مستونگ نا راجدوست پیر کماش ملک فیض محمد دہوار نا سیاسی و سماجی آ مسڑ ڈاکٹر عائشہ فیض شال ئٹ اسہ پریس کانفرنس اسیٹی پارے کہ بلوچستان نا جنگول آک دہشت گرد افس بلوچستان نا آزاتی نا سپاہی کو و گوریلہ جنگول آکو۔ دا تینا راج ئنا آزاتی نا جنگ ءِ کننگ ئٹی ءُ۔

دا ہیت ءِ او دوشمبے نا دے شال پریس کلب ئٹی پریس کانفرنس کریسہ پارے۔ ڈاکٹر عائشہ فیض بلوچستان نا مسکوہی مزاحمتی جہد و بلوچ نیاڑی تا کرد ئنا بابت ئٹ مثیل تریسہ پارے کہ ہفتاد نا دہ یک ئٹی بلوچ جنگول آتا مہمانداری ءِ بلوچ نیاڑیک تینا ارا تیٹی کریرہ۔

او پارے کہ سرمچار آک ہراتم بھلو وخت ئسے کن مش تیٹی مسرہ گرا نیاڑیک تینا اراتیٹی اوفتا مہمانداری ءِ کریرہ انتئے کہ مش تیٹی اوفتا کُن خور نا بے آسراتیک ئسر۔ او پارے کہ اگہ اسہ سرمچار اس ناجوڑ مسونے گڑا ڈاکٹر آک تینا اراتیٹی خوائفسہ اوفتے دارو درمان ہم کرینو۔

ڈاکٹر عائشہ فیض پارے کہ دا غیرتی آ بلوچ آتا کسہ غاک ءُ۔ او پارے کہ بلوچ آک ریاست کوزہ مروک آ تینا ریاست قلات ءِ پدی خوارہ۔ انتئے کہ اونا رد ئٹ قلات نا زوراکی ئٹ اوار کننگ نا وخت بلوچ آتا منشا متنے۔

او پارے کہ ہندن کہ قلات زوراکی ئٹ ننا منشا نا برخلاف پلنگانے، داسا ننے پدی ہلوئی ءِ تا و ہر حالیت ئٹ ننے پدی بکار ءِ انتئے کہ دا ننا گلزمین ءِ۔

او پارے کہ بلوچ راج و بلوچ نیاڑیک جیرت والا ءُ بلکن بلوچ نیاڑیک ہفتاد نا دہ یک ئٹی آزاتی نا جنگ ئٹی بشخ ہلنگ بنا کرینو۔ او پارے کہ مزاحمت کار آتا خذمت کننگ ہم بلوچ نیاڑی تا جوزہ جیرت و بلوچستان نا آزاتی نا جنگ ئنا بشخ اس مننگ نا درشانی مسونے۔

ڈاکٹر عائشہ فیض پارے کہ کنا باوہ تینا گڈیکو دے تیٹ پارے کہ چڑت خلپبو کہ ڈھکوکائی جوڑ مروک آ لشکر ننا ڈیہہ ءِ آجو کیک۔

او پارے کہ مرک ئنا وخت آ لیپ ئٹی مننگ آن پد ہم او قلات نا آجوئی و ڈیہہ ئنا فکر ئٹی مسونے۔

اونا رد ئٹ قلات نا مخلوق ءِ ہمپفنگانے و زوراکی و ریفنگ ئٹ اوفتیان اوفتا ڈغار ءِ پلنگانے۔ ہندا سوب آن او پدی مزاحمتی جدوجہد نا ہیت ءِ کیرہ۔

ڈاکٹر عائشہ فیض پارے کہ بشیر زیب و ڈاکٹر اللہ نزر آزاتی نا جنگ ءِ کننگ ءُ۔ دا بلوچستان نا جنگول سپاہی، دلیر آ جنگول و ریپبلک آف بلوچستان نا لشکر و گوریلہ جنگول آک ءُ۔ دا ننا دلیر آ ایلمک ءُ کہ تینا ڈیہہ ئنا جنگ ءِ کریسہ ءُ۔

