بلوچستان نا جتا انگا علاقہ آتیان زوراکی ئٹ بیگواہی نا گواچی مروک چار بندغ نا جون آک خننگانو۔ دافتیٹی خضدار نا علاقہ نال آن اِرا بندغ، خاران آن اسٹ اس و اسہ بندغ اس پسنی آن اوار ءِ۔
بلوچ یکجہتی کمیٹی دا تدینی تا مذمت ءِ کریسا دافتے بندغی حق آتا لتاڑ نا پن تسونے۔
شابیتی حوال آتا رد ئٹ سئے شمبے آ ضلع خضدار نا تحصیل نال آن ہندی بست و بند اِرا بندغ نا جون آتے خننگ آن گڈ چاہنداری کہ اسپتال آ مون تسوسس، ہرافتا چاہنداری الٰہی بخش شکاری ولد رسول بخش و منیر بلوچ نا پن تیٹ مسونے۔
ہندی حوالکار آتا رد ئٹ الہی بخش شکاری ءِ پاکستانی لشکر 30 اکتوبر 2026 آ نال بازار آن دزگیر کننگ آن گڈ نادرست ہند آ سر کریسس۔ او نا زوراکی ئٹ بیگواہی آن گڈ فورسز او نا اُرا غا چھاپہ خلک، ہرا اُرا والا تیا بیدادی کننگا۔ ہندا وخت او نا ایلم و ایلم نا مار ءِ دزگیر کننگا، ہرافتے ایلو دے یکہ کننگا، واہم الہی بخش بیگواہ ئس پدان او نا جون خننگا۔
ارٹمی پارہ غان منیر بلوچ نا جون نال آن خننگانے۔ ہندی حوالکار آتا رد ئٹ اودے علاقہ ئٹ سرگرم ریاستی سرپرستی ئٹ ڈیتھ اسکواڈ آک برمتہ کریسر۔ ہڑتوم آ بندغ آتیا بیدادی کننگ آن گڈ اوفتے آ سم کاری کریسا اوفتے کسفنگ نا حوال آک رسینگانو۔
ایلو پارہ غان بلوچ یکجہتی کمیٹی تینا جتا جتا آ بیان آتیٹ خاران نا ہندی صلاح الدین ولد محمد علی و پسنی آن ہودہ سال ئنا خوانندہ ریان ولد الفت نا خون ئنا شابیت آتے ہم شینک کرینے۔
بی وائی نا رد ئٹ صلاح الدین ءِ او نا ایلم آذر تو اوار 7 اگست 2026 آ پیشیم نا وخت فورسز کم و ود 2:00 بجہ غا خاران ئٹ اوفتا اُراغان زوراکی ئٹ بیگواہ کریسس۔ صلاح الدین چیف چوک خاران ئٹ سبزی بہرا کریکہ۔ منہ دے آن گڈ او نا ایلم آذر ءِ یلہ کننگا، واہم صلاح الدین بیگواہ ئس۔ اِرا توہ آن گڈ 31 اکتوبر 2026 آ او نا جون خاران نا زردین کوٹی نا خڑک آن خننگا۔
بی وائی سی دوبہ خلکنے کہ دافتے دزگیر کننگ نا وخت خون ءِ تا کننگ نا تدینی ءِ دروغ تون مون تِس نا پن تننگانے۔
بی وائی سی بیان نا رد ئٹ پسنی نا وارڈ نمبر 6 نا ہندی 17 سال ئنا خوانندہ ریان ولد الفت ءِ 14 اکتوبر 2026 آ او نا اُرا غان ڈیتھ اسکواڈ آک زوراکی ئٹ بیگواہ کریسر۔ ہشت دے آن گڈ 22 اکتوبر 2026 آ او نا جون پسنی نا علاقہ کلانچ آن خننگا۔ کمیٹی نا رد ئٹ ریان دسکان خوانندہ اس ئس و اودے شناختی کارڈ ہم الو۔
بلوچ یکجہتی کمیٹی پارینے کہ زوراکی ئٹ بیگواہی آن گڈ بندغ آتا جون تا خننگ و اوفتا خون ءِ دروغ تو مون تِس نا پن تننگ بلوچستان ئٹ بندغی حق آتا ترند برخلافی تا اسہ بھیم اس بش کننگی ءِ پاش کیک۔ اسہ ہم بندغ ئسے غیرقانودی دزگیر کننگ، خاہوت ءِ تہ او نا بابت ہچو حوال اس تفننگ و پدان او نا خون ءِ دروغ تو مون تِس پاننگ قانود نا حکمرانی و حقِ زند ئنا برخلافی ءِ۔