بھارت نا سینئر سیاستدان و تدوکا صدر پرناب مکھرجی 80 سال ئنا عمر ٹی کذیت کرے۔
پرناب مکھرجی 10 اگست آ تینا اُرا ٹی تماسس اندا سوب آن اونا کاٹم نا تئے ٹی ٹپ مسوسس ہموکا گُڈ او اسپتال ٹی ئس۔
چار شمبے آ ڈاکٹر آک پاریر کہ اُونا حالیت بھاز خراب مننگ ءِ، داڑتون اوار اُونا مار ابھیجیت مکھرجی ہم چاگردی حوالکاری نا سائٹ آ مخلوق آن دعا نا خواست کرے۔
دا ٹوئٹ آن منہ سائت آن گُڈ اونا مار پین ٹوئٹ ئس کریسہ حوال تس کہ ڈاکٹر آتا ہر کوششت آن پد ہم پرناب مکھر جی دراخ متو۔
پرناب مکھرجی 50 سال آن زیات بھارت نا بنجائی سیاسی جماعت کانگریس تون اوار مسونے، اندا نیام اٹی او ہفت وار ریاستی و راجی اسمبلی نا باسک گیچن مسونے و 2013 آن 2017 اسکان ہندوستان نا صدر مسونے۔