راہشون ادبی دیوان نا وائس چیئرمین اسرار شوہاز تینا بیان ئٹ پارینے کہ پروفیسر ڈاکٹر لیاقت سنی تون اوار بلوچستان آن زانت، شعور، ادب، قلم، کتاب و تخلیق ہم برمتہ مسونو ہرانا نن ترند لوز آتیٹ مذمت ءِ کینہ۔
اسرار شوہاز مستی پارینے کہ اگہ پروفیسر لیاقت سنی ءِ گڑاس مس تو اونا ذمہ وار ساڑی حکومت مرو۔
او لیاقت سنی نا بیگواہی ءِ اسہ المیہ اس پاریسہ پارینے کہ ہردے بلوچستان آن جتا فکر تون تعلقدار مخلوق برمتہ مریک۔ پروفیسر لیاقت سنی نا یلہ کریفنگ کن خوانندہ گل آک، سیاسی پارٹیک، ادبی تنظیمک، وکیل آک، صحافیک و ایلو مخلوق تینا کڑد ءِ ایسری ایتر۔
یاتی مرے براہوئی اٹ پی ایچ ڈی دوئی کروک و براہوئی بولی آ پٹ و پول کروک لیاقت سنی ءِ درو مستونگ آن اونا اِرا پروفیسر سنگت تون اوار نادرست بندغ آک بیگواہ کریر، دوارہ ایلو اِرا پروفیسر ءِ یلہ کننگا ولے ڈاکٹر لیاقت سنی دائسکان بیگواہ ءِ۔
یلہ مروک پروفیسر آک بیان تسونو کہ برمتہ کروک آک اوفتیان شش کروڑ تاوان خوائنگ ئسر، و وار وار لیاقت سنی آن اونا تنخواہ نا سوج ءِ کننگ ئسر ولے ایلو پارہ غان بلوچ سیاسی و چاگڑدی جماعت و تنظیم آک دادے سرکار نا پارہ غان زوراکی نا بیگواہی پاننگو۔
بلوچ نیشنل موومنٹ نا ترجمان بیان اس شینک کریسہ پارینے کہ ریاست تاوان کن برمتہ نا پن آ لیاقت سنی ءِ بیگواہ کرینے۔ بلوچستان ئٹ پاکستان نا بلوچ راج ئنا جتا زند نا بشخ آتیان تعلقدار مخلوق نا برخلاف پاش آ بیدادی ساندہ برجاء مسونے، ڈاکٹر لیاقت سنی نا برمتئی دزگیری داٹی اسہ پین ڈھکیہ ءُ ودکی ئسے۔
بیان ئٹ پاننگانے کہ پاکستان اسہ پوسکنو چم ئسے نا ردئٹ ڈاکٹر لیاقت سنی نا بیگواہی ءِ تاوان کن برمتئی نا دروشم تننگ نا کوشست کننگے کہ ریاست آ ہور ارفنگپ ولے لیاقت سنی ءِ دے پاش ئٹ ہرا وڑ اٹ مسہ گاڑی اٹ سوار بندغ آک برمتہ کرینو او وڑ تینٹ پاکستانی ایجنسی تا نشانی ءِ۔
بلوچستان ادبی فورم ہم اسہ چُنک بیان اسیٹی لیاقت سنی نا بیگواہی نا مذمت ءِ کریسہ بندغی حق آتا تنظیم تیان خواست کرینے کہ اوفک لیاقت سنی کن توار ارفر۔
یاتی مرے لیاقت سنی نا بیگواہی نا برخلاف اینو کوئٹہ پریس کلب نا مون آ بی ایس او نا پارہ غان برانز نا پڑو کننگانے۔