صباء انسٹی ٹیوٹ آف ریسرچ اینڈ پںلیکیشنز نا پارہ غان حمّل بلوچ (کمالان) نا کتاب “بندوک بلسمی آ” چھاپ و شینک کننگانے۔ کتاب ئٹ آپریشن ھیروف (دوم) نا خن خنوک اسہ کسہ اس ناول نا دروشم ئٹ نوشتہ کننگانے ہراٹی رومانیت، جنگ و جنگی گرج آتیتوں اوار بلوچ تحریک نا وخت ئنا خواست آک و مخلوق تون گنڈوک امیت واریک ہم اوار ءُ۔ ناول نا پیش لوز ءِ سلہہ بند آتیا احولکاری کروک صحافی باہوٹ بلوچ نوشتہ کرینے۔
کتاب نا پیش لوز اٹ باہوٹ بلوچ نوشتہ کیک؛ “اسہ ورنا اس تینا وطن کن تینا ساہ ءِ دلدستہ آ تخیسہ یخ و برف ئٹ پند و خواری کریسہ تینا راجی حق ءِ ادا کیک۔ ورنا غا ساچان ءِ تینا مابت آتیان وطن یا منیسا، اسٹ ءِ گچین کروئی ءِ۔ اسہ پارہ غا وطن نا حق کہ ساچان آن حق ادائی نا خواست کیک و ایلو پارہ غان منیسا کہ اونا ہم حق جوڑ مریک کہ او تیوہ جہان اٹ بیرہ اسٹ آ ساچان ءِ تینکن گچین، اوڑان وفادار مننگ نا سوغند کرے و اوڑتون بروک آ دے تے گدریفنگ نا زیبا غا تغ تے خنا۔”
مُستی نوشتہ کیک “ساچان و منیسا ہم اندا ہیروفی داستان نا اِرا کڑدار ءُ ہرافتے حمل جان داڑے مونا ہتنگ نا کوشست اس کرے۔ دا نوشت ئٹ ہمو تیوہ غا ندارہ غاک مونا بریرہ کہ اسہ جنگول اس تحریک نا بشخ مریسہ انت خواری و سختی تیان گدرینگک، اودے نہ بیرہ دژمن تون بلکن ہمو حالیت آتیتون ہم مون تروئی مریک کہ اودے کم وسائل ئٹ بھلو کاریم ایسری تروئی مریک۔ دنکہ بڑز ذکر مس کہ دا ندارہ ہم مونا بریک کہ اسہ جنگول اس امر امتحان اٹ تمک اودے تینا دشتار یا وطن آن اسٹ ءِ ایسری ارفوئی مریک۔”
یات سلے دا کتاب تیوہ غا ھیروف نا کسہ افک ولے بلوچ تحریک و ھیروف نا 14 شار آتے ہلنگ نا اسہ وڑو دروشم اس مون آ اتنگ نا کوشست ئسے۔
یات سلے کہ برجاء سال 31 جنوری آ بی ایل اے اسہ بھلو آپریشن ئسے نا بنا کرے کہ ہراٹی کم و ود چانڑدہ شار ئٹی بلوچ سرمچار آک دڑنگسہ پاکستانی فوج نا برخلاف جنگ کریر و کیہی جند ندر جلہو تے کریسہ بلوچ تحریک نا دیہاڑی زور ارفنگ نا پاش ءُ شاہدی اس تسر۔ دا جنگ اسٹریجک و تحریک نا تہٹی بھلو بدلی اس ئسکہ کہ ہراڑے پاکستانی لشکر نا کیمپ آتیٹی پترینگوک بلوچ سرمچار آک تحریک نا طاغت نا درشانی کریر و دژمن تون مون پہ مون مسر۔
حمل بلوچ نا دا ناولٹ ہمو چانڑدہ شار تیان اسٹ ئسے نا زی آٹے کہ ہراڑے بلوچ سرمچار آک دڑنگسہ پاکستانی لشکر تون مون پہ مون مسوسر۔ ناولٹ ئٹی است ہسون آ کسہ تیتون اوار اسہ سرمچار ئسے نا اُرا، دشتار، ہیڑ ایلم و لمہ باوہ ءِ یلہ کننگ نا جوزہ و سگ آتا داستان ہم پاش مریک۔
یاتی مرے صباء انسٹی ٹیوٹ آف ریسرچ اینڈ پبلیکیشنز نا پارہ غان دا وخت اسکان ہژدہ کتاب شینک کننگان ءُ ہرافک زند نوشت، فلسفہ، شاعری و ایلوفتیا تالان ءُ۔ دا کتاب آک براہوئی، بلوچی، اردو ئٹ شینک کننگانو۔