عکس: عصا وائگ
کنے پٹس ہموڑے
نوشت: مشمار بلوچ
دی بلوچستان پوسٹ
ای زندہ اُٹ ای کستنوٹ ای کسپرہ، کہیک تو ظلم کہیک غلامی کہیک سوچ، فکر، نظریہ مدام زندہ سلک و ہر دور ئٹی راہشونی کیک، ہم کوپہ مریک، پوسکنو کسر نشان ایتک، ای اندا کاروان نا اسے بشخ ئسے اُٹ ای ساڑی اُٹ اگہ کنے پٹس، اگہ کنے پٹس !
کنے ہمو خن تیٹی پٹس ہرا خنک ہچ پیہن مفس و آجوئی نا ہنینو تغ خنیر۔ کنے پٹس ہمو سوگوْ انگا سوچ ئٹی ہرا سوچ شعور بشخک زانت بشخک آگہی بشخک۔ کنے پٹس ہمو سوگوْ انگا فکر آتیٹی ہرا چلتن نا مش آنبار مدام جِک سلوک مریر و عڑس، دغا نا جول آ تیان ہچ پنپس و تمپس۔
کنے پٹس وطن نا تہو تیٹی ہرا ڈیہہ ئنا حسن و زیبائی ءِ نازیفرہ و وطن کے لیلڑی پارہ۔ کنے پٹس ہمو پاک آ چشمہ تیٹی ہرافتیان فکر ئنا زم زم و پرواڷ وہک۔ کنے پٹس شاعراتا ہمو نظم شعر خیال آ تیٹی ہرا شعور بشخرہ۔ کنے پٹس جہد ئنا ہمو زرابی آ گوریچ آ تیٹی ہرا غلامی نا خنتے کشسہ تارمئی تا ساہ ءِ کشرہ۔ کنے پٹس دشت ئنا ہمو دیگری آ مد ئٹی ہراڑے وطن نا گواڑخاک ناز ئسے ٹی دا پاک آ مشتے بک ہلیرہ۔
کنے پٹس ہمت آتا ہمو مش تئے ہراڑے فکر ئنا پریک تولوک امیت و یقین نا گیسو تے بیرفرہ کنے پٹس لمہ و باوہ غاتا ہمو حوصلہ تیٹی ہرافتا مونا مشک ہم ذرہ ذرہ مریرہ۔ کنے پٹس ہیڑ و ایلم تا ہمو سگ آ تیٹی ہرافتا مونا گمان آک دم ایترہ۔ کنے پٹس نظریہ غاتا ہمو چیدہ ٹی ہرا راستی نا کسرے نشان ایترہ۔
کنے پٹس ہمو جمھر تیٹی ہرا ڈیہہ ءِ آسراتی نا سیخا کیرہ۔ کنے پٹس تران ئنا ہمو ہشوکا چرک آ تیٹی ہراتا لوز لوز سامراج آتا نت تیان ڈغارے کشک ۔ کنے پٹس دتر نا ہمو پڑی تیٹی ہرانا وہنگ آن ہزار آ پین مزاحمت نا گلاباک ودی مریرہ ۔ کنے پٹس ہمو کسر تیٹی ہراڑے ہمت آک ترڈو ہلپس تمپس۔
کنے پٹس ہمو پروانہ غاتیٹی ہرا ڈیہہ ئنا شمع غا تینے ہشیسہ فناء مریرہ۔ کنے پٹس ہمو ایمان ئٹی ہرا خوف و خلیس نا دیوال آن ایمون جُپیرہ۔ کنے پٹس ہمو فلسفہ غا تیٹی ہرا جہد ئنا مدام مُستی ہننگ نا درس ایترہ۔ کنے پٹس ہمو چراغ آتیٹی ہرا زوراکی نا طوفان تون سینہ تریسہ مدام لگسہ کیرہ۔ کنے پٹس ہمو اُستا تیٹی ہراڑے مہر، شادکامی تالان مریک کنے پٹس ہمو سینہ ٹی ہرا دڑد و ڈکھ آ تا تلار آ تیٹی لگسہ ہم تل تل مفس۔
ای وطن نا ذرہ ذرہ ٹی گنڈوک اریٹ اگہ کنے پٹس، ای ہر دروشم اٹ نیتو ساڑی اٹ! ای ماہ رنگ ئنا دروشم ئٹ ہرانا توبے آ رنگ مزاحمت نا چانڑدہی آ جلوہ غا تون مدام انقلابی ءُ روشنائی تالان کیک۔ ای سمی و مہلب نا دروشم ئٹ ہرافتا ہمت و حوصلہ غاک ظلم ئنا دے تے گٹو کریسہ شام کننگو۔ ای ہانی گل و ایلو ہزار آ ہیڑ و لمہ غاتا دروشم ئٹ ہرافتا پند و خواری ارمانک آجوئی نا دے ٹک تننگ کے برجاء ءُ۔
ای ہر رنگ ئنا دروشم ئٹ ای کاروان ئسے ئٹ مدام زندہ سلوک اگہ کنے پٹس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