بلوچ اسٹوڈنس آرگنائزیشن نا پارہ غان نشہ نا برخلاف اسے برانزی مچی اس اڈ تننگا۔ دا مچی ٹی بی ایس او تون اوار بی ایس او پجار، بلوچستان نیشنل پارٹی، نیشنل پارٹی، مستونگ سول سوسائٹی، مستونگ گرینڈ الائنس ام بشخ ہلکر۔
مچی ٹی بی ایس او نا چیئرمین نزیر بلوچ، وائس چیئرمین خالد بلوچ، سیکرٹری جنرل منیر جالب، جوائنٹ سیکرٹری شوکت بلوچ، جہانگیر منظور بلوچ، بی این پی نا میر محمد حنیف رستم زئی، ملک عبدالرحمان خواجہ خیل، میر عبداللہ جان مینگل، بی ایس او پجار نا نثار بلوچ، نیشنل پارٹی نا میر سکندر ملازئی، مستونگ گرینڈ الائنس نا حاجی محمد انور شاہوانی تران کریر۔
تران کروک آک پاریر کہ اینو اسے منصوبہ اسینا ردئٹ بلوچستان ٹی نشہ ءِ تالان کننگ مننگے، و بلوچ ورنا تے نشہ نا گواچی کننگ ءُ ولے افسوس نا ہیت دادے کہ دا کاروبار ٹی ریاست و اونا کیرہ غا کاریم کروک آ ادارہ غاک اوار ءُ۔ سوج و فریشانی نا ہیت دادے کہ تیوی بلوچستان ٹی ہر گام آ سیکیورٹی چیک پوسٹ آک اریر ولے اوکان ابید ام ایران بارڈر آن ہلیس چمن اسکان دا منشیات امر دننگ مننگے۔
او مونی پاریر کہ بلوچستان ٹی و بلوچ ورنا تیٹی نشئہ تالان کننگ نا اسے مسخت دادے کہ دا ورناک نشہ نا گواچی مریر کہ حق و ساحل و وسائل آتیکن توار چست کپس ولے نن ریاست و اونا ادارہ غاتے دا پاننگ خوانہ کہ ہچو وڑ اسیٹی دا گڑا کن نن چپ تولپنہ، ہر حالیت ہر جاگہ نن دا نشہ نا خلاف توار ارفون۔
یاتی مرے برجاء سال نوشکے ئٹ نشہ نا برخلاف پبّی توار ارفوک ورنا سمیع مینگل ءِ گمانی نشہ نا سوداگر آک کسفیر، سمیع مینگل نا خون آن گڈ نوشکے تون اوار بلوچستان نا جتا علاقہ آتیٹ نشہ نا سوداگر تا برخلاف برانز آک شابیتی ئٹ بناء مسر۔
اندن بلیدہ نا اسہ چنکو خلق الندور آن نشہ نا برخلاف بناء مروک ورنا تا چاہنداری تالان کروک کاریم داسہ بلوچستان ئٹ اسہ سوگو ءُ تحریک ئسے نا دروشم اٹ بسونے۔
داڑان مالو تربت، حب، خضدار و ایلو علاقہ آتیٹ برانز آک مریسہ کرینو۔
اندن بلوچ سلاء بند تنظیم آک نشہ بہا کروک ہند و سوداگر تیا جلہو نا پڑو کرینو۔ تدوکا دے تیٹ بلوچ ریپبلکن آرمی پنجگور ئٹ نشہ بہا کننگ نا ہند آ چغلی بمب نا ذمہ واری ءِ ارفیسہ پڑو کرے کہ نن مُستی ہم بلوچ ورناتے نشہ نا گواچی کروک آتیا جلہو کرون، دا ردئٹ درو پنجگور ئٹ اسے پین جلہو ئسے نا ہم ذمہ واری ءِ بی آر اے نا ترجمان بیبگر بلوچ منا۔