بلوچستان نا دریابی شار گوادر تون اوار تربت ٹی سم کاری آن اِرا جتاء تدینی تیٹ پولیس کارندہ بیران، پنچ پیشن نا ہندی ٹپی مسونو ۔

نا درست سلہہ بند بندغ آک سید ہاشمی ایوینیو آ مروک بلال مسجد نا ہند پنجاب نا ہندی ئسے نا رہینگوک کوارٹر ءِ چغلی بمب ئٹ ٹک کننگا، و سم کاری کریسہ ہند آن نرار ۔

سم کاری نا سوب آن پنجاب نا مسہ رہینگوک ٹپی مسر، ہرافتے دمدستی وڑ ئٹ جی ڈی اے ہسپتال آ دننگانے ۔

ذرائع نا ردئٹ جلہو کروک آتان گڈ پولیس و جلہو کروک آتا نیام ئٹ سم کاری مس، ہرانا سوب ٹی اسہ پولیس کارندہ ئس بھاز ٹپی مس، واہم او ٹپی مننگ آن دراخ متئو اندن جلہو کروک ہند آ کسک۔

تدینی آن گڈ فورسز کارندہ غاک علاقہ ءِ گھیرہ کریسہ سرچ آپریشن بناء کرینو ، اندن تدینی نا گیشتر سر و سوج برجاء ءِ ۔

اندا وخت تربت پولیس نا ردئٹ سنٹر جیل نا خڑک نائی نا دکان ٹی اسہ موٹر سائیکل آ اِرا نا درست مروک آک سم کاری کریسہ سندھ بفین آن تعلق تخوک اِرا ورنا ءِ ٹپی کریر ۔ اوفتا چاہنداری محمد حسین ولد محمد و عبدالکریم ولد احمد نا پن آن مسونے ۔

گیشتر سر و سوج پولیس کننگ ءِ ۔

بلوچستان ئٹ پاکستانی لشکر نا اسہ پین دروغ نا مونتس اس، مُسہ بندغ دزگیر ئٹ کسفنگار۔

ٹیچنگ اسپتال تربت نا بست و بند نا ردئٹ اسپتال نا مردہ خانہ ئٹ مُسہ بندغ نا جونک ہتنگانو۔

ہندی حوالکار تا ردئٹ ٹیچنگ اسپتال ئٹی ہتنگوک جونک ہوشاپ ئٹ دروغ نا مونتس ئٹ خلنگوک آتا ءُ۔

دائسکان پن کروک جون تیان اِرٹ نا چاہنداری مسنے ہرا مالو آن زوراکی ئٹ بیگواہ ئسر۔ ہرافتیٹ عبدالواحد نا مار عمران ہند دشتی بازار ہرا 3 اپریل 2025 آ دشتی بازار آن بیگواہ کننگاسس، مولا داد نا مار حامد ہند آپسر ءِ 14 اپریل 2025 آ آپسر آن بیگواہ کننگاسس پن کروک بندغ آتے پاکستانی لشکر دزگیر کسفسہ مونتس نا دعویٰ کرینے۔

ایلو پارہ غان استو ضلع پنجگور ئٹ پاکستانی لشکر نا پارہ غان گاڑی آ سم کاری آن تاپلو زامران نا ہندی لال جان الٰہی بخش پنی ءُ بندغ اس کسکنے۔

خاہوت نا ردئٹ فورسز آک ہنوکا گاڑی آ سم کاری کریر ہرانا سوب آن لعل جان کسک۔ اودے اینو تربت ئٹ گڈی ہند کننگانے۔

بلوچستان نا ضلع پنجگور ئٹ سلہہ بند گل بلوچ لبریشن آرمی نا پاکستانی لشکر نا قافلہ غا جلہو نا سوب ود و کم سینزدہ کارندہ مرگ ئنا گواچی مسنو۔

دا تدینی استو پنجگور نا علاقہ بونستان مجبور آباد آن خڑک ہمو وخت مس ہراتم بی ایل اے نا پارہ غان کسر تے تفنگ برجاء ئس۔

ہندی حوال تا رد ئٹ بی ایل اے نا سرمچار آک قافلہ غا سنگر ہلیسہ جلہو کریر، ہراٹی مسہ فوجی گاڑی ٹِک مسر، وختس کہ اسہ گاڑی اسیٹی خاخر لگا۔

