بلوچ جند ندر رفیق بزنجو نا باوہ پین مُسہ سیال آتیتون اوار پاکستانی فورسز و ڈھکوک ادارہ تا کارندہ تا دو آن زوراکی ئٹ بیگواہ کننگانے۔

ٹی بی پی نیوز ڈیسک ءِ رسینگوک حوال تا ردئٹ کوئٹہ ئٹ ’جند ندری جلہو‘ ئٹ پاکستانی لشکر نا کارندہ تے ٹک کروک محمد رفیق بزنجو بلوچ عرف وشین نا باوہ مراد علی و مُسہ سیال غلام قادر نا مار اسماعیل، غلام قادر نا مار طارق و گل حسن ءِ پاکستانی عسکری ادارہ تا کارندہ غاک زوراکی ئٹ بیگواہ کرینو۔

حوالکار آک ٹی بی پی ءِ پاریر کہ پن کروک بندغ آتے 9 نومبر آ میر مولا بخش گوٹھ، دارو ہوٹل حب آن پاکستانی لشکر و ڈھکوک ادارہ تا کارندہ غاک دزگیر کریسہ بیگواہ کرینو۔

پن کروک بندغ تا بابت دائسکان ہچ وڑ ئنا حوال رسینگتنے۔

دیہاڑی عمل نا جوڑشت

ڈاکٹر مبارک علی| مٹ : برناز بلوچ

دی بلوچستان پوسٹ

دیہاڑی عمل نا جوڑشت ئٹ کیہی عناصر آک بشخ ہلیرہ۔ ہندن کہ بندغ نا علم دیمروی کرسا ءِ اوڑتون اوار ہی دیہاڑ نا اودیم مروک پہلوک مونا برسا ءُ۔ داٹی آرکیالوجی بھلو کڑدار اس مونا ہیسنے۔

پوسکنا وخت ئٹ کیہی انقلاب آک دیہاڑ نا باروٹ ننا نظریہ غاتے مٹ کرینو۔ اولیکو انقلاب بندغی دیمروی نا مراحل آتا ءِ ، ہرادے ڈارون تینا کتاب On The Origin of Species ئٹ ہرا 1859 ئٹ شینک مسوسس، ٹی درشان کرینے۔ ارٹمیکو اہم ئنگا انقلاب اَرکیالوجی نا شعبہ ٹی کاربونیٹنگ نائے، ہرانا کمک ئٹ متکن ئنگا گڑا تا باروٹ دا ٹہیفنگک کہ دا اراتم یا ارا کرن ئٹ جوڑ مسوسر۔ مسٹمیکو انقلاب DNA نائے، ہرا بندغی گروہ تا نسل نا تعین ءِ کیک۔

دا مسٹ ئنگا انقلاب آک آرکیالوجی نا علم ئٹ ودکّی کرسا اودے شابیت تسر۔ مثیل ئسے نا خل یا کانسی نا وخت ئنا قبرستان آتیا تحقیق کرسا قبر آتیٹی کھڈ مروک بندغ نا ازباب و سلہہ غاک دو بسر۔ دافتا کمک ئٹ چاہندار آک او وخت نا چاگڑدی دیہاڑ ءِ جوڑار۔ ہراتم آرکیالوجی نا علم ءِ سائنسی بنداو آ جوڑ کننگا گڑا داڑان تدوکا وخت ئتون تفوک بےکچ معلومات دُو بس، ہمو تہذیب آک کہ ہرا دا وخت اسکان کھڈ ئسر۔ اوفک دیہاڑ نا سرحال جوڑ مسر۔

متکنا وخت نا عمارت و کھنڈرات آتا پٹ و پول آن فنِ تعمیر ئٹ بندغی علم نا باروٹ معلوم مس مثیل ئسے نا احرامِ مصر نا عمارت آک اینو ہم ہُروکا تے ہبکہ کیرہ۔ ہراتم اول احرام نا بنیات تخنگا، گڑا او ریک آتیٹی بھس ہنا۔ اوکان پد مصر نا ماہرِ تعمیرات آک اول سوگو پلیٹ فارم ئسے نا بنیات ءِ تخار تاکہ او عمارت نا باریم ءِ سگنگ کے۔ احرام آتا تفنگ آن متکنا مصر نا تہذیب نا گمان مریک۔ ہرا تنیا فنِ تعمیر آخہ بلکن ریاضی و جیومیٹری ٹی ہم ماہر ئسر۔ اوفک Mummification نا وسیلہ ئٹ مرگ ئتون مون تسر کہ اوفک دوارہ ہندا جہان ئٹ برور و ہڑدے ئی زند گدریفور۔

