تاریخ نا پنہ غاک

(ششمیکو بشخ)

نوشت: محبوب شاہ

دی بلوچستان پوسٹ – کالم (براہوئی)

1881ء اٹی برٹش حکومت 480روپئی نا مالیاتی زَر چیف آف چابہار میر مندو ءِ تننگ نا پڑو ءِ کرے ولے دا معاہدہ غا ہچ ءُ کاغدی ءُ کاروائی کننگتو، داڑان مُست جام صاحب ءِ تینا مالیاتی زرّ آتیان تروئی مسکہ۔ ہندن اورماڑہ نا لائن نا رکھ اکن 1883ء ٹی ہرا وخت کہ میر مندو کذیت کرے تو دا زرّ آتے اونا مار میر محمد ءِ تننگا۔ ہندا وڑ داسہ اسہ مالیاتی زرّ اس میر در محمد بزنجو ءِ ہراکہ 320روپئی ئسر، و ہندن سڑدار محمد صدیق ءِ 160روپئی سال انا مالیات دو بسکہ۔

18جولائی آ دا فیصلہ کننگا کہ کیچ انا کل مالیات ہمو جاگہ نا کمشنر و افسر آتے تننگے۔ فقیر محمد نا مرک آن گڈ مُچ مروک آ تیوہ غا مالیات ءِ سڑدار بائیان و شہداد نا نیامٹ بشخنگا۔ و دازرّ آن 1980روپئی آن گڑاس کم ٹیلی گراف لائن نا رکھ کروک آ سپاہی تے تننگا۔ 1895ء ٹی ہندا وڑ انا معاہدہ اس چابہار و پسنی نا نیام اٹ کننگا و تیوہ غا زرّ ءِ سیاسی ایجنٹ آتا کمک اٹ بشخنگاولے دا وڑ زرّ بشخنگ بے سہب خننگاکہ۔ برٹش حکومت پد آن دا پیسہ غاتے 1899ء ٹی کیچ و پسنی و چابہار نا سال انا مالیات ءِ براہ راست چیف آف ایران نا ٹیلی گراف لائن ادارہ نا پارہ غان تننگ نا بناءِ کرے۔

ہمو وخت کیچ انا مالیات ءِ سڑدار شاہ عمر گچکی و عبداللہ خان گچکی ہراکہ کیچ انا نائب ئسکہ ، بریبر بشخنگا ولے دوارہ دا فیصلہ کننگا کہ دا پیسہ غاک ولدا بشخنگر۔ 2260روپئی میر مہراب خان گچکی و میر شاہ قائم گچکی ءِ تننگے۔1899ء ٹی اسہ پین معاہدہ اس (No.XXV)کننگا، میر محمود خان پسنی ٹی تعینات کننگا، ہراکہ پسنی نا سیم آ ٹیلی گراف لائن نا رکھ اکن ئسکہ، دا ہمو معاہدہ ئس ہرادے کہ اونا باوہ میر بہرام خان تون کننگاسس۔ ہرانا سوب آن میر بجار خان چیف آف کمیٹی نا مُچ مروک آ مالیات آن 520روپئی مالیات اوفتے تننگ نا پاننگا، و دا اوڑان نمّن مس۔

1907ء اٹ اسہ ٹیلی گراف لائن اس پورو مس۔ ہرادے کہ کراچی آن نوکنڈی اسکان تالان کننگاسس۔ اونا رکھ اکن ہرا مالیات آتے تروئی ئس، اوفتا بھاز کم تننگا۔ مالیات نا گراف اٹ پاننگاسس کہ 800روپئی سال انا پیسہ توہان نا قبائلی چیف ءِ تننگک ولے دا ٹِک ءِ ایلو معاہدہ غاتیٹی اوار کننگتو۔

ٹیلی گراف لائن نا مالیات:
شیف تروک آ چارٹ اٹی ہمو سرجم آک ءُ ہرافتا سلہ خلنگاسس۔ ہراکہ ڈائریکٹر آف انڈین و یورپین ٹیلی گراف ادارہ نا پارہ غان مکران نا سرزمین ءِ تننگانے:

اندن اسہ پین معاہدہ اس (No.IX)و (X) 1869ء اٹی ایرانی چیف باہو و دشتیاری ٹی ہموڑے ٹیلی گراف لائن ہراکہ کیچ آن چابہار اسکان ءِ، اونا رکھ اکن تعینات کننگاسس۔ ہنداسوب آن 1000روپئی نا مالیات تننگاسس۔ ہراکہ پد آن 3000روپئی کننگاسس ولے گڑاس ویل آتا سوب آن جنوری 1911ء ٹی ہندا مالیات نا زرّ ءِ ولدا بشخنگا، ہراکہ دا وڑ اٹ ئسر:
سڑدار سید خان گنی۔۔۔۔۔۔ 1000
علاقائی کماش آتے کن ۔۔۔1000
اسہ زرّ اس بمبور نا بندغ آتے ہم تروئی ئس ہراکہ 400روپئی ئسکہ۔
دا تیوہ غا مالیات 3000روپئی ئسکہ۔
1924اٹ ہندا وڑ لائن نا رکھ کروک آتیٹی علاقائی شانزدہ کماش آتے سالانہ مالیاتی دو بس ہراکہ دا وڑ اٹی ءُ:
سڑدار حسین خان۔۔۔۔۔۔1000روپئی
میر یعقوب خان۔۔۔۔۔۔500روپئی
میر نگدی خان۔۔۔۔۔۔1600 روپئی
پنچ علاقائی معتبر آتے۔۔۔500روپئی
ہمو جاگہ نا علاقائی و گڑاس خاص انگا بندغ آتیکن۔۔۔400روپئی تننگا
کل مالیاتی زرّ۔۔۔۔۔۔3000روپئی
1920ء آن ہلیس 1924ء اسکان باہو و دشتیاری نا علاقہ نا مالیات آک دا وڑ بردل مریسہ کریر:
میر صاحبان آف باہو۔۔۔۔۔۔ 600روپئی
میر احمد خان آف باہو۔۔۔۔۔۔400روپئی
میر دین محمد آف دشتیاری۔۔۔۔۔۔ 500روپئی
میر ڈرا خان آف دشتیاری۔۔۔۔۔۔ 500روپئی
کل مالیاتی زرّ۔۔۔۔۔۔ 2000روپئی
دافتا مالیاتی زرّجولائی 1926ء اسکان بدل مرسا کرے۔ متکن آ کرکی پٹی ءِ اسہ وار ولدا جوڑ کننگا، 1917ء ٹی اسہ پوسکن ءُ ٹیلی گراف لائن اس جوڑ کریر، ہراکہ باہو و دشتیاری آن گدرینگاکہ اوفتا ضلع شادی کور، سنٹ سر و چابہار آن گدریگک، دا ہڑتوم آ ضلع غاتا مالیاتی زرّ انا بشخ آک دا وَڑ اٹی ءُ:
میر صحابہ باہو۔۔۔۔۔۔ 500روپئی
میر احمد خان باہو۔۔۔۔۔۔500روپئی
میر دین محمد دشتیاری۔۔۔۔۔۔500روپئی
کل زرّ 2000روپئی ئسر۔
ہڑتوم آ ضلع غاتیٹی جاسک نا علاقہ ءِ 840روپئی مالیات تننگاسس، 1816ء غان ہندا پارہ غا اِرا اہم ئپ لائن تالان کننگا۔ ہندا سوب آن اوفتے 2000روپئی تننگا۔ اسہ تُو اٹ تو چیف مکران اٹ تعینات کننگاسس، دافتا سرجم دا وَڑ اٹی ءِ:
سڑدار سید خان نا مرک آن پد اونا مار حسین خان۔۔۔400روپئی
اسلام خان نا مرک آن پد اونا مار یحییٰ خان۔۔۔۔۔۔200روپئی
میر برکت۔۔۔300روپئی
محمد خان۔۔۔200روپئی
دین محمد۔۔۔200روپئی
اشرف خان نا مرک آن پد صوبہ خان ۔۔۔200روپئی
احمد خان۔۔۔200روپئی
مصطفی خان۔۔۔ 200روپئی
میر ہوتی۔۔۔100روپئی
دا زرّ اٹ ہر سال 100روپئی ودفسا کرے، ولے 1919ء اٹ میر فکری خان نا کمک اٹ دا مالیات ءِ 30نومبر آن پد بند کننگا۔ ستمبر1940ء اٹ ایرانی ڈائریکٹر دا پوسکن آ ٹیلی گراف نا رکھ اکن تعینات کننگاسس، اونا زمواری ئسکہ کہ او قلات و لسبیلہ نا نیامٹ امن ایمنی اتے، ہندا ویل آتا سوب آن برٹش حکومت و پنجاب حکومت نا پارہ غان اودے گڑاس خاص واک ہم تننگاسس۔
ریاست لسبیلہ جتوئی کرک بلوچستان نا باروٹ درو کریسس، ہراکہ اصل اٹ جہاندم اٹ جھالاوان نا ڈویژن و سویل اٹ عربین سور دِیر اٹ ئسکہ، ہراکہ سندھ اسکان تالان ئسکہ و دیکی ٹی مولہ نا شاخ اٹ کب انا علاقہ ئسکہ۔ دانا داسہ نا تاریخ تارمہ ٹی ڈکوک ئس ولے وخت اس کہ سکندر اعظم تینا قیامت شاغوک آ لشکر تون دا ریاست نا سویلی علاقہ 325مستر مسیح ٹی سفر کریسس۔ ہندا خاطر آن اونا تاریخ ءِ ولدا نوشتہ کننگا۔ ہفتمیکو کرن اٹی وخت اس کہ بدھ ازم تینا عروج آ ئسکہ ولے منہ وخت آن پد اونا پجاریک چُپ کریر و اسلام کاٹم ہرفسہ کرے۔ دا وخت اونا کاٹم ہرفنگ نا اولیکو سیڑھی ئسکہ ولے گوجر، رنجا، گوئیکا، ہراکہ ہفت قبیلہ غاتون اوار مسوسر۔ اوفک اینو ہم لسبیلہ نا علاقہ غاتیٹی آباد ءُ، اوفک ہموڑے تینا اسہ جتاؤ حکومت اس جوڑ کریسر۔ اوفک تینے جیلانی خاہوت جاموٹ قبیلہ غان پاریرہ و عرب قریش ہم پاننگارہ۔ ہرانا سوب آن اوفتا متبر و یر آتے جام انا خطاب رسینگا، ہرافتا تعلقداری ہندا علاقہ غان ئسکہ۔
دا لائن انا اولیکو چیف علی خان اول ئسکہ، دافتے ’’کاتوزئی‘‘پاریرہ۔ و تینا کمک و ہمت اٹ 1742ء اٹ تینے دا ہند اسکان سرکرے، اوڑان پد اونا جند ءِ 1765ء اٹ غلام شاہ بے سہب کرے و اونا جاگہ غا کوزہ کرے۔ہندن1776ء اٹی علی خان دوئم جنگ کرے و اودے کٹنگ آن پد اونا جاگہ ءِ ہلک، تیوہ غان مُست جام بننگ تون دا جاگہ ءِ خان قلات آن جتا کننگ آن گڈ مُون آ بس و تینے خان انا بریبر اتنگ خواہسکہ۔ ہندا سوب آن اونا گڑاس سپاہی ہموڑے لٹ و پل کریرہ ولے قلات جام دوہم میر خان نا دور اٹ اوڑتون اسہ معاہدہ اس کرے۔ معاہدہ غا باقاعدہ ہڑتوم آتا دستخط آک ساڑی ءُ۔ ہراڑا کہ قلات نا سڑدار آک خان خدائیداد خان نا خلاف جرگہ ٹی مخالف فریق ءِ زیات وونٹ تسر، ہندن 1830ء اٹ میر خان دوئم و علی خان دوئم سرسہب مسر، و بھاز کوشست آتیان گڈ خان قلات آن جتا مسر۔
دا حوال نا رِد اٹ 1868ء اٹ گڈیکوتفریق ایسر مس۔ ہراٹی کہ اسہ بھلو بشخ اس جھالاوان نا براہوئیک تین پہ تین نا سیوت اٹ خان قلات نا حکومت ءِ یلہ کریر، دا تفریق آن پد ریاست اٹ ہرا بندغ آک خان اتون دشمنی کریسر۔ خان قلات اسہ فوجی ءُ دستہ اس اوفتا خلنگ کن راہی کرے، اوفتا جند برٹش حکومتی علاقہ ءِ تینا پِن آ ہلوک ءُ مورچہ اس جوڑ کرے، داڑے برٹش حکومت ءِ وار دُو بس تو او خان اتون اسہ پین معاہدہ اس کرے کہ او دا آسراتی نا مون اٹ ہر سال برٹش حکومت ءِ 8000روپئی مالیات ایتو ءِ۔ گڑا دانا بدل اٹ برٹش حکومت ریاست قلات نا معاملہ غاتیٹی تنیا نیام تمپروءِ، دا معاہدہ غان پد جام تینا حیثیت ءِ نزور خنا، و بے وس مس۔ منہ وخت اکن کراچی آ رسینگا ولے قلات و خان اتون اونا بغاوت برجا سلوک ئس۔ ہندا سوب آن اودے علاقہ بدر کریر، اوفتے حیدر آباد آ راہی کریر۔ و ہموکان اودے پُونا غا مون تسر۔
(برجاءِ۔۔۔)

