اوغانستان نا دارالحکومت کابل ئٹ ہفتہ نا دے مسِن تا اسہ اسکول ئسینا پیشن مروکا تراک ئٹ بیران بندغ آتا کچ 50 غا رسینگانے اندن اقوام متحدہ، یونیسیف و پاکستان دا تدینی نا مذمت ء کرینو.
اوغان وزارت داخلہ یکشنبہ نا دے اسہ بیان ئسیٹی پارے کہ بیران مروک آتیٹی بھاز آک خوانندہ غاک ء ہرافتا سن آک 11 آن 15 سال نا نیام ئٹ ءُ.
ترجمان وزارت داخلہ طارق آریان نا رد ئٹ تراک ئٹ 100 آن گیش بندغ ٹپی ہم مسونو۔
جلہو نا ذمہ واری ء داسکان اسہ گروپ اس ہم قبول کتنے، و طالبان نا ترجمان ذبیح اللہ مجاہد دا جلہو نا مذمت ء کرینے۔
اوغان صدر اشرف غنی دا جلہو نا ذمہ وار طالبان ء کرینے۔
ترجمان وزارت داخلہ نا رد ئٹ ہفتہ نا دے کابل نا مغربی علاقہ دشت برچی نا سید الشہدا پنی آ اسکول آن خڑک دا وخت مسہ تراک مسر ہمو وخت خوانندہ غاک اسکول آن پیشن مننگ ئسر۔
اندا اسکول ئٹ صوب ئنا وخت مار آک و پیشیم آ مسنک خوانرہ۔ طارق آریاں نا پین پاننگ ئس کہ اولیکو تراک گاڑی ٹی تراک کروکا مواد آتیان کننگا ہراڑان گڈ پین ارا تراک مسر۔ دافتا رد ئٹ کہوک آتیٹی ودکی نا امکان آک اریر۔
کوالخوا تا پاننگ ء کہ دشت بارچی نا علاقہ ٹی شیعہ ہزارہ کمیونٹی نا بھلو کچ اس آباد ء و خننگ ئٹ بریک کہ اوفتے ٹک کرینو۔
اوغانستان آن برجاء سال 11 ستمبر اسکان امریکہ نا فوج نا پیش تمنگ نا پڑو آن گڈ تشدد نا واقعہ غاتیٹی ودکی بسونے اندن بھاز آ علاقہ تیٹی اوغان فورسز و طالبان نا نیام جھڑب آتیٹی تیزی بسونے۔
تدوکا وخت ئٹ داعش نا پارہ غان دا علاقہ ئٹ شیعہ کمیونٹی ء ٹک کننگ نا ذمہ واری قبول مریسہ ء۔ تدوکا سال ہم داعش کابل ٹی اسہ ٹیوشن سینٹر آ جلہو نا ذمہ واری ء قبول کریسس ہراٹی 24 بندغ بیران مسسر۔
ایلو پارہ اقوام متحدہ نا سیکریٹری جنرل انتونیو گوتریس کابل ئٹ اسکول آن خرک مروکا تراک نا مذمت ء کرینے۔
ترجمان سیکریٹری جنرل اسٹیفن ڈوجرک نا شینک کروکا بیان نا رد ئٹ انتونیو گوتریس زیمی آ خاہوت، حکومت و اوغانستان نا مخلوق تون ہمدڑدی نا درشانی ء کیک و ٹپی تا جانجوڑی کن دعا کیک۔
او پارے کہ ہر کس کہ دا جرم نا زمہ وار ء اوفتے سر سوج کننگے۔
سیکریٹری جنرل اقوام متحدہ اوغانستان ئٹ تشدد نا ایسری و تنازع نا پرامن ایسری نا خواست آ زور شاغا۔
یونیسیف ہم کابل ئٹ سید الشہدا اسکول آن خڑک جلہو نا مذمت ء کرینے۔
یونیسیف نا ایگزیکٹو ڈائریکٹر ہنریٹا فور اسہ بیان ئسیٹی پارے کہ اسکول آتا کنڈ آ تشدد ہچ برداشت کننگپک۔ اسکول آک امن ئنا جاغہ مریر، ہراڑے چناک رکھوک وڑ ئٹ گوازی ہیل کیر، خواننگ ہیل کیر۔