او پارے کہ جنگول آتے دہشتگرد پاننگ جوان اف۔ جنگ آتیٹی ہڑتوما پارہ غان لشکر آک اسہ ایلو تون جنگ کیرہ۔ اگہ اسٹ ئسے دہشت گرد پاننگک تو ایلو کنڈ ئنا تے ہم دہشت گرد پاننگے۔

او پارے کہ مزاحمتی تنظیم آک پڑو کریسہ واپری کروک و ایلو مخلوق ءِ پارینو کہ داڑے اوفتا جنگ مننگ ئٹی ءِ۔ اونا رد ئٹ واپار، واپاری کروک، پنجاب نا لس اولس مزور آتے پاننگانے کہ دانگ بفس کہ داڑے جنگ برجا ءِ۔

ڈاکٹر عائشہ فیض سرکاری وزیر داخلہ نا کاروان آ جلہو ءِ نیمون جوڑ کریسہ باغ آتے بن تننگ و مخلوق ءِ ہمپفنگ نا ہیت ءِ رد پارے۔ او پارے کہ دا وڑ ئنا جنجال آتیان مخلوق نا ویل آج گیشتر مرور و ریاست نا برخلاف نفرت ودو۔

او پارے کہ اگہ کھڈکوچہ نا مخلوق ءِ ہمپفنگا و اوفتا باغ آک ہشفنگار گڑا ہمو وخت نریمہ نیاڑیک مزاحمت کننگ آ بےوس مرور ہرانا زمواری ریاست نا زی آ مرو۔ او پارے کہ مخلوق تینا خلق و کوچہ تے اسل یلہ کپک و تینا باغ آتے ہشنگ نا ہچبر موکل تفک۔

ڈاکٹر عائشہ فیض پارے کہ بلوچستان نا جہد اینو نا اف بلکن بھلو وخت ئسے تون گنڈوک ءِ۔ او پارے کہ ریاست قلات نا زوراکی ئٹ اواری آن گڈ مزاحمت برجا ءِ

یات سلے کہ ملک فیض محمد یوسفزئی (دہوار) بلوچستان نا بنائی سیاسی و راجی تحریک آتا گچین آ رہشون آتیتون اوار مسونے۔ او میر عبدالعزیز کرد، میر یوسف عزیز مگسی و ایلو بلوچ رہشون آتا سنگتی ٹی انجمن اتحاد بلوچاں نا سیاسی جدوجہد ئٹی اوار مسونے۔ ہندا سوب آن بلوچستان نا سیاسی پڑ آ سیاسی حق آتیکن جہد کرینے۔ داکان پد قلات اسٹیٹ نیشنل پارٹی نا سیاسی کاریم تیٹی ہم اوار مسونے و بلوچ سیاسی جہد ءِ سوگو کننگ کن تینا گچینو کڑد اس سر تسونے۔

بلوچستان نا ضلع دکی نا تحصیل لونی نا علاقہ کلی بختیار خان ئٹی اسہ لاری ئسے دوئٹ کڈ جوڑ مروک اسہ بمب ئسے ئٹ تخ کننگا، ہراٹی مسہ ایلم مرک ئنا گواچی مسر و اسٹ اس ٹپی مس۔

دکی نا ایس پی منصور بزدار نا رد ئٹ تراک ہمو وخت مس کہ زیمی مروک آ بندغ آک تینا لاری ٹی ندی آن گدرینگنگ ئسرہ۔ او پارے کہ تراک ئٹی مسہ ایلم جاگہ غئے کسکر و اسہ بندغ اس ٹپی مس۔

ایس پی نا رد ئٹ کہوک آتا چاہنداری سلطان نا مار رحمت اللہ، دورانی و نعمت اللہ نا پن ئٹ مسونے، و ٹپی آنا چاہنداری مولوی نیک محمد نا مار عتیق اللہ نا پن ئٹ مسونے۔

