کوئٹہ نا فاطمہ جناح اسپتال ٹی کانگو نا شکبری ٹی توروک اسہ ناجوڑ ٹی وائرس پک مسونے، اندن نیاڑی تون اوار اِرا ناجوڑ ڈسچارج کننگانو۔
فاطمہ جناح چیسٹ اینڈ جنرل اسپتال نا ڈاکٹر آتا پاننگ ءِ کانگو نا گواچی مروکا ناجوڑ تا حالیت خُلیس آن پیشن ءِ۔
اسپتال نا بست و بندی کوالخوا تا رد ئٹ اسہ ورناس ئسے کانگو نا شکبری ٹی اسپتال سرکریر، ہرانا دتر نا نمونہ نا رپورٹ نا ردئٹ او ٹی وائرس نا جراثیم ساڑی ءِ، ہراڑان گُڈ او اسپتال ٹی توننگانے۔
اوفتا پاننگ نا رد ئٹ ایلو پارہ آن اسہ نیاڑی و ورنا ئسے نا کانگو وائرس نا رپورٹ منفی بننگ آ اوفک اسپتال آن ڈسچارج کننگانو، ورنا کوئٹہ و اندن نیاڑی لورالائی نا ئسے۔
اسپتال نا کوالخوا تا پاننگ ءِ کہ تدوکا اِرا ہفتہ نا نیام اٹی کانگو وائرس نا 14 شکبر بندغ اسپتال آ سرکننگانو، ہرافتیٹ 6 اٹی وائرس پک مس اندن 5 دراخ مننگ آن گُڈ اسپتال آن ڈسچارج کننگار اندن وائرس آن زیمی اسہ نیاڑی اس کزیت کرینے۔