حوال تا رد ئٹ جلہو ئٹ پاکستانی لشکر ءِ بھلو کچ اسیٹی نسخان ارفوئی تمانے، واہم حکومتی تلہ غا دائسکان دا تدینی نا پک یا ہچو پاش ءُ بیان ئس مونا بتنے۔

بی ایل اے اینو سہب ئنا اسہ گونڈ ءُ بیان ئس شینگ کرسہ پارینے کہ بلوچستان نا 39 جتاء ہند آتیا جلہو آتا ذمہ واری تے ارفنہ، دا جلہوک دائسکان برجاء ءُ۔

ترجمان پارے کہ دا کاروائی تیٹ تھانہ غاتیا قوضہ، بھلا کسر تے تفنگ، مخبر آتا دزگیری، قوضہ گیر پاکستانی لشکر آ جلہو، و مڈی تا لٹ و پل ئٹ آختہ قافلہ غاتیا جلہوک اوار ءُ۔

بلوچ لبریشن آرمی نا ترجمان جیئند بلوچ بیان ئس شینگ کرسہ پارینے کہ بلوچستان نا 39 جتاء ہند آتیا جلہو آتا ذمہ واری ءِ ارفنہ۔ دا جلہوک دائسکان برجاء ءُ۔

ترجمان پارے کہ دا کاروائی تیٹ تھانہ غاتیا قوضہ، اہم انگا کسر تیا ناکہ بندی، مخبر آتا دزگیری، قوضہ گیر پاکستانی لشکر آ جلہو، و مڈی تا لٹ و پل ئٹ آختہ قافلہ غاتیا جلہوک اوار ءُ۔

جیئند بلوچ پارے کہ دا جلہو تا شابیت حوال زوت میڈیا غا شینگ کننگو۔

بلوچستان نا ضلع کیچ ئٹ لشکر کشی ٹی اختہ پاکستانی فورسز ءِ سلہہ بندغ بندغ آک جلہو ٹی ٹک کرینو ۔

رسینگوک احوال آتا ردئٹ تمپ ٹی پاکستانی لشکر نا کارندہ غاک درو آن لشکر کشی ٹی اختہ ءُ ۔ علاقہ ٹی کیہی گاڑی تا ٹولی تون اوار پند آ ہنوک کارندہ آتا ہِن و بر خَننگ ئٹ بسونے ۔

لشکر کشی ٹی اختہ کارندہ وختی آن سنگر ہلوک سلہہ بند بندغ آک کوھاڑ نا علاقہ ٹی ٹِک کرینو ۔ ہرانا سوب آن کارندہ آتے جانی نسخان آتون مون تروئی تمانے ۔

جلہو آن گڈ علاقہ ٹی ایمبولنس آتا ہن و بر خَننگ ئٹ بسونے واہم کوالخواک دائسکان دا بابت ئٹ ہچو شابیتی احوال ئس فراوان کتنو اندن علاقہ ٹی فورسز نا پارہ غان چرجوئی تون مارٹر گولہ خلنگسہ ءِ۔

بلوچستان ٹی پاکستانی لشکر آ جلہو ٹی تُرندی خَننگ ئٹ بننگ ءِ ۔ استو دارالحکومت کوئٹہ ٹی فرنٹیئر کور ہیڈ کوارٹر تون اوار چار ہند آتیا پد مہ پد فورسز چوکی و کیمپ تے سلہہ بند جلہو تیٹ ٹک کننگاسس ۔

بلوچستان نا ضلع کیچ نا علاقہ زامران ٹی نا درست سلہہ بند بندغ آک پاکستانی لشکر نا پوسٹ آ جلہو کرینو ۔

جلہو زامران نا علاقہ کٹگان ٹی کننگا ، ہراڑے سلہہ بند بندغ آک بھلا سلہہ تیٹ فورسز نا چوکی تے ٹک کریر ۔

جلہو نا وخت علاقہ ٹی زیات سم کاری مس اندن منہ تراک آتا توار ہم بِننگا ۔ جلہو کروک آک تدینی آن گڈ نرنگ ئٹ سر سہب مسر ۔

دائسکان کوالخواک ہچو جانی نسخان آتا پَک کتنو، واہم ذرائع نا پاننگ ءِ کہ فورسز ءِ نسخان آتون مون تروئی تمانے ۔