پولیس نا رد ئٹ زیمی مروک آک تینا لاری ٹی کشت و کشاری کاریم ئسے ٹی ہننگ ئسرہ کہ کسر ئٹ تراک اس مس۔ تدینی نا حوال رسینگنگ تون پولیس و ایلو ادارہ غاتا کارندہ غاک جاگہ غئے سر مسر و کہوک و ٹپی آتے ہسپتال آ سر کریر۔

ایس پی منصور بزدار ن رد ئٹ تدینی آن پد علاقہ ءِ گڑگھیس کریسہ پٹ پول کننگ بنس کننگا، تراک نا بابت ئٹ پٹ پول برجا ءِ۔

پولیس سروک آتا پاننگ ءِ کہ علاقہ ٹی سیکیورٹی نا بابت آک پین سوگؤ کننگانو و تدینی آن پد کل گڑگھیس آتا جاچ ہلنگسہ ہن۔

بلوچستان نا متکن آ ساز و زیمل نڑسر ءِ یونیسکو نا وختی آ آثار قدیمہ نا لڑ ئٹ اوار کننگا۔

یات سلے کہ بلوچستان نا چار جاگہ غاک مہالو آن یونیسکو نا وختی ہیری ٹیج لڑ ئٹ اوار ءُ۔

آثار قدیمہ نا محکمہ نا سروک آتا رد ئٹ بلوچستان نا متکن آ باگل نڑسر ءِ یونیسکو تینا وختی آ آثار قدیمہ نا لڑ ئٹ اوار کرینے۔

بلوچستان نا بے مٹ آ خلقی آ باگل دود و رسمی آ روایت آک ہراکہ کیہی پدریچ آتیان سینہ بہ سینہ بریسہ کرینو و بلوچستان نا تہزیبی پدریچ نا چیدہ غاک ءُ۔

محکمہ آثار قدیمہ نا سروک آتا رد ئٹ بلوچستان نا متکن و دیہاڑی آ جاگہ مہرگڑھ، کاریز آک، ہنگول لینڈ اسکیپ مہالو آن یونیسکو نا وختی ہیری ٹیج لڑ ئٹی اریر و داسا دا باگل آن پد دافتا کچ پنچ مسک۔

یات سلے کہ نڑسر بلوچستان نا کوہ سلیمان و ڈیرہ جات ریجن ئٹ گیشتر پاننگک و منا دے مہالو یورپ ئٹ نڑسر ءِ حیدر علی بلوچ اسہ جہانی پڑ آ ہڈ ہلوک دیوان ئسے ٹی پارسہ پنی کرے۔ ہراکان پد نڑسر ءِ یونیسکو تینا وختی آثار قدیمہ تا لڑ ئٹ اوار کرے۔ چاہندار آک بلوچ رسم و دود آتا رکھ اکن دا عمل ءِ گچینو گام اس پاریر۔

ہراتم نن اسمبلی تیٹ ہنان او وخت ننے ہچو تجربہ اس الو۔ ہندا وڑ ہراتم خیر جان مش تیا ہنا گڑا اودے ہم اسل تجربہ الو ولے اینو ڈاکٹر اللہ نذر و بشیر زیب مش تیٹی ءُ و ننے آن زیات جوان گچین وڑٹ کاریم کننگو۔

دا خیال آتا درشانی ءِ کریسہ بلوچ اسٹوڈنٹس آرگنائزیشن نا مسکوہی چیئرمین وحید بلوچ، شمس الدین شمس تون اسہ پوڈ کاسٹ اسیٹ کرے۔ بی ایس او نا مسکوہی چیئرمین بی ایس او نا پارلیمانی سیاست و حق خودرادیت و حق مختاری نا وڑ انگا ٹِک آتے اوار کننگ نا رد ئٹ ہم تران کرے۔

