غمخوار حیات و ارٹمیکو کلینڈر
نوشتکار: برزکوہی
مٹ: حمل بلوچ
دی بلوچستان پوسٹ
نوشکے ٹی ارا دور چلینگرہ۔ اسٹ ہمو ہرادے سرکاری کلینڈر آتیٹ شینک کننگک ہراٹی توک تینا پک کروک آ ترتیب ئٹ برسا کیرہ، چھٹیک تینا ہمو دے تیا مرسا کیرہ، دفتر آک سہب ئنا ملنگرہ و شام ئنا بند مریرہ، ہر پوسکن آ سال ئنا بنا ٹی دیوال تیا درنجوک متکن آ کلینڈر آک دڑفنگرہ و پوسکن آک ٹنگنگرہ۔ ارٹمیکو زمانہ ڈغار نا کیرغ آن وہک، ہنداخس شیف کہ اودے گھڑی ہلنگ کپک ولے ہنداخس خڑک کہ ہر بندغ نا گام آک اونا زی آ تمرہ۔
ہندا ارٹمیکو کلینڈر ٹی سال آتا پِنک آخہ بلکہ داڑے تدینی تیٹ وخت نا حساب تخنگک۔ دنکہ فلانی نا بیگواہی آن پد ئنا مسٹمیکو مد، فلانی نا جون ئنا خننگنگ آن مست ئنا سیڷ، ہمو نن آن پد ئنا کرائی کہ ہراتم گلی ٹی اولیکو وار فوج ئنا لاریک ارے اسکان سلوک ئسرہ، ہمے ماسٹر نا مرگ ئنا پد ئنا اولیکو روچہ۔ شار ئنا کماش آک ہندا کلینڈر ئٹ پیر مریرہ و لمہ غاک ہندا کلینڈر ئٹ تینا مار تا ودار ءِ کیرہ۔ سرکاری وخت مونی ہنسا کائک ولے راج ئنا وخت اسہ اسہ جاگہ ہندن سلک کس پائے کسس دانا ردوم ئٹ میخ خلکنے۔
محمد خان ہندا ارٹمیکو کلینڈر نا بندغ اس ئسک۔
نن اودے غمخوار پارینہ و مننگ کیک ننے آن گیشتر بندغ آک اسل سوبری ئٹ دا سوچ خلتوسر کہ اسہ بندغ اس تینکن دا وڑ نا پن اس انتئے گچین کیک کہ ہراٹی ایلوفتا ڈکھ آتا درمان نا پیمان ڈھکوک ءِ؟
اسہ پن ئسے نا باریم ہم عمر اتون اوار اوار گیشتر مریک۔ ورنائی ٹی او بیرہ اسہ تخلص اس مریک، پدا مدان مدان او بندغ نا زی آ لگک، اونا مزاج ئٹ دڑنگک، اونا گچین کاری ءِ زہمی کیک، داڑسکان کہ اسہ دے سما تمک کہ بندغ پن ءِ تختنے بلکن پن تینٹ بندغ ءِ تینا مفہوم نا وڑ ئٹ گڑسا جوڑ کرینے۔ غمخوار تون ہم ہندن مس۔ او ایلوفتا ڈکھ آتیا شئیر پاروک ءُ شائر اس سلتو، او رنج آتا ہمو اشتماعی ڈٹ ڈول نا امانتدار جوڑ مس ہراٹی اسہ بندغ ئسے نا ڈکھ جتا مرسا چاننگپک۔ ننا رہی آ غمک خاص بندغی مننگ کپسہ۔ اسہ ارا نا مودہ ماتن ایلو ارا نا درگہ اسکان سر مرسا راجی آ حافظہ نا بشخ اس جوڑ مریک۔ اسہ لمہ نا ودار ہزار انگا لمہ تا دُوی ٹی تینا وڑوس پٹک جوڑ کیک۔ اسہ خون اس تینا کہوک آڑان بھلن مریک۔
ہندا تو محکومی نا کل آن گڑجیفوک آ ڈول ءِ کہ او بندغ آتے تنیا خلسا ہم اوفتا ڈکھ ءِ اشتماعی جوڑ کرسا کیک۔
