بلوچ لبریشن آرمی سبی ٹی مروکا بمب جہلو نا ذمہ واری ءِ ارفے۔ تنظیم نا ترجمان جیئند بلوچ نادرست جاگہ ئسے آن میڈیا ٹی بیان اس شینک کریسہ پارے کہ بی ایل اے نا سرمچار آک پنج مارچ جمعہ نا دے آ سبی نا علاقہ ببر کچ ٹی تندوری نا ہند آ کوزہ گیر پاکستانی فوج نا اسہ گاڑی ءِ آئی ای ڈی جہلو ئٹ ٹک کریر، ہرانا سوب آن دژمن فوجی کارندہ آتون اوار استحصالی کمپنی نا ہفت کارندہ ہند آ مرگ نا گواچی مسر و پنج ٹپی مسونو، دا جہلو نا ذمہ واری ءِ بی ایل اے ارفک۔
ترجمان مُستی پارے کہ دژمن فوج بلوچ وطن آ تینا کوزہ گیری ءِ زیات کننگ و بلوچ مڈی تا لُٹ و پُھل ٹی ترندی ہتنگ نا پالیسی آ کاریم کننگ ءِ، دا کوزہ گیر آک تینا بد آ پالیسی تا مستی دننگ کن اسہ کنڈان بلوچستان ٹی فوج کشی ٹی ترندی ئٹ ودکی کننگ ءُ، ایلو کنڈان بھاز آ پیشن نا کمپنی تیٹ و فوج ئنا ذیلی ادارہ ایف ڈبلیو او نا کمک ئٹ استحصالی پراجیکٹس آ کاریم کریسہ بلوچ مڈی نا لُٹ و پُھل ٹی ترندی ہتنگ ءُ۔
جیئند بلوچ مُستی پارے کہ بی ایل اے مالو ہم پاش پارینے کہ بلوچستان اسہ جنگ زدہ ڈیہہ ئسے، بلوچ مڈی نا فیصلہ بلوچ راج کرو، پین کس استحصالی کمپنی یا مزور کار ایف ڈبلیو او نا فوجی کارندہ نا دروشم، اگہ بلوچ استحصال ٹی کوزہ گیر نا پالیسی تا مُستی دننگ ئٹ کمک کرے گڑا او تینا ذمہ وار تینٹ مرور ۔
اونا پاننگ ئس کہ بی ایل اے آزاد بلوچ وطن نا دوئی کننگ اسکان و دُن انگا استحصالی پراجیکٹس تا بر خلاف کاروائی تے ترندی تون برجاء تخو۔