بندغی دیہاڑ ئٹ راج آتا نیامٹ جنگ آک مرسا بسنو۔ ہندا خاطران ہر راج ئٹی جہدکار آتا بھلو شرف اس مسکہ۔ انتئیکہ دافک تنیا تینا راج ءِ رکھیتورہ بلکن ایلو راج آتیا جلہو کرسا اوفتا ڈغار تیا قوضہ کریرہ و مالِ غنیمت ءِ لٹ و پل کرسا ہیسرہ۔ ہندا خاطران جہدکار آتے اوفتا بہادری و بھلن حوصلہ آتیکن چاگڑد ئٹ بھلو مقام اس تننگاکہ۔ ہمرکہ بخال آتیٹی کشتری ذات آ فرض ئس کہ او جنگ کے۔ یورپ ٹی نائٹس نا تپہ ہم جہدکار یا جنگجو مننگ نا سوب آن پنی ئس۔ ہندا خاطران متکنا وخت ئٹ ہر راج تینا بندغ آتے جوڑ و طاغتور خننگ خوائسکہ۔ تاکہ اوفک جنگ ئنا پڑ آ ثابت قدم رہینگر۔

متکنا وخت نا حکمران آتے دا ہیت آ گمر ئس کہ اوفک جنگ آتے کھٹانو و دژمن آتا لس خون ءِ کریر۔ تینا دا کارنامہ غاتے اوفک خل تیا نوشتہ کرفسہ نصب کرفیر۔ ہندنکہ تاریخ نویسی آ اوفتا اجارہ داری ئس۔ ہندا خاطران ظلم و بربریت نا تدینیک اوفتا کارنامہ جوڑ مسر و دیہاڑ ئٹ اوفتے عظیم جوڑ کرسا مونا ہتنگا۔ ولے گواچن ئٹ اوفک ہیرو آخہ بلکن دیہاڑ نا ڈوہ دار ءُ ۔

دیہاڑ ئٹ مَٹی نا اسہ اہم ءُ وسیلہ اس بندغ آتا اہمیت ءِ ۔ بندغ آک اسہ جاگہ غان ایلو جاگہ غا ہمو وخت ہنپ بٹ کریرہ ہراتم ڈھکال، خشک سالی، ناجوڑیک و ڈنی جلہوکار آتا خُلیس مسکہ۔ ہنپ بٹ نا عمل بھاز ڈکھیا و ساہ ہلوک مسکہ۔ مثیل ئسے نا ہراتم چین آن قبائلی جنگ آتا سوب آن کُشن قبیلہ ہنپ بٹ کرے و ازبکستان ئٹ بس آبات مس۔ گڑا اوفک اسہ بھلو سلطنت ئسے نا بنداو ءِ تخار۔

کُشن خاہوت نا حکمران آک اوغانستان و پنجاپ ئٹ تینا حکومت جوڑ کریر۔ اوفک بُدھ مذہب ءِ گچین کریر۔ حکمران کنشک نا وخت ئٹ ہندوستان ئٹ بدھ مذہب نا منّوک آتا کیہی کانفرینس آک مسر، ہرافتیٹی چین و جاندم دےٹک ایشیاء نا بندغ آک شرکت کریر۔ دا مذہبی اشتماع تیٹی بدھ مت اِرا فرقہ ٹی بشخ مس۔ اسٹ مہایان یعنی بھلا پہیہ والا و ارٹمیکو بُنیان یعنی چنکا پہیہ والا۔ دا عہد ئٹ بدھ مت وسعتِ ایشیاء ، اوغانستان، کشمیر، سندھ و قطب دے کہی ہندوستان ئٹ تالان مس۔

دیہاڑ ئٹ دود و ربیدہ و تہذیب راج آتا پجار نا چیدہ رہینگانو۔ دود ربیدہ قبائل یا برادری تیٹی رُدیک، ہرافک مَش یا جنگل آتیٹی آزاتی ئٹ زند گدریفیرہ۔ ہندا خاطران اوفتا عادت و سوچ ئٹی بھاز مچٹ مَٹی بسکہ و دافک تینا قبائل یا برادری نا دود و ربیدہ آتا پابند مسرہ۔ دا حالیت اینو ہم برصغیر نا قبیلہ و برادری تیٹی ساڑی ءِ ہرافک تینا دود ربیدہ آتا پابند ءُ ۔

