حوال: محمد نواز کھوسہ
لٹریری فورم نصیر آباد نا پارہ غان شانزدہ و ہفتدہ جنوری 2021 آ اِرا دے ئی کتاب مُچی اس اسپیشل ہائی سکول ڈیرہ مراد جمالی ٹی کننگا۔ کتاب مُچی نا تیاریک اسہ ہفتہ اس مالو آن بناء کننگاسر۔ شانزدہ جنوری آ کتاب مُچی نا بنائی دود نصیر آباد ریجن آ زو تیٹ مونا بروک اِرا کتاب نا مون پاشی آن کننگا۔ دا کتاب آتیٹ ریجن نا پنی آ سیاستدان کامریڈ رفیق کھوسہ نا “خارزاد سیاست میں” و ادب نا پڑ آ چاہنگوک پناہ بلوچ نا “بلوچ تاریخ کے نئے پہلو” اوار ئسر۔ بنائی مجلس نا گچین آ مہمان پناہ بلوچ ئس۔ اعزازی مہمان کامریڈ پیر بخش سامت و کامریڈ رفیق کھوسہ ئسر۔ بنائی مجلس ئٹ پناہ بلوچ، کامریڈ پیر بخش سامت، کامریڈ رفیق کھوسہ، زالبول ایجوکیشن آفیسر خانزادی، پروفیسر جوہر بنگلزئی، آصف ابڑو و شاہ فیصل بلوچ تران کریر۔ مقررین آک کتاب خواننگ نا خواست و چاگرڈ ئٹ اودے تالان کننگ نا جتا بشخ آتیا ہیت کریر۔
دا کتاب مُچی ئٹ شش بک اسٹال خلنگاسر۔ دافتیٹ سراج بکسٹال، نیشنل بک ہاوس، سنگت اکیڈمی و مہر در نا پارہ غان سرمد بک لینڈ، سیلز اینڈ سروسز، نیشنل بک فاونڈیشن و لٹریری فورم نصیر آباد نا اسٹال آک اوار ئسر۔
اولیکو دے کمشنر نصیر آباد ڈویژن عابد سلیم و ڈپٹی کمشنر نصیرآباد حافظ محمد قاسم کاکڑ کتاب مُچی نا دورہ ءِ کریر۔ اوفک لٹریری فورم نصیر آباد نا خواری و کتاب دوست نا است خواہی تے گچین پاریسہ اوفک مننگ کروک کمک ءِ پک کریر۔ مُچی خوالخواک کمشنر آن لائبریری نا ہڈتس ءِ ایسری تننگ کن ماڑی تننگ و ایلو مالی کمک نا خواست کریر۔ ہراڑا ڈپٹی کمشنر ماڑی نا تننگ نا حکم تس و لائبریری کن 50000 رپئی نا کتاب و فرنیچر نا ردئٹ ہم تننگ نا یخین تس۔
کتاب مُچی نا ارٹمیکو دے یک بجہ اسکان زالبول تیکن گچین کننگاسس۔ اوکان گڈ اوپن سیشن ئس۔ ارٹمیکو دے صادق عمرانی میلہ نا دورہ ءِ کرے، او لٹریری فورم نا لائبریری نا فرنیچر و سد کتاب تننگ نا پڑو ءِ کرے۔
میلہ نا ہڑتوم آ دے تیا ورنا، چُنا و زند ئنا جتا بشخ آتیان تعلق دار مخلوق بھلو کچ اسیٹی بشخ ہلیسہ کتاب ہلکر۔ اِرا دے ئٹی ریکارڈ سوا دو لکھ رپئی نا کتاب آک ہلنگار ہرافک 50فیصد رعایتی نرخ آ ئسر دا وڑئٹ جمعی کم و وَد چار و نیم لکھ نا کتاب آک بہا مسر ہرا نصیر آباد ریجن کوْن آ قبائلی و جاگیرداری گڑھ ئٹ اسہ خوشی نا ہیت ئسے و گروشکی آ بروکا دے تا مستائی ءِ۔
دا بھلا مُچی نا داد لٹریری فورم نا کارگشاد فیصل بلوچ و اونا خواری کش آ ٹیم ءِ تننگک کہ ہرافتا نن و دے ئنا خواری و جدوجہد آ دا تیوی مچی مننگ کرے۔
کم و وَد دو نیم تُوہ مالو نصیر آباد نا منہ ورنا اوار مریسہ لٹریری فورم نصیرآباد نا بنداو ءِ تخار۔ دانا مسخت کتاب خواننگ ءِ شابیتی بشخنگ، لائبریری تا ہڈتس و مخلوق، گچین وڑئٹ ورنا تے کتاب نا پارہ غا پامدار کننگ ئس کہ اسٹڈی سرکل و گپ تران نا مجلس آتیان مخلوق ءِ شعوری وڑئٹ بیدار کننگ مرے۔ سرسہب کتاب مُچی نا ہڈتس مسخت نا سرسہبی نا بناء ءِ۔
نصیر آباد نا صحافیک بیدس مَنٹ آن تینا متکنا دود ءِ برجا تخار و تینا خواست آتا بے پوروی آ دا گچین آ مُچی ءِ کوریج تتور۔ دا مُچی آن لٹریری فورم نا ورناک تینا لائبریری کن کم و وَد اسہ ہزار کتاب مُچ کننگ اٹ سرسہب مسر۔