دزگیری ئٹ خون ئنا سیاست – ٹی بی پی سرگپ
بلوچستان ئٹ ہراتم ہم آجوئی کن کاریم کروک سلہہ بند ادارہ غاک پاکستانی لشکر ءِ نسخان تا گواچی کیرہ، گڑا پاکستان نا سکیورٹی ادارہ غاک ہر وخت آنبار مالو آن زوراکی ئٹ بیگواہ بندغ آتے گمانی وڑئٹ بیدس عدالت کسفسہ اوفتے سلہہ بند جھڑپ آتیٹ کسفنگ نا دعویٰ کیرہ۔ بلوچ لبریشن آرمی نا آپریشن ہیروف ئٹ نسخان ارفنگ آن پد بلوچستان و سندھ پولیس کراچی، بارکھان، پنجگور و کوئٹہ ئٹ بیست و ہفت (27) زوراکی ئٹ بیگواہ بندغ آتے کسفسہ اوفتے سلہہ بند مزاحمت کار گوندار، حالانکہ اوفتیان حمدان بلوچ ءِ مالو آن سندھ ہائی کورٹ ئٹ مونا ہتنگاسس و ہرازدے اودے کسسفنگا، ہموزدے عدالت ئٹ اونا پیشی ئس۔
بلوچستان ئٹ اِرا دہائی آن بلوچ ورنا تے بیدس عدالت کسفنگسہ ءُ و داسہ ریاست اشتماعی سزا نا وڑئٹ اوفتا خاہوت آتے ہم تادی نا گواچی کننگ ءِ۔ حمدان بلوچ سندھ پولیس نا دزگیر ئٹ ئس و اِرا وار اودے سندھ ہائی کورٹ ئٹ مونا ہتنگا۔ ہراڑان پد ہم اودے نہ بیرہ سلہہ بند جھڑپ ئٹ کسفنگ نا دعویٰ مننگسہ ءِ بلکہ اونا خاہوت ءِ چرجوئی ئٹ بھیم نا گواچی کریسہ اوفتے چپ کرفنگ نا کوشست ہم مننگسہ ءُ۔
پاکستانی لشکر و دا ملک ئنا مقتدر ادارہ تا بلوچ ورنا تے سوگوی ئٹ کسفنگ نا عمل بھلو وخت ئسے آن برجاء ءِ۔ فروری نا توہ ئٹی زوراکی ئٹ بیگواہ ءُ بیست و ہفت بندغ نا خون، بلوچستان ئٹ دا وڑ ئنا اولیکو تدینی اف بلکہ زوراکی ئٹ بیگواہ بندغ آتے بیدس عدالت کسفنگ نا لڑ اسہ دہائی ئسے آن زیات وخت آن چرجوئی ئٹ برجاء ءِ۔ بلوچستان ئٹ میڈیا غا رکھ و ریاستی سختی تا سوب آن بیرہ گڑاس تدینی جہان نا مونا بریرہ اندن دا وخت بلوچستان اسہ بھلو بندغی نیستی ئسے نا گواچی ءِ۔
پاکستان نا مقتدر طاغت آک تکرہ کہ زوراکی نا بیگواہی، ریاستی تادی، اشتماعی سزا و دزگیر ئٹ خون تیان اوفک بلوچ انسرجنسی ءِ ایسر کننگ ءُ، واہم بلوچستان نا معروضی گواچن تیان پاش ءِ کہ دا ریاستی پالیسیک بلوچ و پاکستان نا سیالی ءِ گیشتر نزور کننگ ءُ۔ حمدان بلوچ نا لمہ و ریاستی تادی نا گواچی لمہ تا اشتماعی ماتن بلوچستان ئٹ ریاست نا روتہ غاتے نزور کننگ ءِ و دا سوچ بلوچ راج ئنا اشتماعی یادداشت نا بشخ جوڑ مننگ ءِ کہ پاکستان ئٹ بلوچ راج نا بقا ممکن اف۔