دانا مقابلہ ٹی تہذیب شار آتیٹی ودی مریک و وخت ئتون اوار بریبر مٹ مرسا کیک۔ بلکن کیہی دود ربیدہ غاک ہم تہذیب نا بشخ جوڑ مریرہ۔ تہذیب نا پن آ جہان ئٹ تعصب و خار ودی مس۔ جنگ آک مسر و دترچری نا وسیلہ ئٹ تہذیبی برتری ءِ ثابت کننگا۔

دیہاڑ نا جوڑشت ئٹ سیاست ، علم و ادب، آرٹ، مجسمہ تراشی و پوسکنو فلسفی ءُ فکر و خیال آک مریرہ، ہرافک دیہاڑ ءِ ہنوکا وخت آن کشیسہ آخبت نا کنڈ آ دیرہ۔ ہندا خاطران دیہاڑی عمل ءِ سرپند مننگ کن بندغ نا جوزہ، اونا فطرت، اونا خیال و سوچ ءِ خواننگ المی ءِ ۔ دیہاڑی عمل ئٹ تہو و چرک نا ہم بھلو کڑدار اس ارے ہراڑے بندغ فطرت تون مقابلہ کیک و تینا وجود ءِ برجا تخک۔

بلوچستان نا ضلع نوشکے ٹی بھلو کچ ئسے آ لشکر کشی برجاء ءِ۔ گن شپ ہیلی کاپٹر آتیتون اوار فورسز آتا کیہی گاڑیک مَشی آ لڑ ئنا پارہ غا ہِنوک خننگانو۔

حوال تا ردئٹ اینو سہب ئنا پاکستانی لشکر نوشکے نا مَشی آ لڑ دو سہہ و ایب کیب ئٹ لشکر کشی بناء کرینے ہراڑے ہیلی کاپٹر آتا بال اسہ وڑ برجاء ءِ۔

حوالکار تا ردئٹ دئے ئنا کچ گاڑی تیٹ پاکستانی لشکر نا کارندہ تے پن کروک علاقہ نا پارہ غا گام خلیسہ خننگانے۔

دا وخت آ علاقہ ئٹ حوالکاری نظام محدود کننگانے۔ کوالخواک دا بابت دائسکان ہچو شابیتی حوال فراوان کتنو۔

تدوکا دے تیٹ بلیدہ غان پاکستانی لشکر نا دو آن زواکی ئٹ بیگواہ مروک اِرا ورنا، سخی داد نا مار وہاب و سمیر آجو مسنو۔

ہڑتوم آ ورنا تے شکار نا وخت 11 نومبر آ فورسز آک دزگیر کریسہ بیگواہ کریسر۔

خاہوت نا ردئٹ ہڑتوم آ ورنا تے فورسز آک میتاپ نا علاقہ غان دزگیر کریسہ تینا کیمپ آ دریسر، و اوکان پد اوفتا بابت ہچو حوال اس رسینگتوسس واہم استو ہڑتوم آ ورناک یلہ کننگانو۔

دا تدینی بلوچستان ئٹ زوراکی نا بیگواہی تا برجاء غا لڑ ئنا بشخ ئسے، ہراڑے چرجوئی ئٹ کیہی بندغ آک پاکستانی لشکر نا دو آن زوراکی ئٹ بیگواہی نا گواچی کننگانو۔

برجاء سال نا اکتوبر ئٹ 127 بندغ نا زوراکی ئٹ بیگواہی نا رپورٹ آک مونا بسر، ہرافتیان کیہی بندغ آک دائسکان بیگواہ ءُ۔ نومبر ئٹ دائسکان 33 بندغ نا زوراکی ئٹ بیگواہی نا تدینیک رپورٹ مسنو۔

بلوچ یکجہتی کمیٹی و وائس فار بلوچ مسنگ پرسنز دا زوراکی نا بیگواہی تا ترند مذمت کریسہ جہانی ادارہ تیان دمدستی کاروائی نا خواست کرینو۔

