ڈی جی آئی ایس پی آر نا پریس کانفرنس: دعویٰ غاک، کچ و زمینی گواچنیک – ٹی بی پی سرگپ
سی و یک جولائی نا پیشیم آ پاکستانی لشکر نا ترجمان لیفٹیننٹ جنرل احمد شریف چوہدری نا پریس کانفرنس ئٹ بلوچستان نا برجاء غا حالیت، بیگواہ بندغ و ایلو ویل آتیا شابیتی ئٹ ہیت کننگا۔ فوجی ترجمان بلوچستان نا بابت دا ہیت ءِ رد کرے کہ بلوچستان چرجوئی ئٹ بدحالی یا تیوہ بد امنی نا پلویڑ ئٹی ءِ۔ اونا پاننگ ئس کہ بھاز آ کڑدہ غاک رضا ئٹ بلوچستان نا حالیت آتے خراب پارہ۔ پریس کانفرنس ئٹ مونا ہتوک کچ و حساب نا ردئٹ تیوہ ملک ئٹی 40,348 ڈھکوک بنیات آ آپریشن کننگانے، ہرافتیٹی کل آن زیات یعنی سی و یک ہزار آپریشن بلوچستان ئٹ مننگ نا دعویٰ کننگا۔ واہم اندا کچ و حساب اسہ جتا ءُ سوج اس ہم ودی کیک کہ اگہ بلوچستان ئٹ حالیت آک انداخہ جُوان ءُ، دنکہ سرکاری بیانیہ پائک، گڑا ہر وخت دنو بھلو کچ ئسے آ بلوچستان ئٹ فوجی آپریشن آتا گرج انتئے ودی مننگ ءِ؟ مگہ داخس ءُ بھلو کچ اسیٹی آپریشن آک تینٹ دا ہیت ئنا شاہدی افس کہ بلوچستان دائسکان اسہ غنجل سکیورٹی نیستی ئسے آن تدینگ ءِ؟ اندا ہمو ہیت ءِ ہراڑے سرکاری ہیت و زمینی گواچنی تا نیام ئٹ اسہ مُری اس خننگک۔ اگہ تدوکا کیہی سال آتیان بھلو کچ ئسے آ آپریشن آک برجاء ءُ، گڑا بلوچستان انتئے دائسکان ہم بھیم بش کروک حالیت آتا گواچی ءِ۔ دا وڑ گڑا بلوچستان نا ویل بیرہ سلہہ بند کاروائی تے اسکان متو۔ داڑے ریاستی رٹ، سیاسی کالخوائی، بندغی حق آک و السی باور کون آ گڑاک ہم بُنداوی اہمیت تخرہ۔
اگہ بلوچستان نا حالیت آتا خوڑتی و غیر جانبداری ئٹ جاچ ہلنگہ گڑا زمینی گواچنیک سرکاری بیانیہ غان بھاز جتا خننگرہ۔ بلوچستان ئٹ ہڑدے فورسز آتیا جلہو تا حوال آک مونا برسا کیرہ۔ اندا وڑ بلوچستان نا اہم کسرک تیوہ بے رکھوک ءُ، رکھ ئنا خُلیس نا سوب آن ٹرانسپورٹر خواجہ غاک تینا گاڑی تے سلیفسا برانز ہم کننگ ءُ و رکھوک سفری ماحول نا خواست کننگ ءُ۔ اگہ تدوکا کیہی سال آتیٹی کروکا ڈھکوک بُنداو آ فوجی آپریشن آتا جمعی کچ ئنا جاچ ہلنگہ گڑا دا پاش مریک کہ ریاست بلوچستان ئٹ ہر وخت ویل آتیتون مون ایتک۔ اندا ردئٹ دا ہیت ودی مریک کہ حالیت آتے جُوان گوندنگ زمینی گواچنی تیان اسُل چپ ءِ۔