یات ئٹ مرے درو زامران ٹی اِرا جتاء ہند آتیا پاکستانی فورسز نا بمب ڈسپوزل اسکواڈ و گِڑا سر کروک گاڑی ءِ بمب تراک آتیٹ ٹک کننگاسس ۔

دا جلہو تا زمہ واری ءِ دائسکان کس ئس ارفتنے ۔

استو انڈیا نا پارہ غان پاکستان و اونا بند و بستی کشمیر ئٹ جلہو آتیٹ و اونا ورندی ٹی پاکستانی لشکر نا کاروائی آن گڈ اینو سہب نا انڈیا و پاکستان نا اسٹاک مارکیٹ آتیٹ کاروبار نا بنا منفی ڈول ئٹ مس۔

پاکستان اسٹاک ایکسچینج ئٹ 6560 پوائنٹس نا شیفی آن گڈ انڈیکس 107007 پوائنٹ اسکان سر مس۔

ایلو پارہ غان حوال تروک ادارہ روئٹرز نا رد ئٹ انڈیا نا نفٹی 50 انڈیکس 0.6 در سد شیفی آن گڈ 24,233.3 پوائنٹس وختس کہ بی ایس سی سینسیکس ۔86 در سد شیفی آن گڈ 79,948 پوائنٹس آ سر مس۔

کاروبار نا وخت مارکیٹ بہا نا زور ئنا گواچی خننگا۔

سٹاک مارکیٹ تجزیہ کار آک پاکستان آ انڈیا نا پارہ غان جلہو آتے اسٹاک مارکیٹ ئٹ شیفی نا سوب گوندرہ۔

اینو سہب نا ہراتم پاکستان اسٹاک ایکسیچنج ئٹ کاروبار نا بنا مس گڑا سرمایہ کار آتا پارہ غان ہلہلئی ٹی حصص بہا کننگا۔

مارکیٹ تجزیہ کار جبران سرفراز بی بی سی ءِ پارے کہ اسٹاک مارکیٹ ئٹ کمبوتی نا سوب انڈیا نا پارہ غان استو نا کروکا جلہو آک ءُ۔اونا پاننگے اینو ہراتم کاروبار نا بنا مس گڑا سرمایہ کار آک لپڑزہ ٹی حصص بہا کریر۔

اونا پاننگے کہ انفرادی و سرمایہ کار ادارہ ہڑتوما تا پارہ غان بہا کننگ نا رجحان خننگا۔

جبران سرفراز نا پاننگے کہ چک و تاڑ و جنگ ئنا وخت آ دا مریک انتئے کہ ہراتم سرمایہ کار آک وام آ مڈی ہلوک مریرہ اوفک پین نسخان آن بچنگ کن اوفتے بہا کرسہ مارکیٹ آن پیشتمرہ۔

اونا پاننگے کہ اینو ہم ہندن مسنے ہرانا سوب آن مارکیٹ ئٹ بھلو کمبوتی ئس خننگا۔

بلوچستان نا ضلع خاران ٹی مروک باب خاران نا ہند نا درست سلہہ بند بندغ آک ڈی آئی جی پولیس آفس کمپلیکس آ جلہو کریر ۔

ذرائع نا ردئٹ کمپلیکس آ برجاء تعمیراتی کاریم نا وخت جلہو کننگا، ہرانا سوب ٹی اسہ کارندہ ئس ٹپی مس۔

ٹپی پولیس کارندہ آتا چاہنداری عبدالقیوم ولد محمد حنیف سکنہ نوشکی نا پن آن مسونے ، ہرافتے جانجوڑی کمک تننگسہ ءِ۔

جلہو آن گڈ سلہہ بند بندغ آک پولیس کارندہ آن سرکاری سلہہ تے ہم کوزہ کریر و ہند آن نرار ۔

تدینی آن گڈ فورسز کارندہ غاک علاقہ ءِ گھیرہ ٹی ہلیسہ جلہو کروک آتا پٹ و پول بناء کرینو ۔

پاکستان ئٹ امارات اسلامیہ نا مسکوہی سفیر و طالبان راہشون ملا عبدالسلام ضعیف پاکستان و بھارت نا نیام ئٹ برجا غا خراب انگا حالیت آتے سیاسی پاریسہ خبردار کرینے کہ پاکستان پشتون آتے جہاد نا پن آ بھارت نا برخلاف جنگ کننگ نا پنت ءِ ترو۔

