حوال تا رد ئٹ خاخر لگنگ آن زیتون و چلغوزہ نا کرن آتیان آبات جنگل ہس ئنا ڈیر ئس جوڑ مس۔
ریسکیو 1122 نا رد ئٹ 14 جنوری نا سہب کوہ سلیمان نا خڑک زیتون و چلغوزہ نا جنگل آتیٹ ناگمان خاخر بش مس، خاخر لگنگ آن 1 کلو میٹر اسکان داپار ہپار جنگل خاخر ہلکر۔
محکمہ جنگلات نا رد خاخر لگنگ آن کروڑ آ رپئی تا نسخان مسونے، ریسکیو ٹیم آتا رد ئٹ کوہ سلیمان مَشی لڑ آ آبات باغ آتیٹ کسر مفرنگ آن بیدس فائر فائٹر آک پیادہ ہنسا ویل ئنا ہند آ سر مسر و خاخر ءِ کسفیر۔
دا وخت آ ڈسٹرکٹ ایمرجنسی آفیسر فضل منان تینٹ آپریشن نا جاگہ ساڑی ئس و خیالداری کرے، محکمہ جنگلات نا پاننگ ءِ کہ خاخر لگنگ آن کرن آتیان آبات زیتون و چلغوزہ نا درخت آک خاخر ہلکر۔
ٹانک ٹی ساڑی محکمہ جنگلات نا افسر سلیم نا پاننگ ءِ کہ بنائی وڑ ئٹ نسخان نا پاننگ مفک، داسکان داڑا کاریم برجا ءِ، دا جنگل آک حکومت نا کوالخواہی ٹی بفسہ بلکن ہندی مخلوق نا ءُ۔
محکمہ جنگلات نا کوالخوا تا پاننگ ءِ کہ خاخر لگنگ آ 52 ایکڑ بھس مسونو، دا تیوہ آ درخت آک قدرتی وڑ ئٹ داڑے ترکانو، زیمی علاقہ ہمو 3 پوائنٹس ٹی اسہ ہند ئسے، ہرادے وزیراعظم نیشنل پارک نا ہند تسونے، او پوائنٹ ءِ نیشنل پارک نا ہند رسینگ آن گڈ داڑ کن بجٹ ہم تخنگا۔
خاخر لگنگ آن ہندی بند و بست نا رد ئٹ یخ آن بچینگ کن ہندی بندغ آتا کنڈان جِر آتیٹ خاخر خلینگاسس ہرا تالان مریسہ جنگل آتے اسکان سر مس، ہراڑان کروڑ آتا نسخان مس، ویل ئنا سر سوج و ذمہ وار تا ردئٹ دائسکان ہچو فیصلہ ئسے نا پڑو کننگ متنے۔