غمخوار کالج ئٹ خوانفیکہ، کتاب نوشتہ کریکہ، کتاب مٹ کریکہ و ادبی ادارہ تیٹ کاریم کریکہ۔ دا کل جوان ءُ ولے نن کل بھاز ارے آ سرپند مسن کہ گواچن ئٹ او اسہ پین کاریم اس ہم کننگ ئسک۔
او وخت ءِ اَگڑی کننگ ئٹی ئسکہ۔
غلام آ راج ئٹی اسہ ریسہ اس کل آن مست ٹپی مریک۔ اسہ پدریچ اس تینے آن مالو والا پدریچ آ پورہ سر مننگ کپک، بولی ٹی گڑاس خوار غیب مریر، کتاب آک رسینگپسہ، اصطلاح ودی مفک، دیہاڑ نا گڑاس پنہ تیا ہندنو پیہنی اس تالان کننگک کہ بروک آتے لگک کہ اوڑے اسل ہچڑاس متنے۔ غمخوار ہمو پیہن آ پنہ تیا سرہ مُسن ئسکہ۔ اودے ہورک آ جاہ تیان گڑجیفوک ءُ بے جاراتی اس ارفیکہ۔ او پاریکہ بولی ٹی میدان ہورک ءِ و دافتے بروک آتیکن دن ہورک الوئی افک۔
اونا کوٹی مدام کنے اسہ ہندنو ہند ئسے آنبار یات بریک کہ ہراڑے کتاب آک خواننگپسہ بلکن مدان مدان آ وادانی تیٹی مٹ مرسا کیرہ۔ کاغد آتیٹی نوشکے نا لوڑ پیہسا کیک، ہندا مش تیٹی ہور تا زباد و ہندا زباد آتیٹ اسہ پین وخت ئسے نا باسنی۔ بھاز وخت ٹک خلیوہ کہ متکن آ کتاب گواچن ئٹ کاغد اس سلپک بلکن او تینا خوانوک آتا دو، اوفتا دمہ، اوفتا ننکان و گمان آتا کچڑی اس مریکک۔ غمخوار نا میز آ تموک کتاب آک سما اف اخس ہندا وڑو گڑا تینا تہٹی پوشانو۔ پیشن اسہ ریاست اس تینا سیم و سند، چوکی و لڑ آتیٹ اختہ ئسک و داڑے اسہ بندغ اس تینا بولی نا بنبیل و با تروک آ کائنات ءِ پورہ کننگ نا کوشست کننگ ئٹی ئسکہ۔ ایہن ہُرس تو دا مقابلہ مخفوک ءِ کہ اسہ کنڈان ادارہ، توفک، دفتر، کانود، لڑیک و وردیک۔ ایلو کنڈ آن اسہ میز اس منہ کتاب و اسہ بندغ اس ہرا لوز آتا کمبوتی آن فریشان ئسکہ۔
ولے دیہاڑ ہر وخت ظاہری گڑا تے شرف تفک۔ بھاز آ بادشاہیک تینا پورہ دیہاڑ تون بھس مریرہ و اسہ بے ڈس ءُ کوٹی اسیٹی نوشتہ مروک ءُ اسہ جملہ اس اوفتیان پد ہم زندہ مریک۔
براہوئی ٹی نوشتہ کننگ غمخوار کن بیرہ لمئی بولی تون مہر آتا درشانی اس الوکہ۔ او اسہ ہندنو جہان اسیٹی براہوئی ٹی امکان ودی کننگ ئسک ہراڑے چنکا بولی تے ایہن ہنوک آ وخت ئنا ہند اس پہہ مننگک۔ دنکہ اوفتیٹی خلقی آ کسہ غاک تو مننگ کیرہ ولے پوسکن دور ئنا پوسکن آ فکر آک آخہ، باگل مننگ کیک ولے فلسفہ نہ، مودہ مننگ کیک ولے نغدکاری نہ۔ غمخوار نا ہر مٹ کروکا کتاب بلکہ ہندا ڈھکوک آ بے شرفی نا نمن ئسک۔ او براہوئی ءِ ایلو بولی تیان خیال ہتسا تننگ الو بلکن او براہوئی ءِ اونا شابیتی ءِ یات تننگ ئٹی ئسک۔