او پارے کہ ہر وڑ ئٹ جہد کننگ نا پن ئٹ ہر گڑا کننگا ولے او وخت ننے نئے پارلیمانی سیاست نا تجربہ اسک و نئے کہ مش تیٹی جہد کننگ نا۔

وحید بلوچ پارے کہ اینو بی ایس او ءِ تجربہ مسونے۔ ہرا گڑا ءِ نن کننگ کتئون اینو بشیر زیب و اللہ نذر کننگ ئٹی ءُ تا و اوفک ننا روایتی سیاسیدان تیان گیشتر جوان وڑٹ کننگ ءُ۔ ایلو پارہ غان پاریسہ ئسرہ کہ نن پارلیمنٹ ءِ جہد ئنا خاطر آن بکار کننگن ہرا کہ اینو زوال مس ہنا۔ داٹی داسا ہچو ہیت اس سلتئو کہ ای پاؤ کہ پارلیمنٹ ننا راجی تحریک و سیاست نا اسہ دروشم اس مننگ کیک ۔

وحید بلوچ بی ایس او نا سیاست، اونا پننگ نا سوب آتیتون اوار تینا سیاسی سفر نا بابت ئٹ ہم کڑمبی ئٹ ہیت کرے۔

بلوچستان نا ضلع مستونگ نا علاقہ کھڈکوچہ ٹی پاکستانی لشکر نا کاروان ءِ جلہو ئسےٹی ٹک کننگانے۔ تدینی کھڈکوچہ نا علاقہ گرو ٹی مسونے۔

گرو نا ہند آ کاروان نا زی آ جلہو ہندنو وخت ئسے ٹی مسک کہ کھڈکوچہ و داپار ایپار نا علاقہ تیٹ کیہی ہفتہ غان حالیت آک اسہ کش ئٹ خراب ءُ۔

داکان مہالو ۱۴ اگست آ بلوچستان نا وزیر ڈاخلہ ضیاءاللہ لانگو نا کاروان آ ہم کھڈکوچہ ٹی سلہہ بندآک ٹک کریسر۔ وزیر ڈاخلہ جلہو ئٹ بچا ولے کاروان ئٹ ساڑی پولیس کارندہ تیتون اوار شش بندغ ٹپی مسوسر۔

داکان مہالو ہندا تو ئنا بیست و دو اگست آ کھڈکوچہ ٹی پاکستانی لشکر نا کاروان ءِ ہم اسہ بھلو جلہو ئسے ٹی ٹک کننگاسس ہراٹی اسہ بکتر بند لاری اس پورہ بھس مسس و کیہی کارندہ غاکسکسر و ٹپی مسوسر۔

کھڈکوچہ مستونگ ضلع نا اسہ بھاز ارزشت تخوکو علاقہ ئسے و کوئٹہ کراچی کسر نا خڑک آ ہندی مننگ نا سوب دا سیکیورٹی نا حالیت آک بلوچستان نا ایلو صوبہ تیتون ہن و بر ءِ ہم زیمی کیرہ۔

دا کسر نا زی آ پاکستانی لشکر و ایلو لاری تے ٹک کننگ نا تدینیک مست ہم مون آ بسنو۔ ساڑی وخت نا جلہو آک دا کسر نا زی آ سکیورٹی نا خلیس ءِ پین ودیفینو۔ داسا نا جلہو آنپد کسر ءِ داسا کن بند کننگا و علاقہ ٹی سیکیورٹی تے ودفنگانے۔

کھڈکوچہ ٹی ہندا منا ہفتہ ناتدینی تے ارنگے گڑا علاقہ ٹی پاکستانی لشکر نا کاروان و حکومتی بندغ آتیا جتا جتاؤ وڑ ئنا جلہو آک مسنو۔

