بلوچستان نا ضلع کیچ نا بنجائی شار تربت ٹی نادرست سلاء بند بندغ آک بالی پٹ ءِ تیل سر کروک آ ٹینکر ءِ جہلو ٹی ٹک کرینو، جہلو تدوکا شام ڈہنک نا علاقہ ئٹ بھلا روڈ آ کننگا۔
رسینگوک حوال تا رد ئٹ سم کاری نا سوب آن ٹینکر ءِ نسخان مسونے، دائسکان جانی نسخان نا حوال اف۔ تربت و پسنی ٹی بالی پٹ آتے پی ایس او تیل تیک۔
تدوکا دے پن کروک ٹینکر آ ہمو وخت آ جہلو کننگا ہرا وخت ءِ او بالی پٹ نا پارہ غا ہننگ ئس۔
جہلو آن گڈ فورسز و ایلو قانود ٹہیفوک آ ادارہ آتا کارندہ آک ویل ئنا ہند آ سر مننگ تون شاہدی مچ کریر۔ جہلو نا سوب آک سمہ تمتنو داسکان، مالو بلوچ سلاء بند آجوئی دوست آتا کنڈان دا نوعیت نا جہلو نا ذمہ واری قبول کننگانے۔
بلوچ آجوئی دوست آتا پاننگ ء کہ سرکاری و پرائیویٹ کمپنیک بلوچستان ٹی برجاء پراجیکٹس تا دروشم ئٹ بلوچ مخلوق نا استحصال ءِ کننگ ءُ، ہرانا سوب اوفتے ٹک کننگک۔