ماڑی گیس کمپنی شہید ورنا تا خاہوت ءِ کمک کے – غلام نبی مری

بلوچستان نیشنل پارٹی نا بنجائی کمیٹی نا باسک غلام نبی مری تینا بیان ئٹی ماڑی گیس کمپنی نا بڑز کوالخواہ تیان خواست کرینے کہ کوہلو ئٹ ماڑی گیس کمپنی نا گاڑی نا ڈک لگنگ آن شہید مروک اِرا غریب ورنا عبدالمالک شیرانی، مار سمیل خان مری نا و شاہ دوست، مار حاجی بہاول خان پیردادانی مری نا خاہوت کن دمدستی تون زر ایتے۔

او پارے کہ 16 ستمبر آ کوہلو ئٹ ماڑی گیس کمپنی نا گاڑی پن کروک ہڑتوم آ ورناتے لتاڑاسس ہرانا سوب آن عبدالمالک شیرانی جاگہ غا کذیت کرے و شاہ دوست بھاز ٹپی مسوسس ہرادے ٹپی حالیت ئٹ ملتان کن دننگا واہم او دراخ متئو بیران مس۔

او مُستی پارے کہ بندغ نا ساہ ئنا ہچو مٹ اس اف واہم اونا خاہوت نا مالی کمک کننگ آن اوفتا خاہوت نا ٹپ آک درمان مننگ کیرہ ہرا بے بختی آن دائسکان مننگ کتنے۔

او پارے کہ پن کروک ویل آن گڈ خلقت سوختہ مریسہ برانز بناء کرے ہراڑا ڈرائیور و گاڑی ءِ ہلنگ آ برانز ایسر کرفنگا ولے او بیرہ او است تننگ اس مس، دائسکان شہید آتا مخلوق ءِ ہچو کمک اس کننگتے۔