تدینگوکا تو 27 جنوری آ پاکستان نا درالحکومت اسلام آباد آن عوامی ورکرز پارٹی و پشتون تحفظ موومنٹ نا 23 باسک ءِ دزگیر کننگا۔ ہرافک پشتون تحفظ مومنٹ نا کماش منظور پشتین نا دزگیر کننگ نا خلاف برانز ارفنگ ئسر۔
پاکستان نا پنی ءُ جریدہ اس دا باروٹ نوشتہ کرے کہ دزگیر مروکاک بھاز خوانندہ ءُ ورنا ئسر۔ ہرا برطانیہ و پاکستان نا پنی آ یونیورسٹی تے آن دن کہ”لمز” آن تعلیم دوئی کریسر۔ گمان آن پیشن آ گپ دادے ہرا بندغ کن او برانز ارفنگ ئسر او غٹ ئنا زی آ غداری نا مقدمہ کننگانے۔ اسے پین واقعہ اس ہراٹی مُسہ سد خوانندہ آتیا ہم غداری نا مقدمہ کننگانے او گدرینگوکا سال دسمبر اٹ پاکستان نا شار لاہور اٹ خوانندہ آتا حق آ تیکن برانز ارفنگ ئسر۔
پاکستان نا آئین نا بشخ 124 الف غداری و حکومت نا خلاف بے جاراتی تالان کننگ نا باروٹ ءِ۔ کالونیل دور نا دا قانود ءِ تاج برطانیہ دا سوب آن جوڑ کریسس کہ اونا کوزہ و حکومت نا خلاف ہچو توار اس بش مف۔ داکان پد دا قانود پاکستان نا سلاء بند کوالخواتا کاریم اٹ بننگ ءِ ہراوڑ کہ صدی اس مست ہندوستان آ کوزہ ءِ برجا تخننگ کن تاج ءِ برطانیہ نا کاریم اٹ بسوسس۔
فرخ تمپک کہ دا قانود اخس بے دادی کروک و دا اخسو گچینو ہند اس تخک کہ جہان کالونیل دور ئنا سیا غا قانود آتے جہان آن ایسر کننگے ولے پاکستان اٹ سلاء بند کوالخوا تیکن دا قانوداسے است خوش ءُ چَم ئسے ہرانا سوب آن آسانی ئٹ مخلوق نا توار ءِ بند کننگک۔او تینا است خوائی آ مخلوق،گَل یا بلوچ کونا تیوی قوم ئنا خلاف آجو کاریم اٹ ہتنگ کیک۔
بلوچستان اٹ دا چَم بھاز وخت آن کاریم اٹی اتنگسہ ءِ، اسے اندنو ڈغار اس ہرا 2014 اٹ الجزیرہ نا میڈیا کن اسے ”روزن سیاہ” نا پن تننگا۔ ہراڑے بیانیہ نا تخلیق بیرہ سلاء بند کوالخوا، و پاکستان نا راجی میڈیا نا اسٹ ایلو تون کمک آن بسکہ۔ غداری نا ہمو الزام آک، دا مقدمہ غاک دا بیانیہ نا مُخ نا ہڈ جوڑ مسونو ہرانا بنماسی آ مسخت بلوچستان نا برجاء تحریک آتا مسخت ءِ جتا وڑ اٹ نشان تننگ ءِ۔ و خاص وڑ اٹ غداری نا الزام ءِ بنیات جوڑ کریسہ پنجاب ءِ بلوچ آتا سیاسی و انسانی حق آتا باسک آتا مونا بش کننگ ءِ دا پالیسی نا نشان تس دے ٹکی پاکستان و داسہ ئنا بنگلہ دیش اٹ خننگانے۔
اہلِ پنجاب بلوچستان نا بابت اٹ مدام اسٹبلشمنٹ نا ہیت آتیا ایمان ایسنے، داسہ کہ پاکستان تینا دارالحکومت و پنجاب نا تہٹی آسانی اٹ غداری نا الزام خلے و مقدمہ ٹی پِن کریسہ کے گڑا داسہ دا ہیت پاش مرے کہ اسٹبلشمنٹ ہرا عمل ءِ غداری پائک اونا مطلب دا اف کہ ہمو بندغ ریاست نا دژمن آن پیسہ ہلیسہ ایجنٹ ئسے بلکن دا نا مطلب دادے کہ او بندغ یا گل اونا بے انصافی و ظلم ئنا خلاف تینا توار ءِ بڑز کننگ ءِ ہرا اوتا یا اوتا ڈاغار آ مننگ ءُ، برجاغا تحریک جائز و لَس مخلوق نا ءِ۔ برانز ارفیسہ بے جاراتی و بے بروسئی نا درشانی جہانی قانود نا رِد ئٹ و تیوی جہان نا درشانی نا آزادی تروک حق نا قانود اٹ بریک۔