ولے اونا پن ئنا داپار ایپار آن لیک آک چنک مرسا کریر۔ بھاز آ لڑ آتا اسہ جتا ءُ زباد اس مریک۔ ہرا بندغ آک تینا پن ءِ وخت اس ہم ہموفتیٹی خنتنو او فتے او بیرہ کاغد لگیرہ۔ ولے ہرازدے بندغ تینا پن ءِ اسہ ہندنو لڑ اسیٹی خوانک ہرادے اسہ دفتر اس اودے سوج کننگ آن بیدس نوشتہ کرینے، گڑا پن ئناگواچن مٹ مریک۔ داسا گڑا پن بیرہ توار کننگ کن اسہ گڑا اس سلپک بلکن نگرانی کروک اسہ کڑدہ اس جوڑ مریک۔ غمخوار ءِ ہم لڑ ئٹ تخنگا۔ اونا بدلی مس۔ اونا زی آ نظر تخنگا۔ او چائسکہ کہ ریاست اودے خواننگ ءِ ولے دن آخہ کہ امر خوانوک اس ادیب ءِ خوانک۔ ہندا خاطران وخت وخت او پین پن تیٹی ہناکہ۔ ای بھلو وخت ئسے اسکان قلمی پن ءِ رکھ ئنا اسہ چمبازی اس سمجھاٹ۔ پدا اسہ دے ماراٹ کہ محکومی ٹی قلمی پن ئنا نفسیات اسل بھاز بھیم بش کروک ءِ۔ اسہ بندغ ئسے تینا وجود نا داپار ایپار آن ڈھکوک ءُ کسر جوڑ کروئی تمک۔ او تینٹ تینا تہٹی اسہ شار اس تفک جوڑ کیک ہراٹی اسہ دروازہ غا محمد غان رہینگک، ایلوڑا غمخوار و مسٹمیکو نا پد اسہ پین پن اس۔ و دا کل ئنا نیام ئٹ اسہ شعور اس نن نا تارمئی ٹی سفر کننگ ئٹی مریک۔ کوزہ گیر ءِ بیرہ پن بکار ئسک، ولے فکر پن تا نیام آن پیشتمک۔ اسہ سرحال اس دچہ ہرانگ پیشتمک، اسہ افسانہ اس اسہ پین شناخت ئسے تون، ولے کیرغ نا مِش ہموڑے سلک۔ بندغ تینا دزرند آن نرنگ کیک ولے تینا حساسیت آن کپک۔
غمخوار تینا راجی زمہ واری آن اسل ہم بیگانہ متو۔
اونا باروئٹ ہندا جملہ ءِ ای کل آن بھلا شاباشی پہہ مریوہ انتئے کہ ننا زمانہ ٹی بیگانگی بیرہ نزوری اس افک بلکن زند ئنا اسہ پورہ ءُ طریقہ ئسے۔ اگہ کسس خوائے تو تینا علم ءِ ہنداخس پاک تخنگ کیک کہ راج ئنا دتر ہم اونا دامن آ سر مننگ کپ۔ او پاننگ کیک کہ سیاست خراب ءُ گڑا ئسے، ادب گچین زیبا ءِ، ای بیرہ زیبائی نا خذمت ءِ کیوہ۔ دن انگا بندغ آک تینا دروشم ءِ اسہ سوگؤ ءُ سنگر اس جوڑ کیرہ و پدا اوفتے سما تمپک کہ سنگر آن پیشن دیر خلنگنگ ءِ۔ غمخوار ادب ءِ پروپیگنڈا اس جوڑ کتو، ولے ادب ءِ معصومیت نا بہانہ ہم جوڑ کتو۔ مننگ کیک ہندا اونا فکری رسیدہ مننگ ئس۔ راجی زمہ واری اوڑکن کوک ئنا دروشم ئٹ الو بلکن کاریم نا دروشم ئٹ خننگاکہ۔ خوانفنگ، نوشتہ کننگ، مٹ کننگ، بولی ٹی پوسکنو ہڑکہ ودی کننگ، ادبی ادارہ جوڑ کننگ، پوسکن آ پدریچ کن پٹ آتے آبات کننگ۔ او آزاتی ءِ بیرہ بروک آ وخت ئنا سیاسی ءُ حالیت اس پہہ متوکہ، مننگ کیک کہ مارشت تفرنگ آن بیدس او ہمونا تہذیبی بنچخ ءِ لکھنگ ئٹی ئسک۔ انتئے کہ راج آزاتی آن مالو جوڑ مرسا کیک۔ ریاست پد آن ہڈ ہلیک۔
