بلوچستان نا علاقہ بارکھان ئٹ ادبی و ربیدگی مُچی نا بناء اینو مس، ہرا پگہ اسکان برجاء مرو۔
کوہ سلیمان ادبی و ثقافتی میلہ نا پِن ئتون بارکھان ئٹ مُچی نا بناء مسونے، دا مُچی اِرا دے اسکان برجاء مرو ہراٹی کتاب اسٹال آک خلنگانو اندن ایلو مجلس آک مننگ ءُ۔
پروگرام نا کوالخوا تا ردئٹ اینو بیگہ تون اللہ بشک بزدار نا صدارت تون محفل مشاعرہ مرو، اندن پگہ 4 اپریل نا دے سیمینار ہڈ تننگو ہراٹی ڈاکٹر شاہ محمد مری، ڈاکٹر فاروق بلوچ، اللہ بشک بزدار، ڈاکٹر کہور خان، ڈاکٹر سلیم کرد، پناہ بلوچ، حمیدہ نور، زوراخ بزدار و ایلوفک گپ و تران کرور۔
اندن پگہ بیگہ نا ساز و زیمل پروگرام مرو ہراٹی علاقائی فنکار آک تینا فن ئنا درشانی کرور۔
اینو پروگرام نا بناء بک اسٹال آتیان کننگا، بلوچ اسٹوڈنٹس ایکشن کمیٹی تون اوار جتا ادارہ غاتا پارہ غان دا مُچی ئٹ اِرا دے اکن بک اسٹال خلنگانے ہراڑے ہڑزان نرخ آتیا کتاب آک دوئی مرور۔
دا مُچی ئٹ ڈاکٹر سلیم کرد نا مٹ کروک کتاب نا مون پاشی ہم کننگ مرو۔
بلوچستان نا جتا علاقہ آتیٹ دا سال دا وڑئنا مُچیک ہڈ تننگانو، داکان مالو حب، کیچ، کوئٹہ و پنجگور ئٹ اندنو مُچی ہڈ تننگا ہرافتے مخلوق بھاز دوست تخا۔ لسبیلہ لٹریری فورم نا مُچی ءِ نادرست سوب آتیان کوالخواک پد بٹیر۔
لسبیلہ لٹریری فورم نا کوالخوا تا پاننگ ءِ کہ جتا وڑ ئنا ہڑاند آتا سوب آن مُچی ءِ نادرست وخت اسکان پد بٹنگانے۔ دا مُچی نا پد بٹنگ آ بھازاک تینا بے جاراتی تا درشانی کرینو۔
دافتیان بیدس مصبا لٹریری فیسٹول نا بناء کوئٹہ مری آباد ٹی اینو آن مسونے اندن ڈگری کالج ہوشاپ نا پارہ غان ہتم فیسٹول نا پن ئٹ مسہ دے ئی پروگرام ہڈ تننگا ہرا اینو ایسر مس۔
