائی تے ایسر کننگ کہ زور شاغے۔