پدا مئی نا ہمو دے بسک۔
ننا ارٹمیکو کلینڈر ٹی داسا ہندا دے نا پن ءِ۔
شانزدہ مئی 2026
سرکاری کلینڈر ٹی دا بیرہ اسہ تاریخ اس مرو، ننا وخت ئٹی دا اسہ چاخ مروک ءُ تل ئسے۔
کلی مینگل نا خڑک سم کاری مس و محمد خان ڈغار آ تما۔ بلوچ راجی حافظہ دا خون ءِ اسل اسہ جتا ءُ تدینی ئسے نا وڑ ئٹ منتو۔ نن کن دا نا پد ئٹی ہمو مرغن آ سیخا ءِ ہرا پن تے لڑ آتیٹی بدل کیک۔
ولے دا ساعت آتیان پد اسہ خلیس اس ننے ٹی ہم ودی مس۔ نن غمخوار ءِ شہید پارین ہراکہ ننا مزغ آتیٹی شرفداری نا کل آن بھلا جاغہ ءِ۔ ولے شہید مننگ وخت وخت بندغ نا ایلو تیوہ غا زند ءِ کیدک۔ عکس گڈیکو مریک، ہندا تدینی پورہ وجود آ کانڈہ مریک۔ ای اسل خواپرہ کہ غمخوار مدام ہندن ڈغار آ تموک مرے۔ خونی اودے اسہ ساعت ئٹی شیف بٹے، ننا مزغ ہم اگہ اودے ہندا ساعت ئٹی مدامی کن کیز کرے گڑا دا یاتگیری آخہ بلکن خون مننگ ءِ ابدی کیک۔
ای اودے پدا میز آ خننگ خواوہ۔
اسہ کتاب ئسے آ سرہ مُسن، اسہ مٹ مروک لوز ئسے آن خڑبد، اسہ خوانندہ ئسے نا بھس ءُ جملہ ئسے جوڑ کرسا و اسہ سنگت ئسے تون تولوک بولی نا ہورک آ تلہ نا شکائست ءِ کرسا۔
شہید ئسے بیرہ اونا مرک ئٹ یات کننگ خونی ءِ اونا مرگ ئنا گڈیکو کالخواہ جوڑ کننگ ءِ۔ ہندا سوب آن تو مرگ آن پد غمخوار نن کن پین گیشتر پیچیدہ مس۔ او اسہ بندغ اس رہینگتو، ولے ای دا ہم پاننگ خواپرہ کہ او خیال اس جوڑ مس، انتئے کہ دا ہیت بھاز اڑزان ءِ۔ خیال کہوک آ نا کمبوتی ءِ پورہ کپک۔ کتاب اسہ بندغ ئسے نا دو تا باسنی ءِ ہتنگ کپک۔ خون ئنا کل آن بھلا تادی ہندادے کہ او ساڑی وجود تون اوار بروک آ وخت ءِ ہم ایسر کیک۔ نن ہمو کتاب آتے حساب کننگ کینہ کہ ہرافتے غمخوار نوشتہ کرینے، ولے ہمو کتاب آتا کچ ءِ کسس ہم تپک ہرافتے کہ او ہفتاد سال نا عمر اسکان لکھنگ کریکہ۔ نن اونا ساڑی وخت نا شاگڑد آتے درست کننگ کینہ ولے ہمو ورنا ءِ آخہ ہراڑتون او 2031 ئٹی ملنگ ئسک کہ ہرادے بیرہ اسہ جملہ اس ادیب اس جوڑ کریکہ۔