افسانہ: پیرہ نا پازوار 

نوشت: زامران دیدگ

دی بلوچستان پوسٹ :براہوئی کالم

باوہ اسُل پہہ مننگ اف کہ تیوہ غاک پوسکن، بیرشت پوسکن و پازوار تیٹ مرور… او کنے پائک متکنا کوٹی ٹی پیرہ نا نا پازوار ئسُر ہموتے پٹک… لمہ نی باوہ ءِ پہہ کہ داسہ.
کنا چُنا نی اسیکہ اُر تا اگہ دوست بتور نے پیرہ نا پازوارک ای باوہ تون نا ہیت کیوہ دوارہ، درکنا چُنا متکُن آ کوٹی ٹی پٹ بلکہ پین ہم گڑا ملے نے اندا نما ’’۲ مارچ‘‘ کن۔
مہران، باوہ آن نااُمیت مرسا بے رضا بے رضا مُتکن آ کوٹی کن مون کرے. کوٹی نا کُلف دے چائے ہرا زمان نا ئسے خلوک ئس، مہران چابی تا سوج آن بیدس سوختہ مننگ نا سوب کُلف ءِ اسہ خل نا دَک نا اس کرے ہراڑان گمان مسکا کہ کلف نا ہم رضا اس کے کنے بس ءِ دا چوکیداری آن دا کوٹی نا پِن مُتکن آ کوٹی اس، پِن آن رنگ ارفسا اونا کل گڑاک متکُن مسوسُر، پیر مسوسُر کُلف آن ہم پیری نا درشانی مسک۔ کوٹی نا جند پیر ئسے نا ادیرہ آن بار پاکیزہ خننگنگ ئس، ہراڑے بیرہ ریک ناشال دے چائے ہرا منشت کِن وخت تالان کریسُس۔

مہران گوڑینگوک گوڑینگوک کوٹی ءِ عجائب خانہ آن بار سیل کننگ ئس. اسہ پارہ غا پیرئی آ زام آک ٹنگوک ئسُر تو ایلو پارہ غا شکار مروک آ خزم آتا کاٹم آک ہراتا مرغ آتیان اوفتا وجود نا درشانی مننگ ئس ولے او پازوار تیکِن خن توروک اس کہ ہراکان پٹنگ نا بنا کیوک!
جُوان دانگ اینگ پٹنگ ءِ بناء کرے، گڑاتے پیشخانڈا ولے زو اس دم درے دَم تینا راست کننگ نا خاطر اسہ بھلو پیٹی ئسے نا زی آ توس ہراکہ پاٹ آن جوڑ ئس، دم اس جوان تولنگ آن گُڈ خیال بس تا کہ کوٹی نا ہر مون ءِ پٹاٹ اک ولے دا پیٹی ءِ پٹتنُٹ. پیٹی بے کلف ئس ہراڑان مہران باہ شیڑ مسک، پیٹی ءِ ملنگ آن گُڈ او ہبکہ خن ملوک سلیس، ساعت اس بیرہ سیل اٹ گدریفے انتیکن بلوچی دود و ربیدگ نا خاطر اودے کل بیرشت انداٹی نظر بس اک، پیرہ نا دستار، چڑی، اونا گڈری، پیہُن آ پُچ آک پین پین اندن ’’پیرہ نا پازوار‘‘ تیوی آن گچین ئسُر.
مہران تیوی آ گڑاتے گیرام کرسا پیرہ نا پازوار تیکن دو بٹے ولے۔۔۔ کپیس ورنا۔۔۔ کپیس۔۔۔ ناتوار کوٹی نا سال آتیان تالان آ مِش نا شال ءِ بش تس ہراڑان مہران یک دم تون جک سلیس، زو اس کوٹی آن پیش مس، دانگ اینگ جوان ہرا ولے ہچ اَلو، کُوک اس خلک: لمہ، باوہ ہرادے؟
لمہ: کنا مار اوتو دم اس مُست بازار کِن سر ہلک۔
مہران حیران ئس کہ دا انت کسہ ئسے. توار تو باوہ نا توار نا وڑ ئس ولے اوتو داڑے افک۔۔۔ اُست ءِ بھلن کرسا ولدا کوٹی اٹ پیہا، پازوار تے اسیکہ خوڑتی اٹ ہرا دو بٹنگ اس کہ ولدا توار بس: “ای پاریٹ نے ورنا کپیس.”
مہران: “نُم دیر اُرے، مُون آ ببو!”
“ای مہران بلوچ.”
“مہران تو ای اُٹ!” واپس ورندی بس.
“آن نم مہران اُرے ولے ای مہران ’’بلوچ‘‘ اُٹ۔۔۔”
“دیر اُس مونا بر.”
“مونا بننگ لازم اف بس نی پیش تم داکان، خیر انداٹی ءِ.”
“ای تینا پیرہ نا پازوار تے کِن بسونٹ، داتے ہرفیواکاوہ۔۔۔” مہران امری سیٹ اُست ءِ بھلن کریسُس ہیت کننگ اس.
مہران نا اندا ہیت ئتون اسہ بلوجلالی او مخنگ سینا توار مس: “پازوار ۔۔۔! نی تو داکان زرّہ سے نا لائخ افیس اک۔۔۔ بس در داکان.”
مہران پہہ مس کہ توار پیٹی آن بننگ ءِ انتیکن مخنگ نا توار آن پیٹی نا گڑاک بے جاگہ مسُر اک.
مہران ولدا تران کرے پارے: “داکنا و کنا پیرہ نا ءُ، نی پاسا کنے زرّہ سے نا حق اف؟”
“انت پیرہ، ہراکان نا پیرہ اگہ نی دا گڑا تا حق ادا کیسا تو دا نا مریرہ ہمیش زند اکن۔”
“انت حق اس ادا کیو۔۔۔؟”
“نی حق تپیسہ۔۔۔”
“حق قربانی اس دافتے کِن دوارہ خوندی کرتا.”
“مرے ای نے قربانی اس پاوہ۔۔۔ا رف اے خیسن آ دست والا زام ءِ، کاٹ کر تینا شہادت نا ہور ءِ۔۔۔ ہور ءِ تخ، پازوار ،دستار تیوہ غاتے در۔”
مہران آن خید اس یلہ مس، پارے: “انت پاننگس دا پازوار و دستار کن تینا ہور اس ایتیو، اوخہ گنوک افٹ!”
“سہی گڑا انتکن داڑے بسوس، دا پازوار تیکن در تینا زند تون مشغول مر.” ہمو توار نا طب آن شغان نا گند بننگ ئس۔
مہران کاٹم ءِ خواریفسا پارے: “اوتو ۲ مارچ بلوچ دود و ربیدگ نا دے ئنا خاطر آن پازوار اَلو کنے.”
“دُن پا کنا ہم ہوشان ئناسُس انتیکن نن ہم اندا مسخرہ نا سیل کِن چاکر، گہرام تون اوار سیل کن مُچ آ بلوچستان نا پیری کینا، اندن گُل خان نصیر ننکن شیعر پائک، نما داوڑ تیا جوان مخینا۔”
“نی ۲مارچ ءِ شغُل اس سرپند مریسا،داننا پہچان ءِ.” مہران فخر اٹ پارے.
“نا پہچان مروئے ولے ننا پہچان دا اَلو، نن تو لمہ نا گُد کن ساہ تسُنا، ننا چندی سنگت آک ذان بندجنگ کریر کہ مرک ہرے پدی ہننگ اف‘، نی تینا پیرہ نا بیرشت کن اسہ ہور اس ندر کننگ کپیسہ انت پہچان اس ودی کروس، اگہ نی اُست کروس ہم تو دا ’’زام ءِ پیرئی آ تینا زام ءِ ہم ہرفنگ کتوس آ ‘‘ انتے کِن نم دود اٹ تینا عکس بندی ءِ ہم اوار کرین اُرے، نما نازرک آ دوتیٹ دانا سیک ہم افک۔
مہران: “وخت بدل مسونے، زام نا گپ سلیس داسا۔”
“وخت بدل مسونے یا نما بلوچ نا جبلت بدل مسونے، اوزدے نی ہرانگ اُس کے تینا راج نا حق نا دے آ دود یات بفک نے، بیرہ رنگ اٹ پُچ آتیٹ پازوار تیٹ تینے بلوچ سرپند مننگ نما بلا بے عقلی ءِ۔”
مہران: “نن بلوچ اُن داٹی انت بے عقلی اس مس۔”
“داٹی نما بے عقلی اف، داٹی نما بُن پیرہ تا بے عقلی ءِ کہ نمے دا پِن ءِ خیسن نا تشت اٹ خیسنا دتر اٹ رنگ ہلوکا پُچ نا ذی آتس اک۔ اگہ نما پیرہ آک دا شڑت تخوسُر کہ نُم تینے ہمو تم اسکان بلوچ پاننگ کپیرے ہراتم اسکان نم تینے دانا لائخ کتنرے، اندن تینا پِن اٹ اسُل بلوچ نوشتہ کننگ کپیرے۔”
مہران: “دیر چائک داوڑ کہ ای بلوچ پاننگ نا لائخ ہریٹ افٹ؟”
“ہر کس چائک نی پاہ کنے سال اٹ اخس جون نا ٹیکی دو بریک نمے؟ راسکوہ نا چشمہ آک دیر ایسُر یا نہ؟ گوادر نا میرات دنا بشخ ات ہننگ ءِ؟ مسہ بشخ آ بلوچستان مگہ اسٹ مسک؟ او برانز متکن مس مگہ ’’غلام قوم انت عئید اس کروئے‘‘ گڑا نم امر ۲ مارچ کننگ اُرے؟ غلام آ قوم نُم آجو مسُر ءِ مگہ؟ یا نم تینا قید سرپند مسُر ءِ ہرانا گپ ءِ چندیک کیرہ مگہ نن قید اُن کہ آجو نا پِن ہلینگہ؟ نمے کس نما تاریخ نا سیاہ دروشُم ءِ نشان تتنے مگہ؟ گل خان نصیر نا شئر آک مگہ ہس مسُر یا خورہ کُنگ تے کہ اودے ہم نم گیرام کریر ءِ؟”
مہران: “نن انت کین داسا؟”
“نن انت کین نہ بلکہ نی تینا پاہ، پین تیکن ارپہ نی انت کننگ اُس دا اسیکہ اُر ’’ تینا بلوچ نا تینا پیرہ نا ہنین آ آخہ بلکن خرین آ تاریخ ءِ خوانک‘‘
مہران: “اوڑان گُڈ؟”
اکان گُڈ اگہ نی دا سرپند مسُس کہ دا تاریخ اٹ ہم نن دا دود آتا دے ہڈ تننگ نا لائخ اُن گڑا نا دا ’’مہران بلوچ نا پیرہ نا تینا پازوار تے دننگ کیسا۔”