ہڑتوم آ تنظیم آک تینا بیان تیٹ پارینو کہ بلوچستان ئٹ نہ بیرہ بلوچ الس ریاستی تادی تون مون تننگ ءِ بلکن داڑے نا شاری تا زند ہم بھیم نا گواچی ءِ۔

دا تنظیم آتا پاننگ ءِ کہ بلوچستان ئٹ دنو اسہ خاہوت یا اُرا اس اف ہرا ریاستی تادی و زنک ایسری آن زیمی متنے۔

اوفک جہانی برادری آن خواست کرینو کہ اوفک دا بھلا بندغی بحران آ چپ مفس و دمدستی بلوچستان ئٹ برجاء زوراکی نا بیگواہی تا برخلاف گام ارفر۔

بلوچستان ئٹ برجاء دا نیستی آ جہانی بندغی حق آتا ادارہ تا چپی آ سوج آک بش مریسہ ءُ، و بندغی حق آتا باسک آتا پاننگ ءِ کہ ہراتم اسکان دا زوراکی نا بیگواہی تا برخلاف جُوان کاروائی کنگتنے ہموتم اسکان بلوچستان ئٹ ایمنی ہتنگ مننگ کپک۔

سمارٹ فون ننا زند ئنا المی بشخ اس جوڑ مسنے ولے جانجوڑی آ اونا منفی زیم آک ہم تمنگ ءُ۔ سمارٹ فون (موبائل) تُغ ئٹ خرابی و اسٹریس نا سوب ہم جوڑ مننگ ءِ۔

اسہ جرمن ماہر نفسیات ئسے نا اسٹریس کم کننگ کن منہ سَلاہ:

سنگت آتیتون حوالکاری ٹی مننگ، ویڈیو یا حوال آتے اوننگ، اپوائنمنٹ آتا خیال تخنگ و وار وار وخت ءِ اوننگ۔ اینو نا وخت ئٹ سمارٹ فون ننا ہڑدے ئی زند ءِ جوڑ کننگ ءِ۔ بھاز آ بندغ آتیکن سمارٹ فون کاریم ئٹ ہتنگ بھاز زیات مریک، ہرانا منفی زیم آک تمرہ۔

جرمنی نا ماہر نفسیات نکولا جانسن پائک کہ سمارٹ فون ءِ تینا جیب، دراز یا گڑا کاغد یا پیڈ ئنا شیف آ تخبو۔ دا ماہر نفسیات نا ردئٹ سمارٹ فون ءِ خن تیان مُر تخنگ جوان ءِ۔

نکولا جانسن نا جرمنی نا بریمر اپولون یونیورسٹی آف ہیلتھ اکنامکس ئٹ لیکچر تریسہ پاننگ ئس کہ اگہ نم پام و فکر ئٹ کاریم کننگ یا ہیل کننگ خوائرے گڑا موبائل ءِ تینے آن مُر تخبو۔

اونا ردئٹ کیہی مطالعہ تیان دا پاش مسنے کہ بندغ نا مِلی ہمو وخت ہم اسٹریس ہارمونز کشیک، ہراتم موبائل فون آ نوٹیفکیشن آک بریرہ و نم خن تے دیخس تر کریسہ اوفتے ہُریرے۔

خاچنگ وخت آ موبائل فون ءِ کوٹی آن پیشن تخبو!

اونا پاننگ ئس کہ تُغ ئٹ خرابی نا زی آ پولکار سائنسدان آک سیل فون ءِ ”خاچنگ نا کوٹی آن پیشن“ تخنگ نا سَلاہ ایترہ۔ نکولا جانسن نا پاننگ ئس کہ سال 2010 آن سال 2017 نا نیام ئٹ تُغ ئنا خرابی نا ویل آتیٹ 300 درسد آن زیات ودکی مسنے و پٹ و پول پائک کہ ڈیجیٹل میڈیا نا تالان مننگ داٹی اہم کڑد سر تسنے۔

پٹ و پول نا ردئٹ اگہ تُغ پورا متو و اسہ ہم بندغ اس ہراتم دے ئنا بنا ءِ کم طاغت تون کیک، ہمو وخت ہم اسٹریس ہارمونز آک پیشتمرہ، اندن ذہنی ناجوڑی تیٹ بھلو کچ ئسے آ ودکی مننگ نا اسہ اہم سوب اسٹریس ءِ۔

