پاکستان فلور ملز ایسوسیشن نا صدر سید صالح آغا پارینے کہ حکومت خولم نا صوبہ غان پیشن دننگا موکل تننگ اف ہرانا سوب آن نُت ئنا کمبوتی ودی مننگ کیک۔ حکومت پابندی تے مر کتو گڑا سہ شنبے آ برانزی نُت مِل آتے بند کینا۔
کوئٹہ پریس کلب اٹی پریس کانفرنس کریسہ سید صالح آغا پارے کہ داسہ بلوچستان فلور ملز ئتون تنیا مسہ دے نا کوڑ ارے۔ بلوچستان نا حکومت نہ محکمہ خوراک نا کمک ئٹ خولم ہلک و نہ نُت مل آتے موکل ایتک۔
او بھاز افسوز ئٹ پارے کہ اندا سال آ حکومت بلوچستان بیرہ دئے لکھ گونی خولم ہلنگ نا موکل تسونے ہرافک صوبہ نا خواست ئنا رد ئٹ بھاز کم ءُ۔
سید صالح آغا پارے کہ اگہ حکومت خواست آ تے ایسری تتو و صوبہ غان پیشن پابندی تے ایسر کریسہ ننے خولم ہلنگ نا موکل و ملک ئنا ایلو صوبہ تا وڑ پالیسی تتو گڑا بلوچستان نا کل نُت ئنا مِل آتے نادرست وخت اسکان بند کرون۔