پنت و شون 

نوشت: نظام نزیری

دی بلوچستان پوسٹ – کالم (براہوئی)

شیرو اسہ بھاز معخول و مارس ئس، او تینا لُمہ باوہ نا اسٹ انگا چُنا ئس. ایہن ہم تینا چُنا خنتے آن زیات دوست مریک ولے شیرو نا لمہ باوہ اودے کچ آن زیات دوست تخارہ انتیکہ اوفتے بیست سال آن گُڈ شیخ و پخیری آن پد اندا اسہ مار ءِ اللہ پاک اوفتا جولی ٹی شاغاسُس.
شیرو نا باوہ خلق آن دےٹکی چنکو باوہ پیرہی ءُ ڈغار ئسے خُشکاوہ نا خولُم تے آ تینا وخت ءِ تدیفیکہ. شیرو نا باوہ اسہ بھاز مخلص، وطن دوست، پنت و شون کروک و سوبر ءُ بندغ اس ئس. ہر کس ءِ خناکہ پنت و شون آن بیدس اوڑتو پین ہیت کتویکہ انتیکہ تینا راج ئنا ڈکھ و ویل آتا بھاز خوڑتی اَٹ نگاء شاغاکہ، اندُن شیرو ءِ ہم ہڑدے پاریکہ علم بندغ ءِ کسر شونی ایتک.
اوفک شیرو ءِ تینا خلق آن ایپار ٹُکر اس جوان مُر پین خلق اسے نا پرائمری اسکول اٹ داخل کریسر، شیر جان دا وختا مُسٹمیکو جماعت نا طالب علم اس ئس، شیرو نا باوہ تینا اُرائی تون اڑدے اندا ہیت ءِ کریکہ کہ شیرو ءِ شار ئنا اسہ جوان ءُ اسکول ئسے اٹ داخل کینہ دا ماشٹر تا کنے یخین اف کہ مُخلصی اٹ چُناتے خوانیفر، دا بس اُراغان بریرہ تینا وخت ءِ دکہ ایتیرہ و سرکار نا تنخواہ ءِ جیب اٹ شارہ، چُنا خوانے یا کہ خوانپ فرخ تمپک تے، دائسکان دافتے داشعور بتنے کہ دا چُناک ننا بروکا تہارمہ غا ننتا چراغاکو، ایلو راج ئنا کسر شونی و آسراتی تا استاکو
ولے اونا اُرائی دا ہیتے اونا امّنا کتوکہ او پاریکہ شیرو پنچ جماعت اسکان انداڑے خوانے مچے بھلن ہم مریک گُڑا اودے شار ئنا اسکول آ درون انتیکہ دائسکان چُنک ءِ اونا شار ئنا اِننگ ننکِن گڑھتی ئسے۔

اسے دے ٹاک نیمروچ مس شیرو اُراغا بتویسُس ایہن ہم پرائمری اسکول آتا چُھٹی دوانزدہ بجہ غا مریک،
لُمہ غا دغار تین مس شیرو نا باوہ مُلک آ ہناسُس پین کسس اَلو کہ شیرو نا لُمہ اودے شیرو نا رندٹ ڈھائی راہی کروسُس، خنک کسر آ ہروک گڑھتی و چُرت اَٹ ہناسُس کہ نئے شیرو نا باوہ ءِ نئے شیرو ءِ۔
ہناکہ پیشن درگہ اسکا بسکہ اُراٹی دوتے پیشانی ٹی تںسکہ یا اللہ انت کیو، یا اللہ شیر جان نا امان ئٹی ء، اندا ہیتا ورد کریسا ہناکہ۔۔۔ وخت و پاس گہر ءِ پیشیم خُڑک ئس ہنداڑتون شیرو نا باوہ درگہ غان پُترینگا توار اس خلک پارے ( بانو) ہلہ شیر جان دائسکان بتنے؟
اونا اُرائی حال و کاران ہناسُس، دروشم تا پوشکن ہڑسینگاسُس پارے ان شیرو ءِ اُر داخہ وخت اٹ شیرو داخس اُرے اسُل کتہ نے۔
شیرو نا باوہ ملاس و لنگڑ نتے ہم پُدین کتو سیکل ءِ تینا ارفے رادہ مس، اُرائی ءِ تینا اُست بڈی تس پارے گڑھتی کپّہ اللہ تیوی آ گڑاتے جوان کیک۔
شیرو نا باوہ جان ہلشسہ بھاز ترندی اٹ ہنا ایپار نا خلق آ مون اسکول نا کُنڈا گیٹ ءِ سر مس، سیکل آن دڑنگا خف تورے چُک ئسے نا ہم توار اَلو ولے اسکول نا درگہ ملوک ئس، مدان مدان ہنا کلاس اَٹ پیہا، ماشٹر چُنا تیتون اوار تُنگان ئس…!
اسہ جِبرو توار اس خلک پارے ماشٹر جی…
ماشٹر جی دریہو کرے، شیرو نا باوہ پاریتے: خیر ءِ استو شوگیر کرینُس! ہچ دڑک لگپک نے تُنگانس، ننے آ شار دڑنگانے، گُڑا نی دا چُناتے انت سرسہبی ایتوس خاچنگٹ!

