بلوچستان، سمارٹ لاک ڈاؤن ٹی آسراتی

الّمی خوانبو

گدرینگوک آ 24 ساعت ٹی بلوچستان ٹی کرونا نا 63 کیس مسونو۔

بلوچستان حکومت انجمن تاجران نا برانزی مچی تیان گڈ اوفتون اوڑدہی کریسہ سمارٹ لاک ڈاؤن ٹی آسراتی کرے ۔

سمارٹ لاک ڈاؤن ٹی آسراتی آن پد سمارٹ لاک ڈاؤن نا ردئٹ تیوی بلوچستان ٹی صوب نا 9 بجہ آن الیس شام نا 10 بجہ اسکان مارکیٹ و دوکان آک ملنگور۔

یاتی مرے داڑان مست سمارٹ لاک ڈاؤن نا ردئٹ صوبہ نا نو بجہ آن الیس شام ہفت اسکان دوکان و مارکیٹ آک ملننگارہ ولے بلوچستان حکومت 15 جولائی آ سمارٹ لاک ڈاؤن ٹی 31 جولائی اسکان ودکی کرے داسہ اندا سمارٹ لاک ڈاؤن نا ردٹ اوٹی پین آسراتی کننگانے۔

منہ دے مست بلوچستان حکومت نا ترجمان احوال کار آتون ہیت و گپ کریسہ پارے کہ بروکا وخت ٹی کرونا وائرس پین زیات تالان مروئے اندا سوب آن حکومت بلوچستان سوچ خلننگے کہ سمارٹ لاک ٹی سختی کے۔

ولے ڈبلیو ایچ او، حکومت پاکستان و حکومت بلوچستان نا پاننگ آن ابید ام دے پہ دے آن لاک ڈاؤن ٹی آسراتی مننگے ہرانا سوب آن بروکا وخت اٹی کرونا وائرس نا پین زیات تالان مننگ نا خلیس ارے۔

یاتی مرے دا وختا پاکستان ٹی 2 لکھ 59 ہزار 999 بندغ کرونا وائرس نا آماچ ءُ۔ بلوچستان ٹی یانزدہ ہزار بندغ وائرس آن زیمی ءُ۔ اندن گدرینگوک آ 24 ساعت ٹی 2 ہزار 85 کیس مسونو ہراٹی 63 کیس بلوچستان نا ءُ، 49 بندغ دا ناجوڑی آن بیران مسونو۔

پاکستان ٹی غٹ بیران مروکاک 5 ہزار 475 ءُ۔ بلوچستان ٹی دا وختا 128 بندغ بیران مسونو۔

پُوسکنا حوالک

شعور انت اسے۔۔۔؟ – جعفر قمبرانی

شعور انت اسے۔۔۔؟ تحریر: جعفر قمبرانی دی بلوچستان پوسٹ شعور انت ءِ پارہ۔۔۔؟ بلوچستان اٹ شعور والا مننگ نا انت مطلب۔۔۔؟ دا اسہ...