او چاگڑدی احوالکاری نا تلہ ایکس آ پارے کہ” دا ہندو و پنجابی تا نیام ئٹ سیاسی جنگ ئسے و دانا ہچو مذہبی سوب اس اف۔ پنجاب جہاد نا پن آ پشتون آتے بھارت نا برخلاف جنگ کننگ آ بچیفنگ نا کوشست کرو”

ملا ضعیف زور شاغانے کہ پشتون آتے تینے و تینا چناتے دا پاکستانی گوازی آن پیشن کشوئی ءِ۔

دا اندا وخت ءِ ہراتم استو بھارت صوبہ خیبر پختونخوا نا چندی سد کلو میٹر مُر آن کشمیر، پنجاب و کیہی ایلو شار آتا ترند میزائل جلہو کریسس۔

دا ہیت اندنو وخت اسیٹ مون آ بسونے ہراتم چار شمبے نا نن بھارتی لشکر پاکستان نا زیرِ انتظام کشمیر نا خُڑک نو ہند آتے میزائل جلہو ئٹ ٹک کرے۔

پاکستان لشکر جلہو تیٹ 26 بندغ نا بیران و 46 ئنا ٹپی مننگ نا دعویٰ ءِ کریسس۔

کوئٹہ، پسنی و نوشکے آن زوراکی نا بیگواہی تا پین مُسہ کیس رپورٹ مسنو۔

بلوچستان نا دریابی شار گوادر نا تحصیل پسنی آن حوال رسینگانے کہ پاکستانی لشکر صالح محمد نا مار سرتاج ءِ اسہ وار پدا زوراکی ئٹ بیگواہ کرینے۔ داڑان مالو 28 جولائی 2015 ٹی سرتاج و اونا ایلم مراد بخش صالح ءِ بیگواہ کننگاسس۔ پدان سرتاج آجو کننگاسس، واہم مراد بخش دائسکان بیگواہ ءِ۔ پوسکنا تدینی ٹی، 6 مئی 2025 آ سرتاج صالح ءِ دوارہ زوراکی ئٹ بیگواہ کننگانے۔

خاہوت اونا رکھوک یلہ کننگ نا خواست کریسہ پارینے کہ سرتاج تینا پیر انگا لمہ و بیگواہ غا ایلم نا چنا تا اسٹ انگا کمک ئس۔ سرتاج نا لمہ بلوچ راج آن خواست کرینے کہ اوفک اونا مار ئنا آجوئی کن توار بڑز کیر۔

نوشکے آن رسینگوک حوال تا ردئٹ، 14 سالی طاؤس خان نا مار شریف اللہ، ہند کلی قادر آباد، ءِ پاکستانی لشکر زوراکی ئٹ بیگواہ کرینے۔

خاہوت نا پاننگ ءِ کہ شریف اللہ ششمیکو جماعت نا خوانندہ ئسے، ہرادے 18 اپریل نا نن کم و ود 3 بجہ غا سرکاری وردی بینوک بندغ آک اونا اُرا غان ارفسہ بیگواہ کریر۔ دائسکان اونا ہچو حوال اس اف۔

اندا وڑ کوئٹہ نا ہندی محمد عظیم ساتکزئی نا مار عبدالفاروق نا خاہوت پارینے کہ اودے 13 اپریل 2025 آ کوئٹہ نا علاقہ لیس ڈگاری آن پاکستانی لشکر دزگیر کننگ آن پد زوراکی ئٹ بیگواہ کرینے۔ خاہوت نا پاننگ ءِ کہ خاہوت ءِ ہچو معلومداری اس تننگتنے۔

خاہوت حکومت آن خواست کرینے کہ عبدالفاروق نا دمدستی و رکھوک آجوئی ءِ باوری جوڑ کیر۔

یاتی مرے بلوچستان ئٹ اندا منہ سال ئٹی زوراکی نا بیگواہی و دروغ نا مونتس تیٹ ودکی نا سوب خاہوت آک بھاز ذہنی اذیت نا گواچی ءُ۔ زوراکی ئٹ بیگواہ بندغ تا خاہوت آتا خواست ءِ کہ اوفتا بندغ آتے اگہ دزگیر کننگانے گڑا اوفتے عدالت آ ہتنگہ۔ واہم بھاز وخت ریاستی ادارہ غاک اوفتے بھلو وخت ئسے اسکان بیگواہی آن پد دروغ نا مونتس تیٹ کسفرہ۔