تاریخ نا پنہ غاک (پنچمیکو بشخ)

نوشتوک: محبوب شاہ

مکران:
برٹش مکران ریاست قلات نا سویل دیکی ءُ صوبہ اس ئسکہ۔ ہراکہ اِرا ضلع غان جوڑ ئس۔ اولیکو پنجگور، ہراکہ گچک نا مشی آ چرجوئی، ہراٹی کہ اِلار نا درخت آک بھاز ئسر، ارٹمیکو کیچ ئسکہ، ہراکہ کیچ انا مش تیان و نیک کور، کوبواہ کورنا کرکی پٹی آ تالان ئسکہ۔ برٹش حکومت اٹ گچکی خواہوت حکومتی قبیلہ ئسکہ۔ ہراکہ راجپوت نسل آن ئسرہ۔دا گچک انا مش تیٹی رہینگارہ۔ ہمو وخت دافک کل پنجگور آتنیا حکومت کریرہ۔ ہژدہ میکو کرن انا بناء ٹی دافتا اسہ چنکو شاخ اس اولیکو وار بلیدہ و پد آن کل کیچ اٹ تینا حکومت و سرکار ءِ جوڑ کرے۔

1850ء ناخڑک آتیٹ نصیر خان اول اسہ وار اوفتے خیر کننگ نا سلہ خلک، اوفک منتوس، ولدا نصیر خان اول زور اٹ گچکی خاہوت ءِ اسہ معاہدہ اس کننگ آ بیوس کرے۔ ہراٹی دا نوشتہ ئسکہ کہ اوفک تہہ و پیشن نا جلہو آتا وخت آ و ہر ویل انا وخت آ قلات حکومت تون سلور۔ ہرانا بدل اٹ اوفتے تینا علاقہ غاتا نیمہ بشخ ءِ ریاست ءِ تروئی تمک۔ گچکیک محمود خان نا دور اٹ قلات حکومت تون ہچ ءُ سمجھوتہ و معاہدہ اس کتوس ولے مہراب خان اسہ وار ولدا مکران آ جلہو کرسا اوفتے دَسّا و اوفتے پدی تینا دُو انا کیرغ آن کرے۔
خان قلات بھاز زُو گچکی تے کیچ و پنجگور اٹ تینا نائب نا جاگہ تِس و وخت وخت اس براہوئی پاروک آ سڑدار آتے ہم تینا نائب جوڑکریکہ۔ ہندا بابت فقیر محمد بزنجو ہراکہ مسہ سال اسکان کیچ اٹ امن کریسس، ہندا دور اٹ پنجگور اٹ جنگ و جھیڑہ غاک کاٹم ہرفیر، ہرانا بھلا سوب سڑداری حکومت ئسکہ۔ہرانا دعویدار آک میر گنجان و میر عیسیٰ خان ئسک ئسُر ولے خان ہم پوسکن آ سڑدار نا گچین کاری نا حق اٹ ئسکہ۔

1876ء نا معاہدہ جیکب آباد (No.XII) اٹ لارڈ بیٹن خان ئتون قول کریسس کہ سنڈیمن ءِ مکران آ راہی کننگک۔ او ہمو جاگہ نا حالیت ءِ جوان کننگ کیک۔ ہرا وخت آکہ او رٹمیکو اوغان جنگ بنا کرے تو سنڈیمن ءِ ہمونگ راہی کننگا ولے جنگ انا سوب آن او 1884ء اسکان مکران آ ہِننگ کتو و ہمو وخت فقیر محمد ہم کزیت کریسس ہندا سوب آن کیچ پنجگور آن زیات پُر آ شوب ءُ علاقہ اس جوڑ مسوسس۔

ولے انڈین حکومت فیصلہ کریسس کہ او خالی مکران نا گچین آ علاقہ غاتیٹی حکمرانی کیک۔ 1896ء ٹی بخال افسر ئسے خان انا کمک اٹ مکران نا ناظم جوڑ کننگا و فیصلہ کننگا کہ دا بخال ءِ خان قلات تینٹ مکران اسکان سر کرو ءِ ولے ایلو پارہ غان مکران اٹ پین چندی بغاوت و ویل آک بنا کریسُر ہرافتے توننگ زور ئس۔ دا بغاوت نا کماش میر مہراب خان ئس۔ہراکہ سڑدار شاہ عمر نا حقی آ ایلم و سڑدار میر بائی خان نا مار ئس، ہرا تینا کماشی ٹی وتینا کمامداری ٹی اسہ عسکری و جنگی فوج اس ہم جوڑ کریسس۔ دا سلاء بند انگا لشکر گوکپروش نا جنگ اٹ باتِس و ہندا جنگ اٹ بلوچ فرزند بلوچ خان نو شیروانی ہم شہید مس ولے میر مہراب خان تینا زند ءِ بچفسا سیم آن پیشن ہنا۔ سڑدار شاہ عمر نا اِلہ عبدالکریم نا کیچ جوڑ مس و برٹش حکومت نا کمک اٹ ورگ نا زند گدریفنگ ئس۔

انڈین حکومت پد آن فیصلہ کرے کہ اسہ پوسکن ءُ ناظم اس مکران اٹ تعینات کننگے۔ ہراکہ مالیات آتیا سیدھا کوزہ کننگ کپ۔ او نائب آتا کار کڑد نا جاچ ءِ ہلے و خان ءِ ہمو جاگہ نا بارو اٹ معلومداری ایتے۔مکران نا علاقائی ادارہ غاک دا وخت آتینا تینا عیاشی تیٹی اختہ ئسر، و اوفتے ہچ سما اَلوکہ مکران نا بڑز کو کہولی ادارہ غاتیٹی انت مننگ ءِ۔

پوسکن آناظم نا بننگ تون گڑاس ہندن ءُ پرمان جاری کرےدُنکہ ناجائز ٹوک ٹکار، سَٹی ہیت آتیا سختی ٹی رکھ خلک ولے داڑان اونا شرف اٹ کمتی بس۔رئیسانی سڑدار نا اِلہ مہر اللہ ءِ دا کاریم کن گچین کننگا، ہرادے کہ بلوچستان نا ہمو وخت انا کل آن زور آور انگا بندغ نا خطاب رسینگاسس و ہندا زُوت آتیٹ برٹش حکومت نا بر خلاف سراوان اٹ پوسکن آ انقلاب نا بناءِ کریسس۔ ایلو پارہ غان او کل سڑدار آتا سڑدار و کماش ئسکہ ہرا کہ خان قلات نا دُو انا کیرغ آن کاریم کننگ خواتوکہ۔ او بھاز زُو اسہ جتاءُ تنظیم اسے نا بنداؤ ءِ تخا، ہراکہ خان آن جتا مرو ءِ ولے خالی مالی کمک اوڑان ہلنگک، یک شخصی حکومت اس ہم ہندا بابت جوڑ کننگا و سڑدار عمر شاہ غا زور شاغنگا کہ او تینا حقی آ ایلم مہراب خان نا جاگہ ءِ کوزہ کے۔

1904ء اٹی مکران لیویز اسہ سیاسی ءُ ایجنڈا ئسے نا وَڑ اٹ سرگڑدان مس، ہراکہ ریٹائر انگا افسر آتا اسہ گروپ ئسے آ تالان مس۔ دافتا چوکی پنجگور اٹ ئسکہ، دافتا کاریم سیمی علاقہ غاتا رکھ و اوفتا فریق آتے کنٹرول کننگ ئس۔ ہندا وَڑ اٹ ناظم مکران آ خان انا جاگہ غا حکمرانی کرسا ہنا۔

1917ء ٹی وخت اس کہ مہر اللہ رئیسانی ریٹائر مس۔ ہندن اونا جاگہ غا انڈین حکومت ریاست قلات ءِ مکران نا کل ءِ علاقہ غاتے 1922ء اٹ ہندا شڑت انا بنداؤ آپدی تِس کہ ہرا وخت اسکان کہ خان قلات نا ایلم نواب بہادر میر اعظم خان ءِ ریاست قلات اٹ خان انا جاگہ غا حکومت کننگ کِن مُلک آ راہی کننگپ۔ دا وَڑ ڈول ہم بے سہب مس۔ اوڑان پد اسہ نائب اس و اسہ وزیر اسے مکران آ حکومت کننگ نا موکل دُو بس ولے گچکی نا جتا انگا رویہ غاک اسہ پوسکن ءُ ویل اس بش کریر۔ اوفک اسہ ایلو نا اختیار آ تیان نمن مسُر۔ دارویہ نا سوب آن سیاسی ایجنٹ آک اسہ ایلو تون توسُر سلابت ہم کریر۔ دانا سوب آن سیمی علاقہ غاتا رکھ اکن بھاز آ ویل آک ودی مسُر۔

مکران نا ڈیہہ ہمو وخت 92299 مربع میل آ تالان ئسکہ، ہرانا کل آبادتی 1921ء انا مردم شماری نا رِد اٹ 17860 ئس و اونا سال انا کٹیا 65791 ئسکہ۔ ہرا حساب کہ 1925-26 اٹ تالان کننگاسُس، اوٹی کٹیا 75791 آن وداسُس۔

قلات نا سیمی علاقہ غاک:
قلات اٹ انڈو یورپین ٹیلی گراف لائن شاغنگ وجوڑ کننگ کن ہمو جاگہ نا میر و متبر آتتون تعلقداری گنڈنگ المی ئسکہ۔ ہراکہ دیکی کیچ انا حکمران آک ئسُر ولے اوڑے ہمو جاگہ نا چیف و لُٹ و پُل کروکاتا نیام اٹ چِک و تاڑ مسکہ۔ داڑان انگریز سرکار فریشان ئس کہ ہراوَڑ کنا کاریم آسانی اٹ مرے۔ ہندا حالیت ایرانی حکومت نا ہم ئسکہ۔ ہندن ایرانی حکومت ءِ دا وار تننگا کہ او تینا ڈیہہ ءِ مرغن کے، و دا مرغنی نا پاناد ءِ ہموتسکان چکے ہراتسکان کہ دیکی کیچ و اونا داپار ایپار نا علاقہ غاک ایران اٹ اوار مفس۔ و اودے دا ہم پاننگاکہ خالی کرکی علاقہ غا اسہ چنکو بشخ اس اِلے۔ ہراکہ چابہار و گوادر نا نیام اٹ ئس و ایرانی حکومت برٹش حکومت نا پاننگ آ مکران ناکل علاقہ غاتیٹی تینا حکمرانی ءِ جوڑ کننگ خواہسکہ ہراکہ خان قلات نا حکمرانی ٹی ئسُر۔