واہم نکولا جانسن نا گیشتر پاننگ ئس کہ اونا مسخت ڈیجیٹل میڈیا ءِ اسُل گندہ پاننگ اف بلکن اونا پٹ و پول نا مسخت اسٹریس ءِ کم یا اودے جوان وڑئٹ حل کننگ نا وڑ ڈول تے ودی کننگ ءِ۔

موبائل و ٹیبلیٹ نا نیلی روشنائی، تُغ ئنا دژمن

اندا ماہر نفسیات نا ردئٹ خواننگ آن سماء تمک کہ خاص وڑئٹ ورناک تینا خاچوک ہند ئنا رہی آ سمارٹ فون ئنا سوب آن فریشانی محسوس کیرہ۔ او پائک کہ سوشل میڈیا ءِ کاریم ئٹ ہتنگ تینے آ باور کننگ آ ہم زیم شاغک۔ ورناک سوشل میڈیا غا تینا تول ءِ ایلوفتیتون کیرہ و دا تول کننگ آن تینے رکھنگ داخہ اڑزان اف، اخس خیال کننگک۔

جانسن سَلاہ تس کہ تینا کوٹی تیٹ سمارٹ فون ئنا جاگہ غا گھنٹی خلوکو گھڑی تخبو و وار وار وخت ئنا ہُننگ کن ہم دو ئنا گھڑی کاریم ئٹ ہتبو۔

اسٹریس ئٹ کمبوتی کن موبائل فون ئنا گچین کروک وخت ہم کمکار مننگ کیک۔ مثیل ئسے نا نن ئنا ہشت بجہ غان پد موبائل ءِ کاریم ئٹ ہتپننگ۔ اندا وڑ نوٹیفکیشن آتے بند کننگ و پیہن و مون موڈ ءِ مَلنگ سمارٹ فون ئنا کاریم ئٹ ہتنگ ءِ کم کننگ ئٹ کمکار مریک۔

نکولا جانسن نا ردئٹ دا غٹ گام تیان اسٹریس نا کچ دمدستی کم مریک۔ اگہ نمے گمان مریک کہ نم تینا سمارٹ فون ءِ تینا اُست خواہی آن زیات کاریم ئٹ ہتنگ اُرے، گڑا نم اونا پین ذریعت اس پَٹنگ کیرے۔ مثیل ئسے نا نم کتاب خواننگ بناء کبو، ورزش کبو یا گڑا چرینگ کن پیشتمبو۔

ضلع کیچ نا علاقہ شاپک ٹی نا درست بندغ آک پاکستانی فورسز ءِ بمب جلہو ئٹ ٹک کرینو۔

ذرائع تا ردئٹ دا جلہو ئٹ فورسز ءِ نسخان رسینگانے اندن کوالخواک دا جلہو ٹی اسہ کارندہ ئسے نا ٹپی مننگ ءِ ہم پک کرینو۔

واہم جلہو نا ذمہ واری ءِ دائسکان کس ارفتنے ۔

خیال مرے کہ برجاء تُو بلوچستان ئٹی پاکستانی لشکر آ مروک جلہو تیٹ اسہ ترندی خننگک۔

تدوکا ہفتہ کوئٹہ ٹی اسہ خودکش جلہو اسیتون اوار پاکستانی لشکر آ بھیم بش کروک جلہوک مسونو، ہرافتیٹ پاکستانی لشکر ءِ بھلو کچ ئسیٹ جانی نسخان تون مون تروئی تمانے۔

قلات و ہرنائی ٹی ارا جتاء جلہو تیٹ اسہ میجر اسیتون اوار کم و ود اسہ درزن کارندہ مرگ ئنا گواچی و بیست ٹپی مسر ۔

ہرنائی جلہو نا ذمہ واری ءِ بلوچ سلہہ بند تنظیم تا سیوتی تنظیم ‘براس’ ارفے، اندن قلات جلہو نا ذمہ واری ءِ بلوچ لبریشن آرمی ارفینے ۔

بلوچستان نا ضلع قلات و مچھ ئٹ پاکستانی لشکر نا لشکر کشی برجاء، ہیلی کاپٹر آتا ہن و بر۔

درو آن قلات نا مَشی آ لڑ تیٹ پاکستانی لشکر نا لشکر کشی برجاء ءِ اندن علاقہ ئٹ حوالکاری نظام بند کننگانے۔

