اکادمی ادبیات نا پارہ غان براہوئی تون اوار لمئی بولی تا کہی نوشتکار آتیکن داد

اکادمی ادبیات پاکستان نا پارہ غان لمئی بولی، بلوچی، براہوئی، سندھی، پشتو، پنجابی، اردو، ہندکو، انگریزی بولی تا کہی ادیب و شاعر آتے داد ( ایوارڈ) تننگا۔

اکادمی ادبیات نا غٹ آن بھلا داد “کمال فن ایوارڈ 2018” کن منیر احمد بادینی نا پن گچین کننگانے۔ منیر احمد بادینی بلوچی زبان و ادب نا زانتکار ئسے۔ او دا وخت اسکان صد آن گیش ناول و چندی افسانہ غاتے نوشتہ کرینے۔

کمال فن ایوارڈ 1997 آن ادکامی ادبیات پاکستان نا پارہ غٹ پاکستان ٹی سال ٹی اسے ادیب و زانتکار ئسے تننگ مریک۔ اندن داڑان مست دا داد احمد ندیم قاسمی، انتظار حسین، مشتاق احمد یوسفی، احمد فراز، شوکت صدیقی، منیر نیازی، ادا جعفری، سوبھوگیان چندانی، ڈاکٹر بنی بخش خان بلوچ، جمیل الدین عالی، محمد اجمل خٹک، عبداللہ جان جمالدینی، محمد لطف اللہ خان، بانو قدسیہ، محمد ابراہیم جویو، عبداللہ حسین، افضل حسین  رندھاوا، فہمیدہ ریاض، کشور ناہید، امر جلیل و ڈاکٹر جمیل کون آ بندغ آتے تننگانے۔

اندن دا وار بلوچی زبان ٹی شاعری نا پڑا عنایت اللہ قومی نا کتاب “بیا کپوت وش نالگین” ءِ “مست توکلی ایوارڈ” کن گچین کننگانے۔ بلوچی نثر ٹی “سید ظہور شاہ ہاشمی ایوارڈ” اکبر بارکزئی نا کتاب “زبان زانتی ءُ بلوچی زبان” ءِ گچین کننگانے۔

براہوئی زبان و ادب ٹی شاعری نا پڑا “سید محمد علی شاہ ہاشمی” نا کتاب “خوشبو نا سفر” ءِ “تاج محمد تاجل ایوارڈ” کن گچین کننگانے۔ براہوئی نثر ٹی براہوئی بولی نا شاعر و افسانہ نگار “عمران فریق” نا افسانہ غاتا کتاب “اینو ہم خدا خوشے” “غلام نبی راہی ایوارڈ” کن گچین کننگانے۔

دا بابت ٹی بی پی اکادمی ادبیات بلوچستان نا ڈائریکٹر  براہوئی زبان و ادب نا پنی آ شخصیت خواجہ افضل مراد تون ہیت و گپ کرین۔ اونا دا پاننگ ئس کہ اکادمی ادبیات پاکستان نا پارہ غان گدرینگوک آ کہی سال آتیان ادیب، شاعر و زانت کار آتا خذمت، جواننگا تخلیق و پٹ پول نا ردئٹ اوفتا است بڈی کن غٹ پاکستان ٹی غٹ بولی تیٹی تخلیق و شاعری تے مونا تخسہ ایوارڈ شاعری و نثر نا پڑا ایوارڈ تننگ مریک۔

او مونی پارے کہ لمئی بولی تا ادیب، شاعر  و زانتکار آتے ایوارڈ تننگ نا مسخت دادے کہ اسٹ تو اندا جواننگا تخلیق کروک آتا است بڈی مرے ایلو دادے کہ نن تینا چاگرد ءِ دا کلہو تننگ خوانہ کہ ادیب و زانتکار نا تینا چاگرد ٹی بھاز بھلو اہمیت ئسے۔ او انتس کہ نوشتہ کیک تینا چاگرد نا نفع کن نوشتہ کیک کہ دافتون اوار ایلو ام ادیب و شاعر آک اندا وڑٹ تینا کوشست آتے تینا قلم نا روانی ءِ برجاء تخر۔