برٹش حکومت تون وخت انا قلات نا معاہداتی سیالداری ئسکہ، ہندا سوب آن خان دا تیوی آ تڑی تیا اسُل خف توتو۔ نئے برٹش حکومت اوفتے سریلہ اِلا، وخت اس کہ کیچ اٹ خان انا حکمرانی آ ایران ناخنک سخت ئسُر۔ ہندن اونا حکمت عملی تے توننگ کن اسہ ڈَل اس شاہ ایران نا پارہ غا راہی کننگا کہ اوڑتون دا بابت اٹ ہیت و گپ کننگے۔ اوڑان پد بیوس مرسا شاہ ایران دا فیصلہ ءِ کرے کہ قلات و ایران نا نیام اٹ سیمی علاقہ غاک بشخنگر۔ دا فیصلہ ءِ انگلینڈ کمیشن نا مون آ منظوری دو بس۔ داسہ ایران آن قلات اسکان برٹش حکومت نا منشا چلینگا کہ و سیمی علاقہ غاک، گوتھر ناریک آن کوہک اسکان اوڑتون ئسُر۔ سیمی کمیشن نا رِداٹ 1871ء اٹ شاہ تون مروک معاہدہ نا رد اٹ پنجگور و پروم اونا علاقہ غاک کوہک، بلیدہ، زامران تون اوار مند و تمپ دیکی اٹ دشت انا کل علاقہ غاک و کرکی سور دِیر ہم ایرانی حکومت ناعلاقہ غاتیٹی بتوکہ۔

داڑان پد ایرانی حکومت شش ضلع ہرافتیٹی کوہک نا سیمی ضلع غاک ہم اوار ئسُر ہرافتیٹی جالک و کلاگان ہراکہ ایرانی سیم آتا ایلو پارہ غان ئسُر، دا بے پاننگ آن و بے سما غان کوہک نا علاقہ غاک راست راست ایرانی سیم اٹ بریرہ یا بفسہ۔ برٹش حکومت ریاست قلات آن کوہک ناعلاقہ ءِ ایرانی حکومت 1874ء اٹ تینا کوزہ تی کرے وایرانی بلوچستان نا سیم اٹ بھاز آ علاقہ غاتے 1896ء ٹی پورو وَڑ اٹ تینا دنگ اٹی اوار کرے۔(No.XXII)

1902ء اٹی اسہ اسیجا ءُ جرگہ اس اڈ تننگا۔ ہراٹی برٹش حکومت نا سڑدار تا و ایرانی بلوچستان نا نیام اٹ دا فیصلہ کننگا کہ سیمی علاقہ غاتا بشخنگ ءِ پورو بیان کننگے۔ ایلو صوبہ غاتا سڑدارک دا معاہدہ ءِ کریر کہ ہر سال ناظم و ڈپٹی گورنر آف بمپور نا نیام اٹ اسہ سیمی اوڑدہی اس الّمی مرے، کرمان نا گورنر جنرل ہمو وخت تینا تیوہ غا زور ءِ ایرانی بلوچستان نا نظم وضبط آتا رکھ و سنبھال کن خلک۔

دا سمجھوتہ غان پد اسہ سیاسی ءُ ایجنٹ اس ٹہیفیر ہراکہ ہشت برٹش افسر آتا پڑک اس ئسکہ۔و ہرا بندغ آک کہ سلاء بند مرور، اوفتے ایرانی گورنر ءِ ایرانی بلوچستان اٹ تننگو ءِ۔ ہراکہ ہموڑے سرمچاری و لُٹ و پُل ءِ تورو۔ ایرانی بلوچستان ہراڑاکہ ایران نا کوزہ ئس، داڑا اونا دسترسی ءِ 1908ء اٹ چٹفنگا۔و بمپور نا گورنر شپ ءِ مہر بہرام خان زور اٹ پُلا۔ تیوہ غا سیمی سمجھوتہ غاک چٹار و برٹش مکران اٹ ہڑدے سرمچاری و چھاپہ مار جنگ برجاء ئس۔

1915ء ٹی میر بہرام خان تینا 1400سپاہی تتون اوار، ہرافک توپ آتیان شُپ ئسر، برٹش حکومت آ جلہو کریر ولے اونا فوج ءِ مند انا علاقہ ٹی مکران لیویز پڑک انا فوجی چھاؤنی پد تمنگ آ بیوس کرے۔ اوفک 36 بندغ ئسر، و چندی وار اوفتیا توپ آتا کمک اٹ جلہو کننگا ولے اوفک ہمت کریر و اوفتے پدی مننگ آ بیوس کریر۔

مکران ٹیلی گراف لائن:
1861ء آن پد چندی معاہدہ غاک ہندا معاملہ غا مسُر۔ دافتیٹی گچین و اہم انگا معاہدہ مکران اٹ لائن شاغنگ ئس۔ تیوہ غان مُست جام آف لسبیلہ تون دسمبر 1861ء اٹ (No.IV) اسہ معاہدہ اس مس۔ہندا معاہدہ نا کننگ آن جام آف لسبیلہ ءِ سال انا 10,000 روپئی کمک تننگاکہ، دا کمک ءِ اودے اونا حکمرانی نا بشخ اٹ لائن انا رکھ اکن تننگاکہ۔ جنوری 1862ء اٹ چندی معادہ غاک میر فقیر محمد تون کننگار ہراکہ ہمو وخت ریاست قلات نا پارہ غان کیچ انا نائب گچین کننگاسُس۔
گوادر لائن انا رکھ کننگ اونا زمواری ٹی بسکہ۔ داکل ءِ معاہدہ غاک ریاست قلات نا منظوری و انڈین حکومت نا مون آ 1862ء اٹ کننگاسُر۔ دا معادہ نا رِد اٹ خان قلات ءِ 16,000 سال انا جتا تننگو ءِ۔ داڑان بیدس جام آف لسبیلہ ءِ 10,000 و اونا نائب ءِ 2000 روپئی سال انا تننگو ءِ۔ دا سوب آن کہ اوفک تینا تینا علاقہ غاتیٹی ٹیلی گراف لائن نا رکھ ءِ ایمانداری و گچین وَڑ اٹ کیر۔ و خان دا تیوی غاتا کماش مرو ءِ و ایلو اوتینا کل زور ءِ لائن انا رکھ اکن مون آ دروءِ۔ اسہ پین معادہ اس (No.VII) ہراکہ 20 فروری 1963ء اٹ خان اتون کننگا۔ ہرانا مون اٹ خان ءِ 5000 روپئی سال انا خراج لسبیلہ و گوادر نا سیمی علاقہ غاتا رکھ اکن تننگاکہ۔ معاہدہ نمبر 6 نا رِد اٹ دا ہم خان انا دوٹی تننگاسس کہ تینا منشانا رِد اٹ امر ءُ بندغ اسے عہدہ ایتے یا جاگہ اس راہی کے۔
مئی 1863ء اٹ دا پڑو کننگا کہ ریاست قلات اٹ باغیک حکومتی پرمان آتے مننگ آ نمن مسُر، ہراڑان اسہ خُلیس اس ودی مس کہ باغیک تو داسہ مون پاش بننگ ءُ، اوفک پاش آن پاش سرکار و خان ءِ چیلنج کننگ ءُ ہندا سوب آن انڈین حکومت اسہ وار اتون جام آف لسبیلہ نا سال انا کٹیا ءِ 10,000 آن 35,000 ہزار اسکان ودّفے۔ دا سوب آن کہ او است انا ہُب اٹ سرکش آباغی تا مون ءِ تورے و ہمو جاگہ نا حالیت آتے سنبھالے۔

دسمبر 1863ء اٹ دا فیصلہ کننگا کہ کیچ انا نائب نا سال انا کٹیا ہراکہ 1862ء اٹ ئسکہ، اوفتے ہموک رسینگو و داڑان بیدس 10,000 روپئی سال انا بہرام خان ءِ پسنی ٹیلی گراف لائن نا رکھ اکن تننگو ءِ۔
1819ء اٹ ہرامعاہدہ کننگاسس، ولدا 1862ء اٹ نائب تون ہم ہندا معاہدہ کننگاسُس۔ (No.VII) اودے 15,000 اسکان ودفنگاسس۔ دافتے اونا جند و میر بائی خان گچکی ءِ گوادر و باہو نا سیم آتے کن تروئی ئس ولے اوفتے دا 15,000 ملتوس۔ انتیکہ دا ودفوک آ پیسہ غاتیٹ دا خواجہ غاک تینا سال انا کٹیا ءِ ودفیسُر۔
ہندا سال جام آف لسبیلہ خان انا برخلاف بغاوت نا پڑو ءِ کرے ولے خان انا فوج آن باتننگ نا سوب آن حکومت ہم اونا دو آن ہنا۔ اونا حکومت خان انا دوٹی بس۔ داہد اسکان کہ جام ءِ سال انا 15,000 رسینگوک آ پیسہ غاک ہم خان ءِ لائن انا رکھ اکن دو بسُر۔

