انڈیا نا مرکزی حکومت لاک ڈاؤن نا چارمیکو بشخ نا پڑو کرے ہرا دو شمبے 18 مئی آن 31 مئی اسکان برجاہ مرو۔
لاک ڈاؤن نا چارمیکو بشخ اکن وزارت داخلہ پنت تسونے ہرانا رد ئٹ 31 مئی اسکان ملک نا تہٹی و پیشن ملک آ تیا جاز نا سفر نا موکل مفرو۔
داڑ تون اوار شام ئنا ہفت بجہ آن صوب ئنا ہفت بجہ اسکان کرفیو ہم برجاہ مرو، لس مخلوق نا ہند آک و دفتر آتیٹ تُف کننگ آ جرمانہ خلینگو۔
پین حوال ئسے نا رد ئٹ انڈیا ٹی تدوکا 24 گھنٹہ ٹی کورونا نا پنچ ہزار مثبت کیس پک مسونو ہرا کہ اسہ دے ٹی تیوہ غاتیان زیات مثبت کیس تا ریکارڈ ءِ۔
یاتی مرے کہ انڈیا کورونا کیس تیٹ چین آن ہم گدرینگانے ہراڑے کورونا نا تالانی تدوکا دسمبر ٹی بناء مسوسس۔
وزارت جانجوڑی نا پاننگے انڈیا ٹی کورونا نا مثبت کیس تا جمعی کچ ودیسا 96 ہزار 169 مسونے اندن کہوکا تا جمعی کچ مُسہ ہزار 29 مسونے ۔
لاک ڈاؤن نا چارمیکو بشخ ٹی برام تیٹ 50 بندغ ہننگ نا ہد ٹہیفنگانے اندن جنازہ ٹی 20 بندغ نا اوار مننگ نا موکل تسونو۔
مرکزی حکومت ریاست آتا زی آ ٹرانسپورٹ نا فیصلہ ءِ ہلانے کہ ریاستی ٹرانسپورٹ آتیا اوار تولینگ آ فیصلہ مننگ کیک، مُچ لس دفتر آتیٹ ماسک بیننگ الّمی کرینو۔
دہلی نا سر وزیر پارینے کہ اونا حکومت لاک ڈاؤن نا بابت تینا پنت ءِ زوت ایتو، اندا وڑ ئٹ ایلو ریاستی حکومت آتیان ہم اومیت کننگ ءُ۔
ایلو کنڈان مُچ ملک ئٹ اسکول، کالج و ایلو تعلیمی ادارہ آک بند مرور، سٹیڈیم ملینگو ولے اروکاک ہننگ کروفس ورزش نا ہند آک ہم بند مرور۔ داڑان بیدس ہر وڑ نا چاگردی، سیاسی، گوازی، انٹرٹینمنٹ، اکیڈمک، ربیدگی و دینی مُچی تیا ہم پابندیک مرو۔