اسمبلی تا باسک ک لمئی بولی تیٹی تعلیم ءِ پک کننگ کن آئین نا آرٹیکل 251 نا ٹک مسٹ نا رداٹ کانود جوڑ کیر۔
لمئی زبان تا جہانی دے نا رداٹ گدان ادبی دیوان بلوچستان نا کنڈ آن اینو 21 فروری یک شنبے نا دے اسہ سیمینار و محفل مشاعرہ اس ٹاؤن ہال سوراب اٹی اڈ ہلک، ہرانا کماشی ءِ گدان نا مسکوہی چیئرمین شکیل زہری کرے، خاص انگا مہمان سوراب نا پنی آ شاعر استاد اسماعیل خنجری ئس، وخت اس کہ اعزازی مہمانک پنی آ شاعر صادق ندیم و حبیب گرگ اسک ئسر۔ ایلو مہمان تیٹی ورنا شاعر شعیب عالم و ابراہیم میروانی اسک اوار ئسر۔ اسٹیج سیکریٹری نا دود آتے پنی آ شاعر و ادیب عنایت ساغر دوئی کرے۔ تلاوت کلام پاک نا بختاوری ءِ ابراہیم میرواڑی دوئی کرے۔
پروگرام آن تران کرسا شکیل زہری عنایت ساغر صادق ندیم و ایلو سنگت آک پاریر کہ لمئی زبان تا اہمیت آن ہچ وڑ اسیٹ نمن مننگ مفک ننا ہَد و اویل اٹی بنگالی و سندھی قوم لمئی زبان نا اہمیت آن بھاز مست آن واخب دار ئسر ہندا سوب آن اوفک تینا وس و کچ انا خاس تینا زبان تا تالانی کن کاریم کرینو، دا رداٹ ننا زبان نا کمامدار و ادبی تنظیم آتے کاریم کننگ نا بھاز گرج ءِ۔
او پارے اسمبلی تیٹی تولوک خواجہ غاک ہم آئین نا آرٹیکل 251 نا ٹک مسٹ نا رداٹ کانود جوڑ کننگ نا واکداری ءِ کاریم اٹ اتسا لمئی زبان تا تالانی کن تینا کڑد ءِ ادا کیر تاکہ تعلیمی ادارہ غاتیٹی چناتے لمئی زبان تیٹی المی مضمون اس خوانفنگ نا اسہ وار ولدا بنا مرے ہرادے مسکوہی وزیر اعلیٰ شہید نواب اکبر بگٹی نا دور اٹی بنا کننگاسس۔
پروگرام اٹی 2 مارچ کن بلوچ دود و ربیدگی نا دے آ پروگرام اڈ تننگ نا ہم فیصلہ کننگا۔ پروگرام نا گڈ سر اٹی محفل مشاعرہ اس ہام مسک ہرا ٹی شاعر آک تینا کلام آتے بنفیر۔