اگست 1870ء اٹی ہرا پیسہ غاتے قلات ءِ رسینگوئی ئس، او رسینگتوس و خان تینٹ تینا خزانہ غان 6600 روپئی تینا سپاہی تے ٹیلی گراف لائن نا رکھ اکن تِس۔ داڑان بیدس 10,000 روپئی جام آف لسبیلہ ءِ ہم سال انا تِس۔ ہرافتے برٹش حکومت ءِ تروئی ئس۔ مہالو سال انا کٹیا ہراکہ 15,000روپئی ئس، اوفتے خان ءِ سال انا تننگ نا بنا مس۔ دا معاہدہ ٹی چکی تاڑی جنوری 1870ء آن بنا کرے۔ 1877ء اٹی خان جام آف لسبیلہ ءِ اونا حکومت ءِ پدی تننگ نا صلہ خلک و دا فیصلہ کننگا کہ او 1861ء نا معاہدہ نا پابندی ءِ کرو ءِ۔ ہرانا پیسہ غاک 15,000روپئی ئسر و ہموفتے جام آف لسبیلہ ءِ تننگو ءِ۔

(برجاء…)

پرّک نا شونق

نوشت: نظام نذیری

دی بلوچستان پوسٹ : کالم

نن نا دہ بجہ ئس اِرغ آن گُڈ چاہ ئسے نا خواست ءِ کریٹ انتئے کہ ہمو دے سُہب ئنا ای و شرفدار عمر زہری صاحب اوفتا اسہ سیل سوات نا جاغہ ئسے آ چمنی و گل گلاپ تخنگ کن ہناسن، بھاز دمدروک ئسوٹہ پاریٹ پاڷی ءُ چاہ اس مرے ولے لُمہ جیجا ہکّل کرے نہ کنا مڷ نے جکّہ ءِ سینہ نا گرفت ءِ پاڷی آ چاہ نا طب آ تمپک گُڑا تورموری نا چاہ اس مرے دمدری ءِ نا خلیک و سینہ ءِ نا خُلکن کیک، ای امنّا کریٹ… دم اسے آن گڈ چاہ جوڑ مس، لمہ جیجا تون ہوار اونا چاشنی آ مہراک چاہ ئنا کُنِنگٹ پین چس اس شاغار، ہیت و گپ کریسا یانزدہ بجہ مس جیجا پارے اِن داسہ خاچ ڈکّہ تینے خید کے نے آرام کہ… پیش تمّاٹ تینا کوٹی نا پارہ غا خاچنگ کِن ولے ہتم نا مُد ئس، نن تا تہارمہیک بے کچ گیشتر مریسہ کریرہ انتئے کہ طوبے نا ہم ڈس اَلّو، اِستاک ام اودیم ئسر، جمراک پینگن تفیسر، ہورہ غاتا توار غامب و غیمب ئسکہ، گروکاک ہم کچ آن زیات جوش ئٹی ئسرہ،
ای مچے ولدا پیشن آ پیش تماٹ گڑا تہوک بھاز ترند و جِبر ئسورک، درغ آتا گڑیپارہ ئسکہ، پِر ئنا تِرتِر ہم بناء مسوسس، ای پدی مسوٹ کوٹَو نا درغ ءِ سخت تفیٹ…، بسٹ دیخس سرجہ غا کاٹم ءِ تخاٹ تنیائی طبیعت نا ناسازی اِیکان، تہارمہ غا نن و ایلو ہورہ و گروک آتا چیلک آک کُننگ کن بسورہ ولے کنا تُغ تے تو پرّیفیر…، بر داسہ پورا کرتے… بجلی ہم اناسُس، دا بھلا تہوتیان…، ایہن نیمون جوڑ اس دا تار تیا چُکس توس بجلی ءِ وار ایتک اننگ کن… داتو بھلو تہو اس ئسکہ… بش مسوٹ، دو بٹیسہ باکس ءِ خناٹ ایہن ہم کنے آن خڑک تخوک ئسکہ انتئے سگریٹ پوک تننگ کن تو کنے وار تفک، تیلی اس لگفیٹ متکنا پیٹی نا پارہ غا خُنذک کریٹ تو کنے کنا ساہ ئنا بند کنا جغر نا ٹُکر کنے آن بھاز خڑک اننگا مہروان آ ادب دوست، پُر فکر آ کنا خواجہ و کنا خنتا دیدہ، ہنینا ایلم خواجہ شرفدار محمد عمر زہری صاحب یات بس انتئے کہ اسہ دے دفتر اٹ ای اوڑتون یات کریسٹ کہ کنتون مُتکنو پیٹی اس تخوک ءِ..!

دا پیٹی کنا زند ئنا داستان ءِ انتیکہ داٹی کنا چُنکی آن ہلیس بیست و پنچ سال اسکان ماضی نا ہر اسہ یات گیری تے جہی کرینٹ، پیٹی ءِ ملاٹ تیوی آن مُست مر ئنا پرہ ءِ ارفیٹ دُنگ اسیٹی مچے سیاہی و کاپی تون اوار اسہ مِش ئنا چراغ اس تخوک ئس. دافتے کشاٹ اوکان گُڈ آدینک نا پارہ غا مون کریٹ تو کاٹمی آ تیل تے آن ارفیٹ چراغ اٹ شاغاٹ سوتلی ءِ تیلی اس خلکُٹ، رَپ رَپ کریسہ چراغ لگّا، اسہ دم تون پوشکُن ءُ روشنائی اس اُرا ٹی تالان کرے. داسکان کاپی ءِ نوِشتہ کِن ارفتویسٹ کہ انداڑتون مِش ئنا چراغ مونٹ بس، خناٹ بھاز تیزو ردوم اسیٹی اسہ زیباؤ پِرّک اس روشنائی نا کُنڈا پرّہ خلیسہ بسّکہ، بھلّا مُرغن آ نن ہم تو اِسپید رنگ ءِ خُڑک شاغاسُس، سُہب آن گیشتری پش اس سلوک ئس، کنادا گُمان اس کہ تینا پاوالی و خلقی آ مخلوق نا بارہ اٹ گڑا اس نوشتہ کیو، دُنکہ ہتم نا گواڑخ ہورہ گروک و تہو تے چلتن نا دامان، بولان نا وَل تے کچی، خُراسان نا زیبائی و اُچ آتا قطار و مابل آلُم، مڈی و شوہان، بُزگل و کُرنو شِتی، ایزک، خواء، زِکّ و خرواڷ، خسّی، خاسُن، خریش و مدر دا تیوہ غاک تینا ہنینا بولی نا ربیدگ و گدان، پژدر، کونٹ و شُفی دا زیبا غا لوزاتے نوشتہ کیوہ، اسہ نظم اسیٹی بند کیو ولے پرّک نا شونق ءِ خناٹ کہ امر تینے شمع غا اُشنگ ءِ اونا عشق اخہ در اعلیٰ ءِ، او امر تینے دا ہجر ئنا گواچنی کننگ ءِ، دا کُڑمبی ٹی ای ڈُب ہناسُٹ کہ ہنداڑتون مُلّا خفتے ٹی الک بانگ تِس.
پین اِچ متو گُڑا نوشتہ کریٹ:
شمع غان در احوال ءِ اَت بر نی
ایتے ڈسّ ءِ اُشوکا پرّک نا…؟

تاریخ نا پنہ غاک (چارمیکو بشخ)

خان خدائیداد خان

نوشت: محبوب شاہ

دی بلوچستان پوسٹ – براہوئی کالم

1896ء اٹی(No.7) و 1870ء اٹی(No.11) ہنداوڑ ہندا معاہدہ ءِ ایرانی بلوچستان تون 1869ء اٹی کننگا ہرافتے مکران ٹیلی گراف لائن انا پن تننگا۔
خدائیداد خان نابحالی آن پد قلات نا تاریخ اٹ مدامی کن خان و قبیلہ غاتا نیام اٹ پدریسہ چکی تاڑی برجا سلیس، داہَد اسکان کہ جھالاوان نا چیف تاج محمد بندی نظر بند کننگا۔ ہراڑان کہ اوکذیت کرے وجام آف لسبیلہ ءِ بیوس کننگا کہ او برٹش حکومت تون باہوٹ مرے ولے 1871ء اٹی سراوان نا چیف مون نا جنگ ءِ بند کرے، دا بے چیٹی تا پد دا مس کہ اوفتا باوہ پیرئی ڈغارک اوفتیان پلنگار، و اوفتے کل رسینگوک آ آسراتی تیان مُر کننگا ہرافتے چندی ادارہ غاک تسرہ۔ وخت اس کہ خان تینے تنیا خنا تو بے وس مس، برٹش حکومت آن کمک خواہس۔او انگریز ءِ سندھ انا تیوہ غا اختیار آتا کوالخواہ جوڑ کرے۔ ہندا سوب آن جیکب آباد والاک بھاز اُست اٹ کریر و خان سڑدار آتیان ہمو تیوہ غا ڈغارتے پدی ہڑسار ہراکہ نصیر خان دوہم نا دوراٹ سڑدار تے تننگاسُر و سڑدار تے پابند کننگا کہ نم ہمو وخت اسکان دا ڈغار تیا کاریم کننگ کپیرے تانکہ نم خان ءِ خراج تتنرے یا نم دا ڈغار تیان مدامی کن دو سلیبو۔و وخت اس ہم دا ڈغار تا پن ءِ ہلپیرے و اگہ نمے آن کس اس ہم بغاوت نا بارواٹ سوچا تو خان تینا طاغت اٹ نما تیوہ غا ڈغارتے تینا سلطنت اٹ اوار کرو ءِ۔ سڑدارک بیوس مسُر خان قلات نا پرمان تے منار ولے اوفک خان ءِ داہم پاریر کہ اگہ خان ننا ڈغار تیا ناروائی اٹ کوزہ کرے تو اونا انجام بھاز خراب مرو ءِ۔