لشکر کشی ٹی پند آ کارندہ تیتون اوار ہیلی کاپٹر آک بشخ ہلنگ ءُ، کیہی ہند آتیا شیلنگ نا ہم حوال آک رسینگانو۔

اندا وخت آ بولان نا علاقہ مچھ ئٹ اینو مسٹمیکو دے ہم لشکر کشی برجاء ءِ۔

حوالکار آک ٹی بی پی ءِ پاریر کہ آب گم، گونی پرا، و ایب کیب نا علاقہ غاک لشکر کشی نا پلویڑ ئٹی ءُ۔

کوالخواک لشکر کشی نا بابت دائسکان ہچو شابیتی حوال فراوان کتنو اندن علاقہ تیٹ حوالکاری نظام نا بند مننگ نا سوب نسخان تا بابت حوال آتے اسکان سر مننگ ئٹ سختی تیتون مون تروئی تمنگ ءِ۔

خیال ئٹ مرے بلوچستان نا ضلع قلات نا علاقہ جوہان ئٹ شاہ مردان نا ہند آ بلوچ لبریشن آرمی نا سرمچار آک درے ننکان پاکستانی لشکر نا کیمپ ءِ اسہ جلہو اسیٹی ٹک کریر ہرانا سوب آن 7 فورسز کارندہ مرگ ئنا گواچی اندن 18 کارندہ ٹپی مسوسر۔

جلہو نا ذمہ واری ءِ بلوچ لبریشن آرمی ارفینے واہم بی ایل اے نا پارہ غان شابیتی بیان دائسکان شینک متنے۔

صنعتی انقلاب آن مست ئنا یورپ

ڈاکٹر مبارک علی| مٹ: برناز بلوچ

دی بلوچستان پوسٹ

صنعتی انقلاب آن مست یورپی چاگڑد پدماندہی نا اسہ عکس اس ئس و اوٹی بے برابری تینا گڈیکو کچ آتے اسکان سر ئس۔ ولے ولدا ٹیکنالوجی نا بننگ و صنعت آتا جوڑ مننگ یکدم اونا بخت ءِ مٹ کرے۔

دیہاڑ ئٹ بھاز آ تدینیک ہنداخس اہم مریرہ کہ اوفک تدوکا و ساڑی آ وخت ءِ جتا کرسا اِرا بشخ کیرہ۔ تدوکا وخت قدامت پسندی نا چیدہ جوڑ مریک۔ ہندا وڑ ساڑی آ وخت دیمروی کن کسر پٹیک۔ صنعتی انقلاب نا اہمیت نا گمان ہمو وخت مریک ہراتم اوڑان مست یورپ نا چاگڑد نا سرجاچ ءِ ہلنگ مرے و اونا پدماندہی ءِ خوڑتی ئٹ اوننگ مرے۔ صنعتی انقلاب یورپ نا بیرہ زرگزرانی و چاگڑدی زند ءِ مٹ کتو بلکن ذہنی دیمروی نا سوب او تدوکا وخت آن آزات مرسا آخبت کن کسر گچین کرے۔ دا سرہال آ Carlo M. Cippolla تینا کتاب “Before The Industrial Revolution” یا صنعتی انقلاب آن مست، ئٹ یورپ نا ذکر ءِ کرینے۔

یورپ نا چاگڑد مسہ تپہ ٹی بشخ ئس۔ مذہبی اوغدہ دار، اُمراء و الس، اول اِرا تپہ مراعات یافتہ ئسر۔ ریاست نا بھلا اوغدہ آتیا ہندافتا تقرر مسکہ۔ اُمراء تیکن جنگ اسہ کاروبار اس ئس۔ انتئیکہ داٹی اوفک لُٹ و پل کرسا مڈی و دولت مچ کریرہ۔ دا تومکا طاغتور انگا تپہ غاک ہچو ٹیکس اس ہم تتورہ۔ ٹیکس ئنا بھلا باریم الس آ ئس۔ بے برابری نا سوب آن امیر و غریب نا نیامٹ بھلو فرق اس ئس۔ نیستی و لنگڑی نا سوب ڈوہ داری تیٹی ودّکی بسوسس۔ بھلا ڈوہ داریک فیوڈل لارڈز آتا کماشی ٹی اڈ تننگ مسرہ۔ دافتیٹی میڷ تا دزی قابلِ ذکر ءِ ۔

