گاڑی آ تینا پاکستان نا بیرک خل، اسلحہ آن ہلیس جوْن اسکان گدریف کس سوج کپک – سردار اختر مینگل

بلوچستان نیشنل پارٹی نا راہشون سردار اختر جان مینگل اسلام آباد ئٹ برانزی مچی ٹی تینا خیالات آتا درشانی کریسہ پارینے کہ ہرا انصاف نا تول آ ننے انصاف تروئی اس ہمو تول ٹی ننا ورنا تا جوْن تا ٹُکر آک تول کننگ مریرہ۔ ہمو تول ٹی ننا لمہ غاتا گد و پیرانگا تا دستار آک تول کننگ مریرہ۔

او مونی پارے کہ نیشنل عوامی پارٹی (نیپ) آ ام پیشن ملک و ملک دژمن بندغ آتا فنڈنگ نا کیس اس ہرانا سوب آن اوڑا رکھ خلننگا ولے اینو حکمران جماعت آتے ام اندا پیشن ملک فنڈنگ نا کیس شش سال آن چلینگسٹ ءِ ولے کس ہچ پاپک تا۔ اگہ اندا فنڈنگ کیس آ بلوچستان نا سیاسی پارٹی اس اوار مروس تو دا وخت اسکا اودے غدار پاریسہ ٹنگاسر۔

او پی ٹی ایم نا ایم این اے علی وزیر نا بارہ ٹی ہیت کریسہ پارے کہ پیشن ملکی فنڈنگ کیس آ ہرافتے نا اہل کروئی ئس اوفتے ہچ پاننگ مفک ولے اسے اسمبلی نا باسک اس کہ تینا وطن و تینا راج تون مروکا ظلم و بیدادی نا برخلاف توار ارفک اودے نا اہل کننگ کن ریفرنس جمع کننگ مریک۔

یاتی مرے پاکستان ڈیموکریٹک موومنٹ (پی ڈی ایم) نا پارہ غان حکمران جماعت تحریک انصاف نا زی آ پیشن ملکی فنڈنگ کیس آتا حوالہ ٹی اینو اسلام آباد گچین کاری کمیشن نا مون آ اسے برانزی مچی گام اس برجاء تخننگا۔ دا مچی گام ٹی پی ڈی ایم نا بنجائی قیادت مولانا فضل الرحمان، مریم نواز شریف، سردار اختر مینگل، سینیٹر کبیر محمد شہی، راجہ پرویز اشرف و ایلو پارٹی تا بنجائی راہشونک تینا خیال آتا درشانی کریر۔