داوڑ انا معاہدہ غاک اصل اٹ خان ءِ تینٹ ہم وڑ توسہ ولے او بیوس ئس او تینا وزیر شاغاسی ولی محمد خان ءِ دا کاریم تا وزیر جوڑ کریسس ولے بھاز زو خان اونا مخالف آتا سوب آن اوڑتون ہم جہڑہ ءِ بناء کرے دا جہڑہ غاک ہمو وخت اسکان چکار ہراوخت کہ قلات نا سیاسی ایجنٹ ہندا وزیر آن اونا کل اختیار آتے پدی ہلک۔ اودے اونا متکن آ جاگہ غا ایس،اونا حیثیت ءِ اسُل ختم کرے۔ انگریز خان ءِ خالی تینا ادارہ غاتسکان کچ اٹ کرے وخان ءِ سختی ٹی پاننگا نی لسبیلہ نا کانود آتے سرفپیس آخا تونی تینا مسخت اٹ سر سُہب مفروس۔ خان قلات ءِ داہم پاننگا کہ ہمو پوریا گرتے زرّ ایتے ہرافتا کاروانک نا سلطنت اٹ پلنگاسُر۔ داکانود سیاسی ایجنت نا ہننگ اسکان ولی محمد نا کماشی ٹی 1883ء اسکان خان انا حکمرانی اسکان برجائس۔ داٹی 1841ء والا معاہدہ ٹی رسینگوک آ زرّ ءِ پدی تروئی الو، اوار ئس۔خان ءِ حوال ملا کہ معاہدہ نا رِد اٹ پوریا گرتا رکھ وسیمی علاقہ تیٹی امن اتنگ آ ہم عمل در آمد مننگ اَلو، ہرانا سوب آن سیمی علاقہ غاتیٹی بے امنی تالان مننگ ئس۔ ہندا سوب آن برٹش حکومت نا بیوسی آن تینے بچفنگ کن تینے آن پرمان جاری کننگ ءِ شروع کرے۔

خان قلات بغاوت آتا وخت آ مری، بگٹی رویہ غاتیٹی اسہ بھلو بدلی اس خننگا۔ او اوفتے جنگ انا پِڑ انا خڑک آ سر کریر، و خان انا پاننگ آ براہوئی پاروک آک مری قبیلہ ءِ بولان پاس انا کسر تتوس، ہراڑان مریک تینا خار ءِ کاروان تا لٹ و پل آن پورو کریرہ۔ او اسہ بغاوتی ءُ پرچہ اس ہم جاری کریر دا حالیت آتیٹی خان ءِ حوال تننگا کہ اگہ اوسیم و برٹش حکمرانی نا علاقہ غا تا رکھ کننگ کپک تو انڈین حکومت تینٹ گام ہرفسا دا علاقہ غا تا رکھ ءِ کیک۔ قلات نا اُلس برٹش حکومت نا علاقہ غاتے اوڑان پنچ ہمو خس زیات زر ّترسا بہا اٹ ہلنگ ئس ۔واگہ کس اس منتو کہ تواودے دزگیر کرسا سزا تننگا کہ و اگہ کس اس نراکہ تو اودے سم اٹ خلکرہ، اگہ ہندن مس تو تیوی آ ریاست اٹ طواف الملوکی ودی مریک و انڈین سرکار تینا خاص کارندہ غاتے داڑے راہی کیک، اگہ مننگ کیک تو گڑاس فیصلہ غان او سڑدار آتا نیام اٹ مننگ نا کوشست کرے۔ ولدا انگریز دا کاریم ءِ کننگ کن کیپٹن سنڈیمن ءِ گچین کرے، ہراکہ تینے تینا لائخی نا سوب آن 1875ء اٹ بھلا بھلا ویل آتے سرتننگ نا سوب آن اسہ پنی ءُ بندغ اس پک کریسس و ہندا سوب آن اودے اسہ اِرا وار بلوچستان اٹ تعینات کریسُر، و اسہ شاہی ءُ دربار اسے ٹی خان و سراوان چیف آتا نیام اٹ امن کرفیسس، ہمو وخت مری بگٹی چیفک ساڑی اَلوس دا واقعہ 1867ء اٹ جولائی نا تو اٹ مستونگ اٹ مسوسس۔
ہندا سال خان ءِ دسمبر نا تو اٹ جیکب آباد اٹ ’’نائب السلطنت‘‘ نا خطاب ہم ملا و دا پوسکن آ معاہدہ ہندا تو انا 8 تاریخ آ پورو مس۔ (No.XII)و1845ء اٹ دافتا جانچ کننگا و ایلو گڑاتے ہم معاہدہ ٹی اوار کننگا و برٹش سپاہی تے کن قلات اٹ ریلوے و ٹیلی گراف لائن ہم جوڑ کننگا۔ سیاسی افسر آتا رکھ و حفاظت خان حکومت نا پارہ غان ئسکہ۔ دانا بدل اٹ برٹش حکومت خان انا سالانہ پنداوڑی ءِ لکھ روپئی کرے۔ ہراکہ 20500 روپئی سالانہ غان بنا کریسس۔ دا زرّ ءِ اِن برنا شونداری و واپاری کسر تا بحالی کن تننگاسس، ہراکہ دا ملک بلوچستان آن گدرینگارہ۔دامعاہدہ بلوچستان ایجنسی نا بنداوئس۔ و 21 فروری 1877ء اٹ میجر سنڈیمن ء ِ(AGG) (ایجنت ٹو دی گورنر جنرل) نا وَڑ اٹ بلوچستان اٹ تعینات کننگاسس، دانا دفتر ءِ کوئٹہ ٹی جوڑ کننگا سس، ہراڑے برٹش سپاہی تا اسہ بھلو کچ اس ڈیوٹی کریکہ، ہراکہ کوئٹہ ملٹری آن ئسر۔

اوغان جنگ انا وخت آ خان خدائیداد خان شاہی وَڑ اٹ برٹش حکومت نا تیوہ غا سربُر آتے خوشی اٹ منا۔1888ء اٹی خان برٹش حکومت نا قندھار ریاست نا ریلوے نا ڈغار ءِ تینا واکی رنگ اٹ ہلک، (No.XII)۔1879ء اٹی دافیصلہ کننگا کہ اخس کہ ضلع غاک کوئٹہ نا داپار ایپار ءُ دافتے برائے راست برٹش حکومت سرکار نا دوٹی تننگے و ایلو بچوک آ علاقہ غاتا واک خان انا دوٹی مرو ءِ۔ 1883ء اٹی اسہ پین پوسکن ءُ معاہدہ اس ہندا بارواٹ (No.XVI)کننگا ودا معاہدہ ٹی اسہ ہیت اس پین ہم اوار کننگا ہرانا رِد اٹ خان خدائیداد کوئٹہ نیابت ءِ اسہ سال اس 25000/-روپئی کراغا ہم تننگ کیک، و ہندا سال اودے سال انا 30000 روپئی تنگک۔ دا ہد اسکان کہ خان بولان تنک انا کسر اٹ واپاری واک انا حق ءِ ہم منہ پیسہ ٹی بہا کریسس۔
ہندا معاہدہ غاتا سوب آن حالیت دے پہ دے آ خراب مرسا کرے۔ 1893ءِ اٹی ریاست قلات نا علاقہ بھاگ اٹ مروک آ سیوت امپ ولڈ انا زمواری ہم خان انا کاٹم آ بس۔ خان خدائیداد خان اسہ جاگہ سے آ ہنداخہ در بیوس مس کہ او انڈین گورنمنٹ ءِ تینا عہدہ غان دزکشی و تینا جاگہ غا محمود خان ءِ تینا جانشین جوڑ کننگ نا کلہو ءِ تِس، اخیر انڈین گورنمنٹ خان خدائیداد خان نا دزکشی نا خواست ءِ منظور کرے۔ و اونا عہدہ غا محمود خان ءِ تخا۔ او اوڑا دوبہ خلک کہ او تینا عہدہ غان غلط ءُ فائدہ ہرفینے، او پیسہ نا جوفہ ٹی برٹش حکومت نا ہر وڑ اٹ مدد و کمک ءِ کرینے، ہراکہ اونا ریاست نا حق اٹ جوان الوس۔
1893ء اٹی خان خدائیداد خان نا جاگہ ءِ اونا مار محمود خان سنبھالا ہراکہ 1864ء اٹ ودی مسوسس۔ او انڈین AGG نا پاننگ آ دا عہدہ غا لگاسس اودے 21 توپ انا سلام تننگا۔
1894ء اٹی بولان پاس انا ریلوے نا ڈغار خان قلات نا حکمرانی ٹی بس۔(No.XX)ہرانا کہ برٹش حکومت ءِ بھاز گرج ئس۔
ہندن قلات وفارس نا سیم آ سور دیر ’’کوہک‘‘ نا ویل ایسر مسوسس ولے دانا سیم بندی کننگتویسس۔ ہندا سوب آن 1896ء اٹی اسہ ڈل و جوائنٹ برٹش وفارس کمیشن نا نیام اٹ ہیت گپ انا فیصلہ مسوسس ہراکہ فارسی و بلوچ آتا ڈغار تا سیم بندی نا بارو اٹ اڈتننگاسس، ہرافتیٹی کہ’’کوہک آن کہ ملک سہی‘‘ ہراکہ وخت آن جانچ کریسُر (No.XVII) ہندا وڑ یا نزدہ سیمی ءُ پٹی جوڑ کننگا ولے فارسی حکومت برٹش حکومت نا جانچ پڑتالی ڈل اٹی اوار مننگ آن نمن مس ہرانا سوب آن جہاندمی پٹی نمبر 11 نا سیم بندی مننگ کتو ولے نشخہ غاتیٹ دادے پیدوار کننگا سس، ہراکہ پد آن غلط مس۔
داڑان گڈ گڑاس فریشانی وویل آک کاٹم ہرفیر، خاص وَڑاٹ ’جاہو‘ نا عمل دخل نا سوب آن ہرا فیصلہ کننگاکہ بے نشان سیم تے ’’اینگلو پرشین کمیشن‘‘ پیدوار کیک۔ پد آن ولدا فیصلہ کننگا کہ بے گرج سیم بندی تے یلہ کننگہ ودا معاہدہ پارس حکومت نا امنائی اٹ ایسر مس۔ (No.XXX) ہراڑان برٹش حکومت میر جاہو نا ڈغار آن دوکشا، ایلو پارہ غان پک مس فارسی حکومت برٹش حکومت آن دیر دننگ کیک و برٹش ناخڑک انا چیک پوسٹ آتے ہم دیر رسیفک۔ دا معاہدہ غان پد حکومت دا فیصلہ ءِ کرے کہ او داڑان پد ہم سیم آتا معاہدہ کننگ کن کمیشن جوڑ کیک۔

