پاکستان ئٹ تدوکا بیست و چار گھنٹہ نا نیامٹ کورونا وائرس آن پین 21 ناجوڑ کسکر، و کورونا نا اسہ ہزار 991 پوسکن ءُ کیس مونا بسونو۔
سرکاری حساب نا رِد ئٹ 21 پین کہوک آن گڈ ملک ئٹ کورونا آن کہوک آتا کچ شش سد 39 مسونے۔ اسہ ہزار 991 پوسکنا کیس آتیان گڈ ملک ئٹ دائسکان رپورٹ مروک کیس آتا کچ 29 ہزار 421 مسونے۔
سرکاری کوالخوا تا پاننگ نا رد ئٹ پنجاب ئٹ دائسکان 11 ہزار 93 بندغ کورونا آن زیمی مسونو۔ سندھ ئٹ دائسکان 10 ہزار 771 بندغ کورونا آن زیمی مسونو و بلوچستان ئٹ کورونا نا ناجوڑ آتا کچ اسہ ہزار 935 ءِ۔
خیبر پختونخوا ئٹ دائسکان کورونا نا چار ہزار 509 ناجوڑ مونا بسونو و پاکستان نا بست و بندی کشمیر ئٹ 86 و گلگت بلتستان ئٹ 430 بندغ کورونا آن زیمی مسونو۔ اندن وفاقی دارالحکومت اسلام آباد ئٹ دائسکان 641 بندغ کورونا نا گواچی مسونو۔
کورونا آن دا وخت اسکان تیوہ غان زیات کہنگ کے پی ئٹ مسونو ہرافتا کچ 234 ءِ اندن پنجاب ئٹ 192 بندغ دا دَین آن کوڑی ءِ یلہ کرینو۔
سندھ ئٹ کورونا آن دائسکان 180 بندغ کسکنو و بلوچستان ئٹ کورونا 24 بندغ نا زند ءِ کیدا۔ کورونا آن گلگت بلتستان ٹی چار و اسلام آباد ئٹ پنج بندغ کسکنو۔
پاکستان نا بست بند ئٹ کشمیر ملک نا اسٹ آ بشخ ءِ کہ اوڑے دائسکان کورونا آن ہچو کہنگ رپورٹ متنے۔
کرونا آن جانجوڑ مروک بندغ آتیٹ پنجاب تیوہ غاتیان مون ئٹی ءِ ہراڑے دائسکان چار ہزار 240 بندغ جانجوڑ مسونو۔ سندھ ئٹ اِرا ہزار 20 بندغ دراخ مسونو اندن بلوچستان ئٹ دن انگا بندغ آتا کچ 242 و گلگت بلتستان ئٹ 303، کے پی ئٹ اسہ ہزار 86، کشمیر ئٹ 60، اسلام آباد ئٹ 72 ءِ۔