آئی ایس پی آر بلوچستان نا خراب حالیت آتا تیوہ غا ذمہ واری ءِ جہانی اٹکل آتیا شاغا۔ واہم بلوچستان نا خراب حالیت آتے بیرہ پیشن ملکی اوڑدئی یا پیشن نا اٹکل آتا نتیجہ گوندنگ زمینی گواچنی تا تیوہ شاہدی ءِ تفک۔ بلوچستان نا ویل ئنا روتہ کیہی دہک آتیا تالان سیاسی، چاگڑدی و راجی ویل آتیتون تفوک ءِ۔ بلوچستان ئٹ سیاسی پدماندئیک، بیگواہ بندغ تا ویل، و جتا وخت آتیٹی کاریم ئٹ ہتنگوکا رکھ ئنا سخت پالیسیک و بندغی حق آتا ویل آک بلوچستان ئٹ خننگوک آ بے جاراتی نا اہم سوب آتیٹی اوار ءُ۔ اندا خاطران بلوچستان نا ویل ئنا گواچن دوست آ جاچ دا خواست کیک کہ اودے بیرہ پیشن نا مداخلت نا ردئٹ ہُننگ، انصاف نا خواست آتیا دڑنگپک، بلکہ ہمو تہہ ئنا سوب آتا ہم سوبری ئٹ جاچ ہلنگہ ہرا سال آتیان دا جاگہ نا مخلوق نا شکائست آتا سوب جوڑ مسنو۔ بیرہ رکھ ئنا گامگیج یا تیوہ ذمہ واری ءِ پیشن نا سوب آتیا شاغنگ آن ویل ئنا جتا پالو تے تیوہ وڑئٹ پہہ مننگ ممکن مفرو۔
بلوچستان ئٹ اگہ اسہ ویل اس کل آتیان زیات نازرک ءِ گڑا او بیگواہ بندغ تا معاملہ ءِ۔ تدوکا اِرا دہک آن دا ویل ملکی سیاست، بندغی حق آتا شرہ و پیشن ملکی ادارہ غاتا پام ئنا بنجاہ مسنے۔ ریاستی ادارہ غاک اندا پارسا کرینو کہ بھاز آ بندغ آک پیشن ملک یا ایلو علاقہ تیا ہنانو، اندن تدوکا دے تیٹ پریس کانفرنس ئٹ ہر وخت آنبار ڈی جی آئی ایس پی آر اندا بیانیہ ءِ ولدا درشان کرسا پارے کہ بیگواہ بندغ آک سلہہ بند تنظیم آتیٹی ءُ۔ بلوچستان ئٹ زوراکی نا بیگواہی نا معاملہ غا جہانی بندغی حق آتا ادارہ غاک ہم وخت وخت خُلیس نا درشانی کرسا بسنو۔ اقوام متحدہ نا زوراکی نا بیگواہی تا بابت کاریم کروک ٹولی پاکستان نا بابت کیہی کیس آتیا کاریم کرینے۔ اندا ادارہ جتا وخت آتیا پاکستان آن خواست کرینے کہ بیگواہ بندغ تا معاملہ نا صاف پٹ و پول کننگہ و زہمی مروک خاہوت آتے معلومداری تننگہ۔ اندا وڑ بندغی حق آتا جہانی تنظیم دنکہ ایمنسٹی انٹرنیشنل و ہیومن رائٹس واچ ہم تینا رپورٹ آتیٹی بلوچستان ئٹ زوراکی نا بیگواہی تا دوبہ غاتا زکر ءِ کرسا کرینو۔ بیگواہ بندغ تا ویل بھاز نازرک و بندغی حق آتا معاملہ ہزار آ خاہوت آتا دڑد، ودار و اذیت تون تفوک اسہ بندغی المیہ ئسے۔ دا ڈول نا بیان آک زہمی آ خاہوت آتا ٹپ آتیا بے چَٹنگ نا برابر مننگ کیک۔ اگہ ریاست گواچن ئٹ تینا ہیت ءِ سوگو و منّنگ نا لائخ جوڑ کننگ خوائک گڑا اونا کسر لس دعویٰ تیٹ آخہ بلکہ صاف پٹ و پول، پک شاہدی، غیر جانبدار عدالتی پام و قانود ءِ اسہ ڈول کاریم ئٹ ہتنگ آن گدرینگک۔ نہ گڑا دن انگا بیان آک نہ بیرہ بلوچستان ئٹ مالو آن ساڑی بے باوری ءِ گیشتر کڑمب کرور بلکہ ہمو خاہوت آتا مارشت آتے بھاز ڈکھ ایتور ہرا سال آتیان تینا بندغ آتا بننگ نا اُمیت ئٹ زند گدارینگ ءُ۔