وختس ای ٹک خلیوہ کہ بلکہ کوزہ گیر نا گواچنی خواہشت بندغ آتا کسفنگ افک بلکن ہِڑکہ (امکان) غاتے کم کننگ ءِ۔ ہندن انگا آخبت نا کچ آتے کم کننگ ءِ کہ ہرافتیٹی راج تینے جتا جتا انگا دروشم تیٹ تکنگ کے۔ ادیب ہندا خاطران بھیم بش کروک مریک کہ او ہڑکہ (امکان) ودی کیک۔
ہندا خاطران اونا یات نن کن ماتن آن زیات اسہ امتحان ئسے۔ او ہرا ہورک آ جاگہ تے ٹک کریسس، نن اخس ءِ آباد کرین۔ او تینا بولی کن ہرا بے جاراتی تے مارا انت نن اوفتے بیرہ تران آتیٹی رکھان یا کاریم ئٹ ہم بدل کرین تا؟ نن شہید آتیتون بھاز مابت کینہ، وختس تو ہنداخس بھاز کہ اوفتا پن ننا تینا فرض آتے پدی ڈھکیک۔ پن تے وار وار پاننگ ایلو گڑا تیان اڑزان ءِ۔ ہمو کاریم تے برجا تخنگ کبین ءِ ہرا ہمو پن ءِ معنہ تسر۔ غمخوار ءِ یات کننگ نا مطلب دا افک کہ ہر سال اونا عکس ئنا مون آ بتی روشنائی کننگے۔ مننگ کیک دانا مطلب دادے کہ براہوئی ٹی ہمو کتاب نوشتہ کننگے ہرا داسکان نوشتہ کننگتنے۔ ہمو علمی آ اصطلاح تے ودی کننگے ہرافتا کمبوتی تے او ماراکہ، ہمونو خوانندہ ودی کننگے کہ ہرا تینا بولی ءِ احساس کمتری آن بیدس دنیا نا مون آ تخنگ کے۔
نوشکے نا ارٹمیکو کلینڈر ٹی داسا غمخوار آن پد ئنا دور چلنگنگ ءِ۔ مننگ کیک کہ سرکاری کلینڈر کیہی وار مٹ مسنے، ولے راج آتا کلینڈر دن زو مٹ مفک۔ بھاز آ تاریخ آک سال آتے اسکان برجا سلرہ۔ بھاز وخت اسہ شہید ئسے نا دے پورہ نسل ئنا سن ئنا کچ مرغن مریک۔ ولے مننگ کیک کہ غمخوار نا یاتگیری نا حق دا افک کہ نن بیرہ ہموزدے ئٹی ڈب ہلوک مرین۔ او تینٹ ہورک آ جاگہ تے پر کروک ءُ بند اس ئسک۔ اوڑان پد زندہ مننگ نا اخلاق ہم ہندادے کہ نن دیہاڑ نا دا چاخ ہلوک تل ئنا داپار ایپار تولوک اودے ہُرپن، اوٹی معنہ، کتاب، بولی و بروک آ پدریچ ئنا شعور ءِ بٹسا اودے پر کننگ بنا کین۔
و ہموتم مننگ کیک کہ اسہ دے ارٹمیکو کلینڈر ٹی اسہ پوسکن ءُ دور اس بنا مرے۔ ہموزدے اسہ ورنا اس اسہ کتاب ئسے نا اولیکو پنہ غا تینا پن ءِ نوشتہ کرو و اودے ڈھکنگ نا گرج مفرو۔ او تینا بولی ٹی تینا گلزمین، تینا دیہاڑ و تینا بروک آ وخت ئنا بابت ئٹ نوشتہ کرو۔ اسہ لڑ اسیٹی اونا پن بیرہ دا سوب آن ساڑی مفرو کہ او تینابندغ آتے تینا پن ئٹ توار کرینے۔ مننگ کیک آزاتی نا کل آن گلان کروک آ تصور ہندادے۔ بندغ تینا پن، تینا بولی و تینا یادداشت تو ڈھکوک مف۔
ہموزدے غمخوار حیات اسہ وار پدا یات برو، ولے مننگ کیک بیرہ اسہ شہید ئسے نا وڑ نہ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
