کوئٹہ: بلوچستان نا سر وزیر جام کمال خان نا کماشی ٹی کابینہ اجلاس اڈ تننگا ہراٹی بھازا گڑاتا بابت موکل تننگا۔ اَسے فیصلہ ئس دا ارفنگا کہ نائب تحصیلدار نا 58 خالی انگا پوسٹ آک بلوچستان پبلک سروس کمیشن نا ردئٹ بھرتی کننگ مریرہ۔ فیصلہ نا مسخت دادے کہ نوکری تیٹی میرٹ و لائخی ءِ مون آ اتنگ مرے۔
کوئٹہ ٹی پائلٹ پروجیکٹ نا وڑٹ شاری جائداد آتا ٹیکس تون تفوک گڑاتا جی آئی ایس آ تالان کمپوٹرائزیشن سسٹم نا ٹہیفنگ نا موکل ہم تننگا۔ منصوبہ غا بلوچستان یونیورسٹی آف انفارمیشن ٹیکنالوجی اینڈ منیجمنٹ سائنسز نا رِدٹ عمل کننگ مرو۔ دانا مسخت دادے کہ پراپرٹی ٹیکس نیٹ ءِ شابیت کننگ مرے۔
روشن بلوچستان پروگرام نا کمک ئٹ سولر سسٹم آتا خلق، ہسپتال و خوانندہ جاہ آتے بجلی تننگ نا منصوبہ ٹی ترمیم کننگ نا ہم موکل تننگا۔ دا پروگرام نا برجائی ہمو علاقہ غاتے آ ہم مریک ہرا نیشنل گریڈ تون تفوک ءُ۔ ہمو علاقہ غاتیا ہم مریک ہرا نیشنل گریڈ تون تفوک افس۔
بی پی پی آر اتھارٹی نا ایمرجنسی کلاز آتا موکل تننگ کن چیف سیکرٹری ءِ دانا اختیار تننگ نا موکل تننگا۔
کابینہ اجلاس آ دا ہم موکل تننگا کہ محکمہ صحت و پی پی ایچ آئی نا رِدٹ 4 ضلع ٹی BHU’s آتیٹی ٹیلی میڈیسن نا طریقہ علاج نا پائلٹ پروجیکٹ تون اوار اوار صوبہ نا غُٹ BHU’s آ تیٹی ٹیلی میڈیسن منصوبہ نا بندات کننگ مریک۔
دانا ہم موکل تننگا کہ محکمہ سائنس اینڈ انفارمیشن ٹیکنالوجی تون فائلنگ منصوبہ کن ایم او یو سائن مریک۔
اجلاس ٹی محکمہ خزانہ نا رِدٹ شیفکو محکمہ غاتا آڈٹ کننگ کن انٹرنل آڈٹ یونٹ ءِ انٹرنل آڈٹ چارٹر نا موکل تننگا۔
محکمہ خواراک نا پارہ غان غلہ ہلنگ نا بابت کابینہ اجلاس ءِ بریفنگ تریسہ پاریر کہ بار دانہ زمیندار آتے تننگانے ہرافتا دسنگ نا کاریم نا بندات کننگانے۔ دا ہم پاننگا کہ غلہ نا گودام آتا کاریم ، جوجک کسفوک دوائی، اسپرے گودام آتیکن تیار ءُ۔ غلہ بہا اٹ ہلنگ آن پد اسے جاہ کننگ کن گودام آتے راہی کننگ مریک۔
سیکرٹری خزانہ نورالحق بلوچ کرونا وائرس نا رِد ئٹ معاشی اثرات و قرض حسنہ اسکیم نا بابت اجلاس ءِ شابیتی اٹ حوال تریسہ پارے کہ اسکیم کن بنا ٹی 55 کروڑ رپئی تخننگانے۔ ہرافتے اخوت فاؤنڈیشن نا اواری ٹی صوبہ نا 25 ہزار حق دار آ بندغ آتیٹی بیست ہزار روپی اسے بندغ نا حساب اٹ بشخنگور۔ او مونی پارے کہ قرض حسنہ کن چٹی تا ہلنگ و سیکورنٹی نا عمل برجا ءِ۔ اِرا دے نا تہٹی چیک بشخ و بانٹ کننگ بندات مریک۔