بلوچ اسٹوڈنٹس آرگنائزیشن پجار و ایلو بلوچ خوانندہ گل تا پارہ غان بلوچستان یونیورسٹی آن بلوچ آتے یونیورسٹی کوالخوا تا پارہ غان بیدخل کننگ نا برخلاف برانزی مچی کننگا۔
تدوکا دے بلوچستان یونیورسٹی ٹی کنٹرولر امتحانات آ پشتون پروفیسر ئسے تخنگ نا برخلاف بی ایس او پجار و ایلو خوانندہ گل تا پارہ غان شعبہ امتحانات نا کنڈکٹ برانچ، کنٹرولر آفس ءِ زوراکی اٹ بند کرفنگا۔
برانزی مچی نا کماشی کروک بی ایس او پجار نا ڈاکٹر عمیر بلوچ نا پاننگ نا ردئٹ بلوچستان یونیورسٹی ٹی بھلو وخت ئسے آن بلوچ پروفیسر و آفیسر آتے بست بندی ہند آتیان چاہنداری تون کشنگ برجاء ءِ۔
اوفک پاریر کہ داکان مالو بیدس قانود کنٹرولر امتحانات آ اسہ بیست و یک گریڈ نا پروفیسر ئسے تخنگا ہرا یونیورسٹی نا 1996 نا ایکٹ نا برخلاف ءِ۔ ہرانا کاریم بلوچ ورنا تے سیکورٹی فورسز آتیان خلیفنگ مسونے و اندا وڑ ئٹ دا وخت اسکان کروڑ آ رپئی تیٹ شعبہ امتحانات ئٹ زر کننگانے۔
اوفک پاریر کہ دا زر کننگ ءِ ڈھکنگ کن پشتون پروفیسر اس کنٹرولر امتحانات تخنگا ہراٹی پاکستان آرمی و ایجنسی تا دو ءِ۔ ایلو پارہ غان پوسکنا کنٹرولر تون مسہ عہدہ وختی آن ارے۔
برانز کروک آتا پاننگ نا ردئٹ بلوچستان یونیورسٹی اسکینڈل آن مُست و اوکان گڈ اسہ ٹولہ اس بلوچستان یونیورسٹی آ کوزہ کننگ نا کوشست کننگے ہراڑکن فوج نا تہہ ئنا ادارہ غاتیان کمک ہلنگ مریسہ ءِ۔