بےروزگار ورنا تیکن کاریم نا موقع غاک بھاز مچٹ ئسر۔ دافک ہمو بھٹی تیا کاریم کریرہ ہراڑے آہن تے دِیر کننگاکہ۔ موڷ ئٹی دم ہلنگ نا سوب آن اوفتا کُفت آک نزور مسرہ۔ گڑاس ورناک کوئلہ نا کانڑ تیٹی کاریم کریرہ ہراڑے صاف تہو نا کمبوتی مسکہ۔ گڑاس ورناک مویشی تا سِل تے صاف کریرہ۔ اندا خاطران اوفتیٹی ناجوڑیک لس ئسر۔ ڈاکٹر آتا کچ بھاز مچٹ مسکہ۔ علاج کن بھاز مچٹ پیسہ مسکہ۔ اسپتال ئٹی اسہ بیرم آ اِرا مریض اوار لیٹارہ۔ اندا خاطران ورنا تیٹی کہنگ نا کچ گیشتر ئس۔ چاگڑد ئٹ چرچ نا ادارہ تنیا طاغتور الو بلکن صاحبِ جائیداد ہم ئس۔ انتئیکہ اُمراک کہنگ آن مست تینا زرعی زمین نا اسہ بشخ اس چرچ ءِ تسرہ تاکہ دانا بدلہ ٹی اوفتے جنت رسینگہ۔ ارٹمیکو مذہبی ادارہ خانقاہ تا ئسک۔ داڑے راہب آک دے مچ عبادت ئٹی اختہ مسرہ۔ دا اسہ ہندنو ادارہ اس ئس ہراڑے وے لائخ و بیکار انگا ورناک راہب نا دروشم ئٹ تینا زند ءِ گدریفیرہ۔ خانقاہ تا خڑچ آتیکن ہم اُمراء تا پارہ غان ہندنو زمین تننگاکہ ہرافک زرخیز مسرہ۔ راہب آتا دا فرقہ غیر پیداواری ئس، ہرا چاگڑد نا زی آ زرگزرانی ردئٹ اسہ باریم اس ئسر۔

یورپ ٹی یانزدہ میکو کرن آن سینزدہ میکو کرن اسکان ہمو وخت مَٹی بس، ہراتم اوٹی شار تا بنداؤ تخنگا۔ رومی سلطنت نا ایسری آن پد فیوڈل لارڈز آک تینا جاگیری آ قلعہ آتیٹی رہینگارہ۔ داڑے اوفتا ملازم و فوج آک ہم رہینگارہ۔ مذہبی اوغدہ دار، تاجر و الس کن چنکو خلق مسکہ۔ ہرافتا آبادی بھاز مچٹ مسکہ ولے ہراتم تاجر آک ایلو ڈیہہ تیان تجارت ءِ بناء کریر گڑا امپورٹ مروکا سامان تیکن اوفک پانزدہ یا ہفت دے ئی بازار اڈ تسر۔ داڑے خڑک نا خلق و آبادی تیان بندغ آک بننگ بناء کریر۔ مدان مدان آ دا بازار آک مستقل منڈی تیٹی مٹ مسر۔ ہراڑے دکّانک مسرہ، ہرافک ضرورت نا ہر گڑا ءِ بہا کریرہ۔ دانا نتیجہ ٹی بوراژوازی تپہ ودی مس، ہرا ذہنی ردئٹ دیمروی پسند ئس، و فیوڈل لارڈز آتا مقابلہ ٹی بھاز عمل کروک و سرسہبی کن ہر موقع ءِ کاریم ئٹ ہیسکہ۔

شار آتا اہمیت ہمو وخت مس، ہراتم حکمران آک پوسکنا شار آتا سرپرستی ءِ کریر۔ شار آتیٹ آباد مروک تاجر آک جتا جتاؤ ادارہ جوڑ کریر، ہرافتیٹی میونسپلٹیک ہم اوار ئسر۔ میونسپلٹی تا کاریم شار ئٹ صفائی ءِ اوننگ و ڈوہ داری تے توننگ نا ئس و بندغ آتے اوفتا بنداوی حق و گرج آتے تننگ نا ئس۔ شار ئٹ دا وڑ تاجر آتا حکومت ئس و اگہ اسہ بزغر اس نرّیسہ شار آ بسکہ گڑا اودے دزگیر کننگتوکہ۔ اسہ جرمن وساعت اس ئس کہ شار ئنا فضا آزات کیک۔