1899ء اٹی خان انا تبادلہ ءِ نوشکے آ کننگا۔ اودے انڈین حکومت نا پارہ غان سال انا 9000 پنداوڑی نا وڑاٹ تننگا و 1903ء اٹ نصیر آباد نا نیابٹ آن تبادلہ مس۔ ہراٹی کہ منگچر نا ڈغار ہم اوار ئس۔ ہراکہ 17500 روپئی (NO.XXVII) زرّانا مون اٹ تننگاسس ہمو کل ڈغارک ہراکہ نوشکے ریلوے کن بے حد الّمی ئسر دافتے 1903ء اٹ خان تینا دوٹی ہلک و (No.XXiX)۔ داسہ قلات نا کل واک آک خان قلات نا کل نیابت آک و ہر گڑا وزیر اعظم نا دوٹی بسُر، ہرادے انڈین گورنمنٹ خان انا جاگہ غا تعینات کریسس، داڑان بیدس قبیلہ غاتا ویل اوفتا واگ ءِ پولیٹیکل ایجنٹ نا دوٹی تسوسس۔ و خان قلات دا تینا تیوہ غا واک آتا بدل اٹ سال انا 350,000 ہلسا تینا قلعہ ٹی عینش کریکہ یعنی قوم و وطن نا سودا ءِ خان صاحب دا نہاد اٹ خلک ولے ایلو پارہ غان اسہ قبیلہ اس تینا ایلو سڑدار آتے حوصلہ ترسا پاریکہ کہ خدانا پن اٹ نن عزت دار ءُ بندغ اُن نم کل سڑدارک تینا تینا قبیلہ غاتا معاملہ غاتے تینا دوٹی ہلبو۔

1917ء ٹی خان ریاست نا مالی کمک ءِ باقاعدہ وَڑ اٹ امنا کرے و اسہ سوغندی کاغد اس ٹہیفے و فیصلہ کرے کہ بجٹ نا کل بشخ آتے ریاستی خزانہ ٹی جمع کننگک، و مالیاتی بجٹ ءِ کاریم اٹ اتنگ آن مست خان انا منظوری الّمی ءِ۔ دا سوغندی کاغد نا منظوری ءِ اے جی جی تینٹ کریسس و دا ادارہ کن پوسکن ءُ و جتا ملازمت آتا پڑو ءِ کرے۔
1927ء اٹ خان قلات ءِ اونا حکومت آن اسُل بے دخل کننگا، ہراٹی کہ 1921ء اٹ مروک آ معاہدہ نا رِد اٹ قلات نا تیوہ غا علاقہ غاک ہراٹی خاران مکران نا علاقہ غاک ہرافک 278،72 میل اسکان تالان ئسر، وہرافتا آبادی 281،328 ئسکہ، ٹی دا مالیاتی نظام داسہ نافذ کننگاسس و دا بابت 16 غان 17 لکھ روپئی تننگاکہ، داپیسہ غاتا تننگ کن جوڑ کروک آ سوغندی کاغد خان و انڈین حکومت نا نیام اٹ فیصلہ کننگاسس۔ قلات نا عسکری واک کم مرسا 1926ء اٹ بیرہ 154 شہسوار 28 پیدل گشتی و 20 توپ خانہ ہرافتیٹی 12 کاریم کروک ءُ و 23 بے کار ئسر، و گڑا سیتون سلہہ ئسکہ۔

(برجا ءِ…)

27 مارچ نا شورانک

نوشت: کامران بلوچ

دی بلوچستان پوسٹ – براہوئی کالم

نن تینا زند اٹ بھاز آ ڈَول ئنا شورانک آتیتون مون پہ مون مرینہ، بھاز آ شورانک آتا وخت ئتون اوار علاج مریک و اوفک دُراخ مریرہ و بھاز آ شورانک آک دُراخ تو مریرہ ولے اوفتا ہمو نشانی ننا بدن آ سلیک، و بھازا شورانک آتے ننے تینٹ ہر وخت کرنڈوئی مریک کہ اونا ٹپ تازہ سلہ، ہرانا دڑد آن ننے ہمو دے و ہمو شورانک تروکا یات بریسہ کائے.

27 مارچ 1948ء آ ننا لمہ وطن بلوچستان اندنو شورانک ئسے نا گواچی مس، ہرانا ٹپ اینو اسکان دُراخ مننگ اَف. دا ہمو دے ءِ کہ ہرازدے زوراک آ کوزہ گیر پاکستان، بلوچستان نا خلق، گدان آتے و میری ءِ لتاڑسہ تینا ناپاک آ گام تے دا ڈغار آ تخا، دا ہمودے ءِ ہراڑان نسل ئسے تون بے دادی پوسکنو چِر اس بناء کرے. او وختا پاکستان تینا ودشت نا اولیکو سال ءِ ہم پورو کتویسُس کہ تینا زوراکی تا بناء ءِ کرے. انگریز سامراج نا چالاخی و سازش آتا رِد اٹ جوڑ مروکا غیر فطری ریاست پاکستان تینا بینائی دے زوراکی تے بلوچ و بلوچستان آن بناء کرے.
اینو دا کوزہ گیریت ءِ شست و پنچ سال آن زیات مننگ ءِ و بھازا شیفی بڑزی تیان مریسہ بلوچ قومی جہد تینا پنچمیکو دروشم نا بنائی کرن آن گدرینگسہ. داخہ سال اٹ ہزار آتا کچ اٹ بلوچ مخلوق شہید کننگار، بے گواہ مسر و ہزار آ اُراک درپدر مسر و اینو ہم اندا حالیت برجاء ءِ ولے سوج دا ودی مریک کہ او ہرا سوب آکو اینو اسکان بلوچ جہد اسہ سوگَو ءُ دروشم اسیٹی بفک؟
داخہ در قربانی تننگ آن گڈ ہم اسہ طاغت ئسے نا ودشت ءِ کننگ کپک کہ او کوزہ گیر تون مُون ایتے و تینا آزات آ حیثیت ءِ اسیکہ وا دوئی کے؟
دا ہیت آن کس نمّن مفرو کہ دا وار بلوچ قومی جہد مالو نا ارفوکا جُہد آتیان سوگو ءِ و بھاز آ سرسہبیک اینو دوئی مسونو ولے حالیت آتیا خوڑتی اٹ اُننگے گڑا خواست آک بھاز خننگرہ ہرافتیان اینو ہم بلوچ جُہد مُرسلوک خننگک.
اینو اسہ پارہ غا دژمن نا طاغت و زوراکیک زیات مننگو و ایلو پارہ غا بلوچ جہد نا کوالخواک اسٹ ایلو نا زنچک آتیٹ ہلوک خننگرہ. دا وار نا جُہد ءِ سائنٹفک اصول آتیا تالان پاروکاک دا الّمی فریشانی ہیتس مرے کہ ہرا رِد اٹ نن بھلو دعویٰ کننگ ئسون اوفتیان دائسکان بلوچ کوالخواک ہورک خننگرہ. دا گچین ءُ ایت ئسے کہ بھاز آ تنظیم آک اینو اسہ جاہ مریسہ جُہد کننگ نا پڑو کرینو ولے دا ہم الّمی ءُ ہیت ئسے کہ دا بیرہ پڑو اسکان سلیپس بلکن عملاً کاریم کریسہ تینا اسٹی ءِ نشان ایتر و ایلو پارہ غا اندا اسٹ مروکا تنظیم آتا کنڈا بھاز آ ایلو تنظیم آتیان مُرّی ہم بھلو سوج بش کیک ہرافتا ورندی تا پٹنگ جُہد نا کالخواہ تا زمہ واری تیٹ بریرہ.
سرفیس پارٹی تا حالیت آ چمشانک اس شان گڑا اوفک ہم بھاز سفت کننگ لائخ پاننگ مفسہ، انتئے کہ داڑے ہم شخصیت پرستی، پارٹی پرستی نا دکّ ئٹی بسونن ہراڑان قومی جہد ءِ دا نسخان مس کہ مخلوق ءِ باور کریفنگ کن ڈنّی ملک آتیٹ ہم اسہ بھلو مچی اس ہڈ تننگ اٹ ہم نن اینو بے سہب خننگنہ یا جہانی ادارہ غاتیٹ بلوچ وطن نا آزاتی و بلوچستان اٹ بندغی حق آتا لتاڑنگ نا بابت ننا موقف ءِ مونا ہتوکا بندغاک اُور تیا حساب مریرہ.
27 مارچ نا دے گواچنی ہمو شورانک ءِ ہرا ننے یاتگیری کریفک کہ دائسکان لمہ وطن کوزہ گیر نا دوٹی ءِ، بلوچ مخلوق دائسکان زوراکی تا گواچی ءِ، دائسکان بلوچ نا خلق آک بوٹ آتیٹ لتاڑنگسہ ءُ، دائسکان ننا مخلوق بے گواہ مریسہ ءِ.
اگہ نن دا شورانک نا ایسری و دا مرض آن دُراخی ءِ خواوہ گڑا تینا ذات، ہنا و است خواہی تیان پیشن مریسہ حقیقی وڑ اٹ زمینی خواست آتا رِد اٹ تینا کاریم تیٹ سوگوی نشان تریسہ دژمن تون مُون ایتن نہ تو دا شورانک بے دُراخ مریسہ اندنو مرض اسیٹی مَٹ مرو ہرانا علاج ہچبر مننگ کپرو و دادے نن اندن سوگ کریسہ، مودہ کشیسہ گدریفسہ کرون.