انصاف نا جون
ٹی بی پی سرگپ
دس ستمبر 2020 آ بلوچستان نا ضلع چاغی نا علاقہ دالبندین ئٹ پل چوٹو نا ہند آ اسہ جشوک جون اس خننگا۔ گیاوان ئٹ کڈ کروک دا جون ترند آ پِر تا سوب مون آ بسوسس۔ جون ئنا چاہنداری کن پرنس فہد ہسپتال دننگا، ہراڑے ڈاکٹر آک پاریر کہ دا جون کم و وَد مسہ سال متکنو ئسے و اودے گوَر و نت ئٹ مسہ سُم خلنگانے۔
دا جون داڑ اسکان بد حالیت ئٹ ئس کہ ہڈ آتیٹ مٹ مسوسس، ایسر ئٹ خاہوت جون ئنا چاہنداری کڈ کروک ہند آ خننگوک پازوار، پُچ آتیا لگوک درزی نا ٹیگ و دنان تا نشانی آن کریر۔ کسفنگوک نا چاہنداری حفیظ اللہ، مار رحیم محمد بلوچ نا پن آن مس۔ 2018 ئٹ اونا ایلم نعمت اللہ اسہ پریس کانفرنس ئسے نا رد ئٹ پارے کہ اونا ایلم حفیظ اللہ ءِ 30 اگست 2016 ئٹ پاکستانی آرمی دزگیر کریسہ بیگواہ کریسس۔
واہم کوئٹہ پریس کلب نا مون آ برانز نا وختا کسفنگوک حفیظ اللہ نا لمہ دا ہیت ءِ پاش کرے کہ اونا مار نا یلہ کننگ نا بدل ئٹ اسہ آرمی میجر اس اوفتیان ہفتاد لکھ نا تاوان خواہسون ءِ، اوفک ہمو میجر نا چاہنداری ءِ میجر نوید نا پن ئٹ کریر۔ اوفک مستی پاریر کہ داکان ایکان زر مُچ کریسہ تاوان نا زر آتے آرمی میجر ءِ تننگ آن گڈ ہم اونا مار ءِ یلہ کننگتو۔
ہراتم دا تدینی میڈا غا بس گڑا پاکستان آرمی دا بابت تہٹی پٹ و پول کرے ہرا میجر نوید نا کورٹ مارشل آ ایسر مس۔ فیلڈ کورٹ مارشل نا وختا تینا اختیار آتے بد کاریم ئٹ ہتنگ نا ڈو پک مننگ آ میجر نوید ءِ عمر کیز نا سزا بنیفنگا۔ اگست 2019 آ پاکستان آرمی نا حوالکار بشخ آئی ایس پی آر اسہ حوال اس شینک کریسہ پاریسس کہ آرمی چیف جنرل قمر جاوید باجوہ، فیلڈ جنرل مارشل کورٹ ءِ تروک سزا ءِ برجاء تخنگ نا پرمان تسونے۔ دا تیوہ غاتیان بیدس ہم اغواء مروک حفیظ اللہ ءِ واہم کسفنگا و اونا خاہوت آن ہفتاد لکھ تاوان ہم ہلنگا۔
پاکستان نا راجی میڈیا دا تیوی تدینی آ چُپی نا روچہ ءِ تخوک ءِ، و ہچو میڈیا بندغ اس پاکستان آرمی آن دا سوج ءِ ہرفنگ نا جرات ءِ کننگ کپک کہ او دا تدینی نا شابیتی حوال ءِ پائے و بش مروک سوج آتا ورندی ایتر۔ اگہ میجر نوید ءِ سزا مسونے گڑا اوڑا ڈو انت پک مس؟ انت اودے اغواء برائے تاوان نا ڈو ئٹ سزا مس، یا اودے خون ئنا جرم ئٹ سزا مس؟ اگہ فوج ءِ خون ئنا سما ئس گڑا حفیظ اللہ نا خاہوت ءِ داخہ سال آتیان معلومدار انتئے کننگتئو؟
پاکستان آرمی آ وخت ئنا زی بندغی حق آتا جہانی ادارہ غاک بلوچستان ئٹ جنگی ڈوہدار مننگ نا دوبہ خلیسہ کرینو، ولے پاکستان ئٹ اسہ ہم سویلین ادارہ اس زوراکی نا بیگواہی تا دا ویل ءِ ایسر کننگ آن ہورک خننگک، و پاش وڑئٹ دانا ذمہ وار آرمی ءِ پاننگ آن بیم نا گواچی ءُ۔ پاکستان نا سول حکومت ئٹ 2011 ئٹ اسہ کمیشن ” کمیشن آن انکوائری آف انفورسڈ ڈس اپیئرنسس” ٹہیفنگا کہ زوراکی ئٹ بیگواہ مخلوق و اوفتے بیگواہ کروک ذمہ وار تا ڈس ءِ خلنگ مرے۔
چس کروک آ ہیت دادے کہ پن کروک کمیشن 2011 آن دا وخت اسکان زوراکی نا بیگواہی تا نوشتہ کریفوک 6752 کیس آتیان 4642 کیس ءِ کشان ءِ و ایلو 2110 کیس دا نوشت نا وخت اسکان اوننگ خوارہ۔ داڑتون اوار پن کروک کمیشن دائسکان ذمہ وار تے مون آ ہتنگ ئٹ بے سہب مسونے۔
اسہ جہانی ادارہ ” انٹرنیشنل کمیشن آف جیورسٹس” ہراکہ جہان نا 60 ڈلہ غا جج و وکیل آتیا تالان کمیشن ئسے، تینا اسہ زوت رپورٹ اسیٹی دا سفارش ءِ مون آ ایسنے کہ “سی او آئی ای ڈی” ءِ 14 ستمبر ءِ وخت نا پورو مننگ آ ایسر کننگو انتئے کہ دا تینا مسخت نا دوئی کننگ ئٹ اسل بے سہب مسونے۔
حفیظ اللہ نا خاہوت دا گڑا آن جوان معلومدار ءِ کہ پاکستانی آرمی اسہ سول حکومت یا ادارہ ئسے ورندی تفک و او تینٹ ڈوہدار تے جہانی عدالت انصاف نا تلہ غا دننگ کپسہ، اندا سوب مُستی دا کیس نا رند ءِ داسہ یلہ کرینو، و چار سال ئٹ اولیکو وار حفیظ اللہ کن اُروک افس، اوفتا کسر اوننگ ایسر مس۔