گیس ئنا بند مننگ و بجلی نا چمّک خلنگ آن خلقت سیڷ ئٹ سرگڑدانی تا گواچی۔
بلوچستان نا شار قلات ئٹ سیڷ ئنا ترندی برجاء ءِ، انداڑتون گیس ئنا پریشر مفرنگ نا سوب آن خلقت سرگڑدانی تا گواچی مسونے، ایلو پارہ غان بجلی نا ان بر و دُو دکّہ مننگ آن بجلی نا سسٹم ہم بدحال ءِ۔
حوال آتا ردئٹ درو آن قلات ئٹ یخ ترند مننگان مخلوق اُراتیان پیشن تمنگ کن وارہ خننگ اف۔ سیڷ ئنا بناء تون گیس بند مس اندن قلات شار نا جتا فیڈر آتیا کیسکو کوالخوا تا پارہ غان بجلی نا ان و بر آن کاروبار تون اوار اُراتیٹی مخلوق سرگڑدانی تا گواچی مسونے۔
خلقت گیس نا بند مننگ و بجلی نا دو دکّہ مننگ آ بڑز کوالخوا تیان پامداری نا خواست کرینے۔ انداڑتون خلقت ویل آتے ایسر کپرنگ آ برانز نا تڑی تسونے۔
یاتی مرے بلوچستان نا بھاز آ علاقہ آتیٹ سیڷ نا بناء تون گیس و بجلی نا ویل آک زیات مونا بریرہ ہراڑتون خلقت سرگڑدانی تا گواچی مریک۔ ہر سال دا ویل ئنا بابت خلقت نا پارہ غان شکائست آتا کوڑ لگک ولے حکومتی کوالخواک دعویٰ کیرہ کہ بجلی و گیس نا ویل آتے ایسر کننگ نا پارہ غا ہننگ اُن۔