ایلو پارہ غان استو ننکان پاکستانی لشکر نا پارہ غان ناگمان مارٹر گولہ خلنگ نا تدینی ہم مون آ بسوسس ہراٹی خراس و ہین سہدار آتا ٹپی مننگ نا حوال ارے۔

وسیلہ تا رد ئٹ استو ناگمان نادرست ءُ کنڈ ئسے آن مارٹر گولہ خلنگا ، مخلوق ئٹ خلیس اس تالان مس۔

یات سلے کہ کھڈکوچہ و سوراب ئٹ داکان مست ہم لس آباتی تے پاکستانی لشکر نا پارہ غان ٹک کننگ نا تدینیک مون آ بسوسر۔

بلوچستان نا ضلع چاغئے و مستونگ ئٹی سلہہ بند بندغ آتا پارہ غان کسر تا زی آ ناکہ بندی کننگانے، ہندا وخت آ ہنوک بروک آ لاری تا پٹ پول ہم برجا ئسک۔

استو چاغئے دالبندین ئٹی چہتر نا بازار ئٹی سلہہ بند بندغ آک چیک پوائنٹ جوڑ کریسہ اسنیپ چیکنگ کریر، علاقائی وسیلہ تا رد ئٹ سلہہ بند بندغ آک کسر نا زی آ چار گھنٹہ غان بڑزا چیکنگ کریسہ کریر۔

داکان بیدس درو شام وخت آ مستونگ نا علاقہ دشت، پنگو ٹی ہم سلہہ بند بندغ آک بنجاہی کسر آ چیک پوائنٹ جوڑ کریسہ اسنیپ چیکنگ ءِ برجا تخار۔

سروک آک دا بابت ئٹ دائسکان ہچو شابیت حوال اس تتنو۔

بلوچستان نا علاقہ تربت ئٹی نادرست آ سلہہ بند بندغ آک پاکستانی لشکر نا اسہ کاروان ئسے ٹک کرینو۔

وسیلہ تا رد ئٹ لشکر نا چار لاری تا کاروان ءِ تربت نا علاقہ حیرآباد ئٹی جلہو ئٹ ٹک کننگا، جلہو آن پد پاکستانی لشکر نا منا پین لاری ہندا جاگہ غئے رسیفیر، ایلو پارہ غان علاقہ ٹی ہیلی تے بال کننگ آ ہم خننگانے۔

وسیلہ غاک جلہو ئٹی پاکستانی لشکر نا جانی نسخان آتا ہم حوال تسونو، واہم نسخان نا ترندی و کچ ئنا بابت دائسکان امنائی متنے۔

تدینی نا حوالہ ٹی سروک آتا پک ءُ تران مون آ بتنے و جلہو نا زمواری ءِ ہم دائسکان کسس ارفتنے۔

بلوچستان نا ضلع چاغئے ٹی سلہہ بند بندغ آک ریسٹ ہاؤس ءِ خاخر تسر و ایکان گیس پلانٹ آ سلہہ بند چھاپہ خلیسہ سلہہ تے دوئی کریر۔

استو دالبندین ئٹی پنجا و یک کلو میٹر دے ٹک ئٹ چہتر نا علاقہ ٹی سلہہ بند بندغ آک ریسٹ ہاؤس آ چھاپہ خلیسہ ہشار تا۔

پولیس نا رد ئٹ مول انگا سلہہ بند بندغ آک ریسٹ ہاؤس ئٹی پٹرول چٹ تریسہ خاخر لگفیر، ہشنگ نا دا تدینی ننکان سئے بجہ نا وخت آ مس۔ پولیس نا رد ئٹ ریسٹ ہاؤس نا ہشنگ ئٹی ہچو بندغ اس کستؤ و ٹپی متؤ۔

ایکان چہتر گیس پلانٹ نا زی آ سلہہ بند بندغ آک چھاپہ خلیسہ پرائیویٹ گاٹ آتے دزگیر کریر و اوفتا سلہہ تے ہم زفت کریر، واہم گاٹ آتے پدی یلہ کننگا۔