بلوچستان نا ضلع کیچ نا علاقہ گورکوپ ئٹ کلگ جکی نا ہند آ پاکستانی لشکر نا گاڑی تا قافلہ غا نادرست سلاء بند بندغاک جمعہ نا دے سہب ئتون جلہو کریر۔
ٹی بی پی ءِ رسینگوک حوال تا ردئٹ جلہو کروک آک چنکا و بھلا سلاء تیٹ پاکستانی لشکر نا ہفت گاڑی تا قافلہ آ جلہو کریر ہراٹی اِرا گاڑی زد ئٹ بسر۔
جلہو آن گڈ تربت آن ہیلی کاپٹر آک ہند آ ہنار و کہوک و ٹپی تے ارفیر۔
بلوچ آجوئی خواہوک سلاء بند تنظیم بلوچ ریپبکن آرمی جلہو نا ذمہ واری ءِ ارفے۔ تنظیم نا ترجمان بیبگر بلوچ نادرست ہند ئسے آن بیان شینک کریسہ پارے کہ جلہو ئٹ پاکستانی لشکر نا شش کارندہ کسفنگانو و چار ٹپی ءُ۔
بیبگر بلوچ پارے کہ دا جلہو ہمو وخت آ کننگا کہ پاکستانی لشکر علاقہ ٹی تینا مخبر تیتون اوار لشکر کشی کن ہننگ ئس۔
ایلو پارہ غان فوج و حکومتی کوالخواک پارینو کہ جلہو ئٹ فوج نا اسہ کارندہ اس خلنگانے و پنچ ٹپی ءُ۔
یاتی مرے دا جلہو اندنو وخت ئسے آ مسونے کہ اسہ دے اس مالو گوادر نا علاقہ اورماڑہ ئٹ بھلو جلہو اسیٹ پاکستانی فوج و او جی ڈی سی ایل نا چانڑدہ کارندہ خلنگار۔
اورماڑہ جلہو نا ذمہ داری ءِ بلوچ سلاء بند آجوئی خواہوک تنظیم تا سیوت بلوچ راجی آجوئی سنگر “براس” ارفے۔ یاتی مرے بلوچ ریپبلکن آرمی ہم براس اٹ اوار تنظیم تیان اسٹ ءِ۔
بلوچ راجی آجوئی سنگر نا بنداو 2018 ئٹ تخنگا، ہرانا اولیکو جلہو تگران تربت اٹ کننگا ہراٹی اِرا آفیسر تون اوار پاکستانی لشکر نا دئے ئنا کچ کارندہ خلنگار۔ اندن اورماڑہ ئٹ تدوکا سال بس آتیان دڑفسہ پاکستان کھوسٹ گارڈ و نیوی نا چانڑدہ کارندہ ءِ خلنگ نا ذمہ واری ہم براس ارفے۔
گڈیکو حوال تا ردئٹ گورکوپ جلہو آن گڈ پاکستانی فوج نا لشکر کشی برجاء ءِ۔ لشکر کشی ئٹ سلاء بند ہیلی کاپٹر آک اوار ءُ۔ واہم دائسکان ہچو نسخان ئسے نا حوال رسینگنتنے۔