شار آک اسہ پوسکنو دود ربیدہ اس ہم مونا ایسر۔ تعلیمی ادارہ آتیان بیدس ادب، آرٹ، ساز و زیمل و تعمیرات آتیٹی ہم پوسکنو فکر و خیال مونا ایسر۔

بورژوازی تپہ تینا سرمایہ، تعلیم و سیاسی آزموندہ آتا بنیات آ فیوڈل لارڈز آتا اثر ءِ ایسر کریر، ہراتم فیوڈل لارڈز آک شار آتا دیمروی ءِ خنار گڑا اوفتے مارشت مس کہ اگہ اوفک تینا جاگیر آتیا تینا قلعہ آتیٹی بند سلور گڑا اوفتا تسلط ایسر مرو۔ ہندا خاطران اوفک شار آتیٹ ہم تینکہ بھلو جاگہ تفیر، ہراڑے اوفک منہ وخت کن بسرہ رہینگارہ۔ ولے بورژوازی تپہ نا مونا اوفتا طاغت نزور مرسا ہنا۔

دا آزموندہ غان ہندا گمان مریک کہ ہمرو چاگڑد اس مرے اوڑے مَٹی تینتون تینٹ بفک بلکن اودے ہتنگ کن چاگڑد نا ذہن ءِ مٹ کروئی تمک، ہرا دا منّے کہ متکن انگا روایات آتیٹی دیمروی مننگ کننگ کپک، دیمروی کن پوسکنو خیال و فکر و ٹیکنالوجی نا گرج مریک۔ یورپ نا چاگڑد ئٹ دا گرج ءِ پوسکنا ٹیکنالوجی پورو کرے۔ خاص وڑئٹ واٹر مِل ہرا بندغی خواری تے کم کرسا اودے آسراتی تس۔ دا نقطہ نظر ئٹ ہراتم صنعتی انقلاب ءِ خواننگ مرے گڑا ننے اونا اہمیت نا گمان مریک کہ اود جہان ءِ مٹ کننگ ٹی انت کڑدار اس مونا ایسنے۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارینے کہ بی ایل اے نا سرمچار آک قلات ئٹ کوزہ گیر پاکستانی لشکر نا کیمپ ءِ جلہو ئٹ ٹک کریر۔ دا جلہو نا ذمہ واری ءِ ارفنہ ترجمان پارے کہ دا بابت شابیتی حوال زوت میڈیا غا شینک کننگو۔

یاتی مرے بلوچستان نا ضلع قلات ئٹ استو نادرست بندغ آک پاکستانی لشکر نا اسہ کیمپ ئسے ترند حالیت نا جلہو اسیٹی ٹک کرینو۔

کوالخواک جلہو ئٹ ہفت کارندہ نا مرگ ئنا گواچی مننگ و ہژدہ نا ٹپی مننگ ءِ پک کرینو۔

کوالخواہ تا ردئٹ قلات نا علاقہ شاہ مردان ئٹ ننکان نادرست بندغ آک جتا پارہ غاتیان پاکستانی لشکر نا کیمپ ءِ بھلو حالیت ئسے نا جلہو ئٹ ٹک کریر۔

مرگ ئنا گواچی مروک کارندہ تا چاہنداری نیک بخت زمین، غلام اسحاق، عبدالقدیر، رضوان، وقاص، علی عباس، و ثاقب رحمان نا پِن تیٹ مسنے۔

جلہو ئٹ ہژدہ کارندہ ٹپی ہم مسنو ہرافتے کوئٹہ سی ایم ایچ آ دننگانے۔

خیال ئٹ مرے بلوچستان ئٹ برجاء ہفتہ ئٹ مروک جلہو آتیٹ اسہ وار آ ودکی خننگ ئٹ بننگ ءِ۔ برجاء ہفتہ بلوچستان نا جتا علاقہ تیٹ چِل و پنچ آن زیات جلہوک رپورٹ مسنو۔

بلوچ سلہہ بند تنظیم آتا سیوت ”براس“ درو اسہ بیان اسیٹی چِل و پنچ جلہو تیٹ میجر تون اوار بیست کارندہ ءِ مرگ ئنا گواچی کننگ نا ذمہ واری ارفیسس۔