ضلعی کوالخوا تا ردئٹ ڈیرہ غازی خان ئٹ دہشت گرد نیٹ ورک القاعدہ نا گمانی اِرا باسک سی ٹی ڈی نا دو آن خلنگار، اِرا باسک نن نا تارمئی ئٹ نرنگ ئٹ سرسہب مسر۔
صوبہ پنجاب نا شار ملتان آن رسینگوک احوال آتا ردئٹ “برصغیر ئٹ القاعدہ” پنی دہشت گرد تنظیم آن تعلقدار دا اِرا انتہاء پسند آک پولیس تون مون تس ئٹ جمعہ و ہفتہ نا نیامئی نن آ خلنگار۔
دا جھڑپ ئٹ اِرا پین باسک نن نا تارمئی آن فائدہ ارفیسہ نرنگ ئٹ سرسہب مسر۔ پاننگانے کہ پولیس خلنگوک آتا جون تا رہی آن رسینگو سلاء تے ہم دوئی کرینے۔
انسداد دہشت گردی نا ذمہ وار پولیس نا شینک کروک بیان نا ردئٹ خلنگوک و اوفتا نروک سنگت آک ضلع ڈیرہ غازی خان ئٹ دہشت گردی کننگ خوائسرہ۔
پولیس کارندہ عمران اصغر پارے کہ دا بندغ آک ڈیرہ غازی خان نا علاقہ چھوٹی بالا ئٹ تینے ڈھکاسر۔ اوفتا اوڑے ساڑی مننگ نا ڈھکوک احوال رسینگ آ ہراتم اوفتے دزگیر کننگ نا کوشست کننگا گڑا اوفتا و پولیس نا نیامٹ سم کاری بناء مس، ہراٹی اِرا شدت پسند خلنگار اندن ایلو ارٹ نرار۔
پاکستان نا صوبہ پنجاب نا ضلع ڈیرہ غازی خان نا گچین آ ہیت دادے کہ اوڑتون پنجاب، سندھ و بلوچستان نا سیم آک لگرہ، اندن خیبر پختونخوا نا سیم ہم اوکان بھاز مُر اف۔
پاکستانی رکھوک ادارہ تا کوالخوا تا پاننگے کہ بلوچستان آن، ہراڑے حکومت بلوچ قوم پرست آتا سلاء بند تحریک تون مون تننگہ، بروک عسکریت پسند و رکھ خلنگوک انتہاء پسند تنظیم تحریک طالبان پاکستان (ٹی ٹی پی) نا شدت پسند آک بھاز وخت ڈیرہ غازی خان نا علاقہ آتیٹ باہوٹ ہلیرہ۔