آئی ایس پی آر نا پریس کانفرنس ئٹی بلوچستان نا ویل آتا اسہ سوب اس بھاز آ سڑدار و قبائلی اشرافیہ نا کڑد ءِ ہم پِن کننگا۔ ریاستی ہیت آتیٹی ہنوکا وخت آن دا پاننگسا مننگ ءِ کہ بلوچستان نا ویل آتیٹی بھاز آ ہندی طاغتور آ تپہ غاک و پیشن نا بندغ آک اوار ءُ۔ واہم دا ہیت آتیا بلوچستان نا بھاز آ راج دوست کڑدہ غاک ترند اختلاف کیرہ۔ اوفتا پاننگ ءِ کہ برجاء غا وخت ئٹی بلوچستان نا کیہی زہم تخوک سڑدار و قبائلی بندغ آک ریاستی ادارہ غاتیان خڑک تکنگرہ و اوفتے سیاسی عمل ئٹ اہم ءُ ہند اس دوئی ءِ۔ راج دوست نغدکار آتا دوبہ ءِ کہ ہنوکا وخت ئٹ ہم ریاستی پالیسی تا ردئٹ دن انگا سیاسی و قبائلی دروشم تے اہمیت تننگا ہرا بنجاہ کن منّنگ نا لائخ ئسر، اندن ہمو سیاسی توارک ہرا زیات خودمختاری، مڈی تیا اختیار یا سخت سیاسی مؤقف تخارہ، اوفتے چپ کرفنگا۔ راج دوست جماعت آک و بھاز آ سیاسی جہدکار آتا دوبہ ءِ کہ ہنوکا وخت ئٹ سیاسی انجنیئرنگ نا ذریعت ئٹ دن انگا بندغ آتے زیات اہمیت تننگا ہرا ریاستی پالیسی تیان خڑک ئسر، اندن اختلاف تخوک توار آتے محدود کننگا۔
بلوچستان ئٹ ہر تدوکا دے اتون اوار حالیت آک گیشتر غنجل و خراب مرسا ءُ۔ امن و ایمنی، سیاسی نزوری، معاشی پدماندئی، و زوراکی نا بیگواہیک مخلوق نا بے جاراتی و ریاست آ باور نا کمبوتی ءِ ودی کننگ ءُ۔ اندن ریاست نا ترند و عسکری ڈول نا پالیسیک بلوچستان ئٹ نیستی نا مارشت و ریاست آن مُری ءِ گیشتر کڑمب کرینو۔ اگہ برجاء غا ڈول فکر و پالیسیک اندا مسر، و زمینی گواچنی تیان چپ بیانیہ تراشنگ نا لڑ اندن برجاء مس، گڑا بلوچستان نا حالیت آک گیشتر غنجل مرور۔ ہرانا سواد سدھا سلہہ بند تنظیم آتے رسینگو۔ ایلو پارہ غان، بلوچستان نا گواچن آ سیاسی، چاگڑدی و راجی ویل ءِ خن تیان چپ کرسا تیوہ غا ذمہ واری ءِ پیشن نا سوب و پیشن ملکی اٹکل آتیا شاغنگ نہ بیرہ گواچن آن نرّنگ ئسے بلکن اندنو پالیسی ئسے ہرانا سوب آن تدوکا کیہی سال آتیان بلوچستان نا حالیت آک خراب مرسا بننگ ءُ۔ ہراتم اسکان ریاست تینا ردی تے مارِسا مخلوق نا شکائست، سیاسی حق و انصاف نا خواست آتے سوبری ئٹ منتنے، ہموتم اسکان بلوچستان ئٹ ایمنی نا تغ گواچنی نا دروشم ہلنگ کپرو۔